1 Samuɛl 2 - Kazambale lé Sebe Sauunu 1979

Ane lɛrɛ vɔ

¹ Ane bazoro yé é léé: An gi nana Gakelebale gi; Gakelebale an dɔ plɛplɛ é ziin; An ’léé fuo an nyanézannu ma, Naa, an gi nana i bɔle an va we ma.

² Mi do kpen ’ka sauun Gakelebale zo lo; Bii do kpen ɛ ke Bale nya. Kolé Bale ɛ ke gɔlɛgɔ nya é do kpen.

³ Té ka we blɛnblɛn fe é dɛrɛ lo; Té boblɛn dére é si ka ’léé é dɛrɛ lo; Naa, Gakelebale a Bale lé é we faa dɔɔ, a nya, Yé éé mi kɛlɛwenu faa va ginian.

⁴ Mi plɛplɛnu lé sa a é yélile, Yé plɛplɛ a mi tɔɔtɔɔnu lé kyɛsidi nya.

⁵ Munu lé wo ke é kanle é vinin, wa ’wobo danna buru yele we ma, Yé wo lé lɔrɔ ke wo gyɛna é vinin, wo kan; Sɔnzan négɔné yaa sɔrafié, Yé né kiɛre yaazan kɛlɛ sɔn le nya.

⁶ Gakelebale éé fɛ gya yé éé fɛ bélié. Éé mi zunwo gamunu nyanana yé éé mi sié ana.

⁷ Gakelebale éé mi gya nyané nya yé éé fua no mi lɛ, Éé mi tuaan yé éé mi nwaan.

⁸ Éé nyanégyɛzan sié vun va, Éé lee korozan sié bli la, Wo nyanale mi blɛnnu va we gi, Éé nyanana zima no wo lɛ wozé nya. Naa, tɛrɛ lé wɛyili a Gakelebale lee, Yé wo ta lé é tɛrɛ dɔra.

⁹ É dan é yuɛ pa lɛ é sɔlɛzannu ganepa va, Naa, mi naané é dan zamaga wo lɛ gunutinu va. Naa, guliwuo ’ka dan vo lɛ mi lɛ élé plɛplɛ ma lo.

¹⁰ Gakelebale nyanézannu ma é dan nyɔɔn lɛ; Lagiloru baabaana lé é dan élé zagele zun lɛ wo ta. Gakelebale é dan tɛrɛlamunu faa lé we ble lɛ. É dan plɛplɛ nɔ lɛ élé minwiinzan lɛ, Yé é dan élé Nyɔnɔzénnwiinzan lé plɛplɛ lɛ si lɛ.

¹¹ Elkana go élé fla Rama yé né vo Gakelebale lé nyanama pana Balebanzan Éli va.

Éli benu

¹² Éli benu a mi vɔnlenu nya yé wo ’ka Gakelebale dɔɔa lo.

¹³ Yé Balebanmunu ’ko, woo we kɛla munu lɛ fɛan zo, yee lé ke ’ko: Dé mi do Bale ban, Balebanzan wuozan éé dan widɔne bléyi va, ’té wisigaanné lé a suiɛ ke yaa bɛ, é a a lee.

¹⁴ Dé lɛeda léé, dé plɛnné léé, dé dɔɔ léé, dé bɔ léé, é wi fɔn a nya a gi, yé fɛ faa lé é kua wisigaanné ’léé, éé ’bɛ sié Balebanzan zé nya. Izraɛl munu faa lé woo dan Silo bɛ, woo we ’ko kɛla wo lɛ a zo.

¹⁵ Dé wo ’ka tan winyɔnɔnu kyɛ ble lɛ loo, Balebanzan wuozan éé dan yé éé a fé mi lé ke Bale banna, a lɛ léé: ’I wi nɔ Balebanzan lɛ a panele we ma; é ’ka nyi sié léé, é wimale si lo, wi mɔɛnne va lé é ke.

¹⁶ Yé dé mi ’ko a fe a lɛ léé: Dé wo winyɔnɔnu kyɛ ble faa, dé wian é sɔ i lɛ bé sié, ’té wuozan a zi paan léé: Gba, bé nɔ é nya do, dé ’bɛ kaan lo, maa dan a si lɛ gla nya.

¹⁷ Pɛniɛnu ’ko nyé yéli Gakelebale banfɛnu ma, amalé wo we blɛn dɔ wobo nwiin Gakelebale va.

Samuɛl valé é bu

¹⁸ Samuɛl éé nyanama paan Gakelebale lɛ, ’té lɛnsɔ éfɔdi a né ’ko ta.

¹⁹ A bu éé varɔ kiéné kinié a lɛ lɛɛ do do ma, yé dé yee valé é zana a gona lɛɛ do do gi saraka bo lɛ, éé goo yee varɔ nya a lɛ.

