1 Samuɛl 17 - Kazambale lé Sebe Sauunu 1979

Wo guli dan Filisitinu va

¹ Filisiti munu ’wolé sunyanu laa guli danle we gi, yé wo zén ékeva Soko, Juda lé tɛrɛ la; wo sɔkɔnnu dɔ Soko valé Azéka méléna Éfɛz‐Damim.

² Saul valé Izraɛl munu zén ékeva é ziin; wo sɔkɔnnu dɔ térébɛnt yilinu lé gɔ worona yé wo dɔ guli bale la Filisitinu ma.

³ Filisitinu a gɔ do ma, yé Izraɛl a gɔ koɛ ma, yé gɔ worona a wo méléna.

⁴ Gɔné do si Filisitinu lé sɔkɔn dɔna yé é dɔ sunyanu palu fié méléna. A tɔ lé Goliat; é si Gat yé é a grɔgrɔ mɛtrɛ yaa é ta lé mɛtrɛ po do.

⁵ Zénékoro a a ’wuo ma, yé a golɛtayɔɔfɛ a zéné nya, baséékɔlɛ zo, yé a bɛn a zéné sikla baa fié wuru soru nya.

⁶ A ganeyɔɔfɛ a zéné nya yé toané din a é dunle a bɛapanu ta.

⁷ Alé dinyili a bélé sɔ nyana zo, yé a din bɛn a foliɛwɔlɛ sikla wuru yaa nya. A botakuunfɛ kɔnésizan éé tawoo a ’lɛ.

⁸ Filisiti mi dɔ yé é we fe Izraɛl sunya gu lé wo ke é dɔle guli bale la, wo lɛ, yé é siaa wo lɛ léé: Mɛmalé ka bɔra yé ka dɔ guli bale laa? Maa ’ka Filisiti mi nya loo? Ka ’ka Saul lé luunu nya loo? ’Ka mi do si a va yé maa valé yee ’é kee.

⁹ Dé é bɔ guli danle lɛ an va yé é an gyɛ ko dan pla lɛ ka wuo; naa, dé maa a kele yé maa a gyɛ ka dan pla lɛ ko wuo yé ka dan kolé nyanama pa lɛ.

¹⁰ Filisiti mi lé é ziin léé: Maa gɔné nagɔɔn‐an Izraɛl lé sunyanu lɛ kyɔ. ’Ka gɔné do nɔ an lɛ yé ko kɛlɛ a nya.

¹¹ Saul valé Izraɛlnu faa Filisiti mi dére ’konu ’ma yé wo kana yé wo gi nyɛ kini.

David Goliat gyɛ

¹² Éfraim mi lé é si Bɛtléɛm, Juda tɛrɛ la, wa laama Izai, ’té a be a sɔraa yé Saul bléyi va é a é kwa yé a lɛɛ a kiɛre, David a ’bɛ be nya.

¹³ Izai be vininnu yaa go Saul zuo guli danna; a benu yaa lé wo go guli dan lɛ bɛ, wa vininzan laama Éliab, wa fiézan laama Abinadab, yé wa yaazan laama Saama.

¹⁴ David a a voélazan nya. A vininnu yaa go Saul zuo aan wo,

¹⁵ David si Saul va yé é nɔla Bɛtléɛm é ti lé ’blanu tabinle we gi.

¹⁶ Filisiti mi éé bɔraan bladi valé nyanadi, ’té éé gɔné nagɔɔn‐an wo lɛ fɔɔ yi yɔ fié wuo.

¹⁷ Izai lé é be David lɛ léé: Fɛwɔlɛ sélile vlekyɛɛ do ’ko, é valé buru vu ’ko, ’i wo si, ’i go wo nya i bwenu zuo kelekele sɔkɔn dɔna;

¹⁸ ’i dirinyɔyiyɔɔ vu ’ko si é ziin wolé mi wuru soru palu nwiinzan zé nya. Dé i bwenu a drɔɔ, i dan a ye lɛ yé i dan wo tawe fe lɛ an lɛ tegele.

¹⁹ Wa Saul valé Izraɛl lé munu faa va térébɛnt yilinu lé gɔ worona guli danna Filisitinu va.

²⁰ David nwa bladi tutu. É ’blanu bɛ pa mi do lee, é ’élé kɔné si yé é go fɛan zo lé Izai a fe a lɛ, a zo. É bɔ sɔkɔn dɔna bléyian va, ’té sunyanu a gona dɔna guli bale la, ’té woo siaan gulidandére nya.

