1 Samuɛl 18 - Kazambale lé Sebe Sauunu 1979

Jonatan é béé ble David va

¹ David nyaa wefele nya Saul lɛ, yé é sia ’bɛ bléyi ’ko va Bale Jonatan valé David pa ékema do yé David sɔ Jonatan lɛ bélé abozen zo.

² A yi duo nya Saul David si, yé é ’ka zi nɔ lɛ a lɛ léé, é go é ti lé kɔn ’léé é dɛrɛ lo.

³ David sɔ Jonatan lɛ bélé ébozen zo, amalé Jonatan é gi pa do David va.

⁴ Élé sɔ si é ta yé é a nɔ David lɛ; alé varɔnu koo, alé gwɔun valé alé sa valé alé kyɛsidi koo é ziin, é wo nɔ David lɛ.

⁵ Dé Saul a nwunvɔ fɛofɛana David éé goo ana yé é a kɛlɛle lɛ sɔɔan. Saul a dɔ gulidanmunu zilɛzan nya, yé é sɔ munu faa lɛ, dé é a Saul wuozannu nyaoo.

Saul maawo David va

⁶ David lé Filisiti mi gyɛle zuo, wa dana aan wo, lomu si fla faa la yé wo da Saul si lɛ zia, lɛrɛvɔle valé nɛnɛbole nya, ’té woo poo valé kɛnɛnɛ?-?kɛnɛnɛ gya, ’té woo siaan gi nanale nya.

⁷ Lomu éé lɛrɛ sian, ’té woo wé a ma, a fele nya léé: Saul élé mi wurunu gyɛ, Yé David élé mi baanu gyɛ.

⁸ Saul bli fli yé é ’ka sɔ lɛ a lɛ lo. É léé: Wo mi baanu nɔ David lɛ, yé wo mi wurunu nɔ maa lɛ. A kɛlɛle minwiinzan blɛn nya‐an é vo bɛ loo?

⁹ É sia ’bɛ yi ma, Saul éé David naginian é yuɛ nyané nya yifaama.

¹⁰ ’Bɛ é tu kini Bale lé léli naané Saul kun yé wele mlamlané pa a lɔ ma alé kɔn gi. David kɔnɔ gyɛ bélé é vinin zé zo, ’té Saul lé din a é lee.

¹¹ Saul din nwa David ma a fele nya é bli gi léé, ’é dan David valé kɔnguru wɔrɔ lɛ é ke ’léé. Naa, David so a lee gɔnɔ fié.

¹² Gakelebale a David va yé é si Saul va, amalé Saul kana David lee.

¹³ É David si é ma baa, yé é a kɛlɛ mi wuru soru zilɛzan nya. David éé goo ’té éé dan munu zilɛzan nya.

¹⁴ Dé é weowean péli sia éé a kɛlɛle lɛ sɔɔan, yé Gakelebale a a va.

¹⁵ Saul a ye léé, we faa nyian é wo a ma yifaama yé é kana a lee;

¹⁶ naa, David sɔ Izraɛl valé Juda faa lɛ, éé goo ’té éé dan wo zilɛzan nya, azama.

David Saul lu si é na nya

¹⁷ Saul lé David lɛ léé: Bé ye, maa dan an lu vininzan Mérab nɔ lɛ i lɛ; naa, ’i nyanama pa an va nyanabli nya é wo, yé ’i Gakelebale lé gulinu dan. Naa, Saul lé ébo lɛ léé: Maa ’ka a va léé, maa bɛ mané a ma lo, naa, Filisitinu lé, ’bɛnu a gyɛ.

¹⁸ David a zi pa Saul lɛ léé: De ɛ ke maa nya, yé anlé tɛrɛla a mɛ fɛ nya, yé de ɛ ke an ti gɔnɔlamunu nya Izraɛl tɛrɛ la, yé an kɛla minwiinzan lu zana nyaa?

¹⁹ Dé Saul lu Mérab nɔle David lɛ yi bɔ, wa nɔ Méolazan Adriɛl lɛ.

²⁰ David sɔ Saul lu Mikal lɛ. Wa zuo fe Saul lɛ yé é sɔ a lɛ.

²¹ É lé ébo lɛ léé: Maa dan a nɔ lɛ a lɛ yé ’é kɛlɛ a kunsan nya yé é ga Filisitinu lee. Yé Saul lé David lɛ a gɔnɔ fiézan nya léé: I dan kɛlɛ lɛ an lu zana nya kyɔ.

²² Saul a fe é wuozannu lɛ léé: ’Ka we fe kyeen gi David lɛ, yé ’ka fe a lɛ léé: Bé ye, minwiinzan bli a é zima i vazia, yé i sɔ a wuomunu faa lɛ; amalé sin, ’i kɛlɛ a lu zana nya.

²³ Yé Saul wuozannu dére ’konu fe David lɛ. Yé David a zi pa léé: É dɔ ka gi léé, kɛlɛle minwiinzan lu zana nya a we kiéné nyaa? Maa a nyanégyɛzan nya yé maa a mi kiéné nya.

²⁴ Saul wuozannu David dére fe Saul lɛ.

²⁵ Saul léé: ’Ka fe David lɛ léma: Minwiinzan mawe ’ka lebogɔɔli gi lo; naa, é a a va léé, ’é Filisitinu gɔnédɔna kɔlɛ kuru yɔ soru ye, ’é lɛgi pale é nyanézannu ma we gi. É a Saul gi léé, Filisitinu é dan David gyɛ lɛ.

²⁶ Saul wuozannu dére ’konu fe David lɛ, yé David a nyi si léé, ’é kɛla minwiinzan lu zana nya.

²⁷ Bléyinu lé wa dɔ, wo ’ka tan bɔ lɛ lo yé David valé é vamunu go yé wo Filisitinu mi wuru do gyɛ; é da wo gɔnédɔna kɔlɛ kuru nya yé é wo nɔ wo ’léé lɛ sɔɔle nya, kɛlɛle minwiinzan lu zana nya we gi. Yé Saul é lu Mikal nɔ a lɛ a na nya.

²⁸ Saul a ye, yé é a ’ma léé, Gakelebale a David va; yé David sɔ a lu Mikal lɛ.

²⁹ Saul lé kanale David lee gi go gyɛle nya, yé é kɛlɛ a nyanézan nya élé tɛrɛla faa gi.

³⁰ Filisitinu lé tɔmunu woo dan Izraɛl va guli dan lɛ; dé wo da vu, David lé wo kelele mini Saul wuozannu zé ta, yé é tɔ ye.