²⁰ Éli Elkana valé é na drɔɔ vo a fele nya léé: Gakelebale ’é nénu nɔ i lɛ le ’ko ma ma, né lé é a nɔ Gakelebale lɛ, a paizan nya. Yé wo go ’wo va.

²¹ Yé Gakelebale bɔ Ane va, é bɔn si yé é négɔné yaa valé nélomu fié yaa é ziin. Yé Samuɛl kiéné tin Gakelebale va.

Éli valé é benu

²² Éli kwa gyɛ é baba yé we lé a benu a kɛla Izraɛl faa lɛ, é a ’ma; é a ’ma é ziin léé, woo yiaan lomu lé woo zén‐é ékeva Bale lé sɔkɔn ’léé, wo va.

²³ É lé wo lɛ léé: Mɛmale ka we ’ko zoɛ kɛlaa? Naa, maa ka kɛlɛwe naanénu ’ma mi faa ta.

²⁴ Anlé nénu, gba. We lé maa a ’ma é ’ka zima lo; ka a Gakelebale lé munu kɛlɛna wenyanékɛlɛzannu nya.

²⁵ Dé mi do wenyané kɛlɛ mi bɛ lɛ, Bale é dan a we ble lɛ; naa, dé mi wenyané kɛlɛ Gakelebale lɛ, de ɛ dan dɔ lɛ a zuoo? Yé wo ’ka wo tɔné dɔ lɛ wo ti dére lɛ lo, Gakelebale a a va léé, é wo gyɛ, azama.

²⁶ Samuɛl kiéné vo tinna yé alé we sɔ Gakelebale valé munu lɛ.

Wo balelawe fe Éli valé é benu ma

²⁷ Bale lé mi do da Éli va yé é lé a lɛ léé: Gakelebale léma: Bléyian va lé i tranu a Faraɔn lee Éjipiti tɛrɛ la, maa ’ka anbo nagɔɔn lɛ wo lɛ loo?

²⁸ Maa a si Izraɛl bɛnnu faa méléna, anlé nyanama pale koo, an banle koo, lasikɔrɔ kyɛblele koo, éfɔdi zénle ka ta an ’lɛ koo, a faa we gi, yé wi faa lé Izraɛl lé nénu éé Bale baan wo nya, maa a nɔ i tranu lɛ.

²⁹ An banfɛnu valé an bɔvɔ fɛnu lé maa a fe léé, wa nɔ anlé kɔn gi, mɛmalé ka a wo sɛrɛnaa? Yé mɛmalé ’i benu we mini an lɛ, ’té ka buaan anlé munu Izraɛl lé balebanfɛ vininzannu nyaa?

³⁰ Bɛwemalé Gakelebale, Izraɛl lé Bale léma: Maa lé turu léé, ilé munu valé i ti lé munu é dan vo lɛ an ’lɛ lɛɛfaama, ’bɛ glɛ ’ka lo. Gakelebale léé: Sin, ’bɛ ’ka an gi é dɛrɛ lo. Naa, mi lé é an lɛdɔama, maa dan ’bɛzan lɛdɔ lɛ a ma, yé mi lé é serele bo an ma, maa dan serele bo lɛ ’bɛzan ma.

³¹ Bé ye, bléyian nya lé maa dan i bɛ tua lɛ yé maa dan i ti lé munu bɛ tua lɛ, yé mi kwa ’ka dan kɛlɛ lɛ ka gɔnɔ la é dɛrɛ lo, ’bɛ bléyi bɔ.

³² I dan i nyanézan ye lɛ anlé kɔn gi, dɔlé ’té maa fɛ zinnu gi gyɛ Izraɛl nwiin; yé mi kwa ’ka dan kɛlɛ lɛ ka gɔnɔla é dɛrɛ lo.

³³ Maa dan ilé mi do vo lɛ an banna sɔnɔ, yara lé i gyɛle valé i bli kyɛ dɔle we ma; naa, ilé kɔngimunu faa é dan ga lɛ wo plɛplɛ bléyi va.

³⁴ Yé we lé é dan bɔ lɛ i be fiénu Ofoni valé Finé ma, é dan kɛlɛ lɛ tɔmase nya i lɛ; wo fiénu é dan ga lɛ yi do nya.

³⁵ Yarapawelazan lé é dan we kɛlɛ lɛ an bli valé an boen yɛrama, maa dan a dɔ lɛ Balebanzan nya; maa dan alé kɔn ’léé drɔɔ vo lɛ, yé é dan tawo lɛ yifaama anlé nyɔnɔzénnwiinzan yara.

³⁶ Yé dé i gɔnɔlazan‐oo zan‐an vo, é dan dia lɛ é yara a ’lɛ, gɔɔli wɔlɛ do valé buru kuru do yele we ma, yé é dan a fe lɛ léé: ’I Bale lé nyanama kiéné nɔ an lɛ, maa a pa, fɛblele kiéné yele we gi.