²¹ Izraɛl valé Filisitinu dɔ guli bale la, sunya palu do dɔ palu do ma.

²² David élé kɔné bɛ pa kɔné tabinzan lee yé é vlan buru fɛana lé wa guli bale plana, ana. É bɔ tɔɔn, é we é bwenu va yé wo ’wo ke zuo laa.

²³ É a glewona wo va bléyian va, bé ye, Filisiti mi Gatzan lé wa laama Goliat, é si Filisitinu lé guli bale ta yé é dɔ sunyanu palu fié méléna. Dére lé éé a fé turu é kyɛn, é yee duo fe yé David a ’ma.

²⁴ Wolé mi ’ko yele tɔɔn Izraɛl faa fwi a ’lɛ yé kana blɛn zén wo gi.

²⁵ Wo faa do do a fena léé: Ka mi ’ko yee? É da gɔnéwe kɛlɛ lɛ Izraɛl lɛ. Dé mi do a gyɛ, minwiinzan é dan fuafɛ kiɛre kiɛre nɔ lɛ azan lɛ, yé é dan é lu nɔ lɛ a lɛ yé é dan a ti gɔnɔlamunu vo lɛ woboma Izraɛl.

²⁶ David lé é sɔnɔ munu lɛ léé: Mi lé é Filisiti mi ’ko gyɛ yé é yaragyɛwe si Izraɛl nwiin, wo dan a kɛlɛ lɛ kaa ’bɛzan lɛɛ? Filisiti mi ’ko, ganedɔlozan, de ɛ ke a nya yé é Bale yuɛmale lé sunyanu sɔnɔaan?

²⁷ We lé wa fe kɔɔn bɛ, wo yee duo fe a lɛ yé wo lé a lɛ léé: ’Bɛ zo lé wo dan kɛlɛ lɛ mi lé é a gyɛ, ’bɛzan lɛ.

²⁸ A bwe vininzan Éliab, é David lé wefele munu ’konu lɛ ’ma, yé a bli fli David ma. Yé é léé: Mɛmalé i da, yé ’blanu lé wo ’ka di lo bɛ, i wo vo bwi gi de ɛ vaa? Maa ilé boblɛn valé i bli nyané dɔɔ. Guli naginile we gi lé i da.

²⁹ David a zi pa léé: Maa kɛlɛ kaa? I léé, té ’an we loo?

³⁰ Yé é nwun zi dɔ é bwe ta yé é kun wefele ma mi bɛ lɛ yé é yee we duo laa a lee. Munu a zi pa a lɛ bélé é vinin zo.

³¹ Dérenu lé David a fe, munu wo ’ma aan wo, wo wo fe Saul lɛ, yé ’bɛ mi pa zia a laana.

³² David lé Saul lɛ léé: Té mi do kpen fuu é si é ta Filisiti mi ’ko lé we ma lo. I wuozan é dan go lɛ guli dan lɛ a va.

³³ Saul lé David lɛ léé: I ’ka bɔalɛ léé, i guli dan Filisiti mi ’ko va lo, naa, bii a né nya yé é sia a kiéné la bléyi va é a gulidanzan nya.

³⁴ David lé Saul lɛ léé: I wuozan a é ti lé ’blanu tabinna. Yé dé golizra léé, dé urisi léé, dé é da trubɛ va ’bla do si lɛ,

³⁵ maa vlan buruwo a zuo yé maa a gya, yé maa ’bla sié a lɔ ma. Dé é nwa an ma, maa a kunwo é bɔrɔ ma yé maa a gya yé éé gaan.

³⁶ ’Bɛ zo lé i wuozan golizra valé urisi gyɛ yé Filisiti mi ’ko, ganedɔlozan ’ko, azé é dan kɛlɛ lɛ ’bɛ zo; é Bale yuɛmale lé sunyanu sɔnɔ, azama.

³⁷ David lé é ziin léé: Gakelebale lé é an si golizra sɔnéwɔlɛ valé urisi bɛlaa lee, é dan an si lɛ Filisiti mi ’ko lee é ziin. Yé Saul lé David lɛ léé: ’I go, yé Gakelebale ’é kɛlɛ i va ma.

³⁸ Saul élé sɔnu zén David ta; é zénékoro wo a ’wuo ma, yé é golɛtayɔɔfɛ zén a ta.

³⁹ David Saul lé gwɔun dɔ é gyɛn, yé é ’ka tan a gi dan lɛ lo, amalé é a a va lé é tawo. Naa, é lé Saul lɛ léé: An ’ka bɔa tawole lɛ gulidanfɛ ’konu nya lo. A kɛlɛbɛ ’ka vɔ lɛ an lee é kyɛn lo. Yé é wo si é ta.

