1 Samuɛl 19 - Kazambale lé Sebe Sauunu 1979

Saul nyané pa David ta

¹ Saul we fe é be Jonatan valé é wuozannu faa lɛ léé, ’wo David gyɛ. Naa, David sɔ Saul be Jonatan lɛ é baba,

² yé ’bɛ a zuo fe David lɛ yé é léé: An ti Saul a i gyɛle kwa kulina. Amalé ’i yuɛ pa ibo va. Tɛlɛ bladi, ’i go fɛna baana, yé ’i yɔɔ.

³ Maa dan bɔra lɛ yé maa dan dɔ lɛ an ti sɔnɔ féi lé i ke a ta, ana; maa dan ilé we fe lɛ an ti lɛ, yé we lé é dan a fe lɛ maa dan a ’ma lɛ yé maa dan a zuo fe lɛ i lɛ.

⁴ Jonatan David ma wezin fe é ti Saul lɛ yé é léé: David ’ka wenyané kɛlɛ lɛ i lɛ lo, amalé té i wenyané kɛlɛ a lɛ lo. Éé we kɛla ilé wezin yele ma;

⁵ é bli si é ga lɛ, é Filisiti mi gyɛ yé Gakelebale Izraɛl faa si we blɛn gi. Bé ye, yé i gi nana a we ma. Mɛmalé i dan wenyané kɛlɛ lɛ mi zin lɛ yé i David gyɛ é boaa?

⁶ Saul Jonatan dére ’ma yé é Bale ’nyɔɔn a fele nya léé: Gakelebale a é yuɛma. David ’ka dan ga lɛ lo.

⁷ Jonatan David laa, yé é we ’konu zuo fe a lɛ; ’bɛ zuo é go a nya Saul va yé David vo a va bélé é vinin zo.

⁸ Wo vo guli danna. David nwa Filisitinu ma yé é guli dan wo va; a bɛ mini wo ta é baba yé wo fwi a ’lɛ.

⁹ Yé Gakelebale lé léli naané Saul kun, ’té é a é nyanale élé kɔn gi, élé din nya é lee.

¹⁰ David kɔnɔ gyɛ yé Saul a a va léé, é David valé kɔnguru wɔrɔan é ke ’léé din nya. Naa, David so a lee yé Saul din vɔ kɔnguru gi. David vlan buru yé é vɔ fli gi é béli.

¹¹ Saul munu nwunvɔ léé, ’wo dɔ David lé kɔn ’léé, yé wa gyɛ é bladi. Naa, David na Mikal a zuo fe David lɛ yé é lé a lɛ léé: Dé i ’ka vɔ lɛ fli gi é béli ’ko lo, izé é dan nyaa lɛ tɛlɛ.

¹² É a bɔra fɛnɛti ta, yé David go yé é vɔ fli gi. ’Bɛ zo lé é so ga lee.

¹³ ’Bɛ zuo Mikal miyili do si, yé é a pla yialafɛ ta; é bolikɔlɛ pla a ’wuoplana yé é sɔ zén a ta.

¹⁴ Dé Saul munu nwunvɔ David sina, Mikal léé: A ma é yaan.

¹⁵ Saul wo nwunvɔ é ziin a sile we gi, yé é léé: ’Ka sia é yialafɛ nya mi, ’ka da a nya an lɛ ’ko yé maa gyɛ.

¹⁶ Munu ’konu da é ziin yé bé ye, miyili a yialafɛ ta yé bolikɔlɛ a a ’wuoplana.

¹⁷ Saul lé Mikal lɛ léé: Mɛmalé i dabli kɛlɛ an lɛ ’bɛ zo, yé i daan an nyanézan ma, yé é go, yé é so an lee? Mikal a zi pa Saul lɛ léé: É lé an lɛ léé, ’an daan ’é ma ’é go, dé ’bɛ kaan lo é dan maa gyɛ lɛ.

¹⁸ ’Bɛ zo lé David vɔ fli gi yé é so ga lee. É go Samuɛl va Rama yé we faa lé Saul a kɛlɛ a lɛ é a zuo faa fe ’bɛ lɛ. ’Bɛ zuo wo go Samuɛl nya yé wo nyana Najɔt.

¹⁹ Wa zuo fe Saul lɛ léé: Bé ye, David a Najɔt, Rama sɔnɔ.

²⁰ Saul munu nwunvɔ David kunle we gi. Naa, wo balelayemunu ye balelawe fena aan wo, ’té Samuɛl a wo ’lɛzan nya, Bale Léli Saul lé nwunvɔmunu kun, yé wo é ziin wo kun balelawe fele ma.

²¹ Wa zuo fe Saul lɛ, yé é mi bɛnu pa zia yé ’bɛnu é ziin, ’bɛnu balelawe fe. É munu pa zia a gɔnɔ yaazan nya yé ’bɛnu wo é balelawe fe é ziin.

²² Yé Saul bozen go Rama. Saul bɔ aan wo ’yiguru blɛn lé ke Séku, a ma, é léé: Samuɛl valé David a kyɛɛn? Wa zi pa a lɛ léé: Wa Najɔt, Rama sɔnɔ.

²³ Yé é go Najɔt lé ke Rama sɔnɔ, a nazia. Bale Léli a kun é ziin; yé Saul go balelawe fele nya zia fɔɔ yé é bɔ Najɔt, Rama sɔnɔ.

²⁴ Élé sɔnu si é ta yé é balelawe fe é ziin Samuɛl yuɛ va; yé ébo vuli tɛrɛ va é porole yé é yiri vɔ ana yé é tu kini ana. Bɛwemalé wo léé: Saul a balelayezannu va mi do nya é ziin?