⁴⁰ Élé yili sia, yé é gɔlɛné ma yɔrɔyɔrɔ soru sia yuu ba gi, yé é wo zén élé ’blatabin bala gi. ’Bɛ zuo é go Filisiti mi va, paalu nya é lee.

⁴¹ Filisiti mi bié David va sɛné sɛné, ’té a botakuunfɛ kɔnésizan é tawo a ’lɛ.

⁴² Filisiti mi a nagini yé é David ye aan wo é prɔlɛlɛ vɔ a ma, é a ye né nya é fu, é yara nya é nɔnɔmi, azama.

⁴³ Filisiti mi lé David lɛ léé: Maa a blén nya yé i dan an va yili nyaa? Yé alé yonu yɔɔle a ma zuo

⁴⁴ é léé: ’I da an va, yé maa dan i wi nɔ lɛ lagi mianénu valé bwi gi winu lɛ.

⁴⁵ David lé Filisiti mi lɛ léé: I a dana an va gwɔun koo, din koo, toané din koo, wo nya; naa, maa a gona i va lai sunyanu lé Gakelebale tɔ nya, Izraɛl lé sunyanu lé Bale lé bé sɔnɔ, a tɔ nya.

⁴⁶ Kyɔ Gakelebale é dan i pa lɛ an lee, an dan i gyɛ lɛ yé an dan i ’wuo kini lɛ; kyɔ an dan Filisitinu galenu nɔ lɛ lagi mianénu valé tɛrɛlawinu lɛ. Yé tɛrɛ faa é dan a gi dɔɔ lɛ léé, Izraɛl lé Bale ana.

⁴⁷ Yé mi gbau ’ko faa é dan a gi dɔɔ lɛ léé, Gakelebale ’ka mi sié we gi gwɔun valé din nya lo. Guliwuo éé voo Gakelebale lɛ. Yé é dan ka pa lɛ ko lee.

⁴⁸ Filisiti mi kun tawole ma David vazia tɔɔn, David vlan buru gulidanna keele we gi Filisiti mi nya.

⁴⁹ É bɛ wɔra élé bala gi, yé é gɔlɛ do si ana, yé é a vuli élé paalu nya; é Filisiti mi gyɛ é yarapɛla, yé gɔlɛ Filisiti mi fɔn é yarapɛla yé é dia tɛrɛ va é yara.

⁵⁰ ’Bɛ zo lé David mini Filisiti mi ta paalu gi gɔlɛ nya; é a kele yé é a gyɛ, ’té gwɔun ’ka a lee lo.

⁵¹ É vlan buru, yé é dɔ Filisiti mi sɔnɔ yé é ’bɛlé gwɔun so a gi, yé é a gyɛ a nya yé é a ’wuo kini a nya. Filisitinu a ye aan wo léé, wolé nyanazan ga, wo vlan buru.

⁵² Yé Izraɛl munu valé Juda munu siaa yé wo Filisitinu zuo bin fɔɔ gɔ worona, fɔɔ Ékrɔn gɔrɔ ’léé. Filisitinu lé wo ga ma tuo wo, wo go diale nya Saaraim zi ta fɔɔ yé wo bɔ Gat valé Ékrɔn.

⁵³ Izraɛl lé nénu si Filisitinu zuo binna yé wo ’wii wolé sɔkɔnnu ta.

⁵⁴ David Filisiti mi ’wuo sia yé é goan Jérusalɛm, yé é Filisiti mi lé gulidanfɛnu pla élé sɔkɔn gi.

⁵⁵ Saul David ye aan wo gona Filisiti mi va, é lé sunyanu nwiinzan Abinɛɛ lɛ léé: Abinɛɛ, pɛniɛ ’ko a de be nyaa? Abinɛɛ a zi pa léé: O minwiinzan, i léli a é yuɛma weboen nya fɛan zo, maa ’ka gi dɔɔa lo.

⁵⁶ Minwiinzan léé: Bé ta laa, dé de be léé?

⁵⁷ Dé David si Filisiti mi gyɛna Abinɛɛ a si yé é da a nya Saul va. ’Té Filisiti mi ’wuo a David lee.

⁵⁸ Saul lé a lɛ léé: Pɛniɛ, de be lé i nyaa? Yé David a zi pa léé: Maa a i wuozan Bɛtléɛm mi Izai be nya.