1 Samuɛl 16 - Kazambale lé Sebe Sauunu 1979

Wo nyɔnɔ zén David nwiin

¹ Gakelebale lé Samuɛl lɛ léé: I dan daan lɛ Saul ma wuvɔle ma mɛ yi laa? An sɔn vɔ a ma, té é pla Izraɛl nwiin é ziin lo we gi. ’I nyɔnɔ fan ilé wibéli nya yé ’i go; mi lé é sɔ an lɛ léé, é kɛlɛ minwiinzan nya, maa a ye Bɛtléɛm mi Izai benu va, amalé maa dan i pa lɛ zia alé kɔn ’léé.

² Samuɛl léé: Maa go kaa? Saul é dan a ’ma lɛ yé é dan an gyɛ lɛ. Yé Gakelebale léé: ’I go diridané nya i lee yé i dan a fe lɛ léé: An da saraka bo lɛ Gakelebale lɛ.

³ I dan Izai laa lɛ saraka bona; we lé i dan a kɛlɛ lɛ, maa dan a gɔɔn lɛ i lɛ, yé mi lé maa dan a gɔɔn lɛ i lɛ, i dan nyɔnɔ zén lɛ a nwiin an lɛ.

⁴ We lé Gakelebale a fe Samuɛl lɛ é a kɛlɛ yé é go Bɛtléɛm. Fla mi segelenu da a va kana nya wo gi yé wo léé: I da ginanawe ɛ fe lɛɛ?

⁵ É a zi pa léé: Iin, an da saraka bo lɛ Gakelebale lɛ. ’Kabo kɛlɛ tegele yé ’ka da an va saraka bona. É lé Izai valé é benu lɛ léé, ’wo kɛlɛ tegele é ziin, yé é wo laa saraka bona.

⁶ Wo wɔra aan wo Samuɛl Éliab ye yé é lé é bli gi léé: Weboen lé, Gakelebale lé nyɔnɔzénnwiinzan lé ke an ’lɛ ’ko.

⁷ Gakelebale lé Samuɛl lɛ léé: Dé é a gɔné dɔbɛ gioo, dé é a grɔgrɔoo, té i bɔn‐in bɔrɔ ’bɛ ma lo, naa, an sɔn vɔ a ma. We lé é dɔ mi gi, é ’ka Gakelebale gi ’bɛ zo lo; fɛ lé mi a yé é yuɛ nya, yee lé é a naginian, naa, Gakelebale éé mi bli ɛ naginian.

⁸ Izai Abinadab laa, yé é a gié Samuɛl ’lɛ; yé Samuɛl léé: Gakelebale ’ka a ’kozan si lɛ a va é ziin lo.

⁹ Izai Saama gié; yé Samuɛl léé: Gakelebale ’ka a ’kozan si lɛ a va é ziin lo.

¹⁰ Izai é benu sɔrafié gié Samuɛl ’lɛ; yé Samuɛl lé Izai lɛ léé: Gakelebale ’ka wo va mi do kpen si lɛ a va lo.

¹¹ Yé Samuɛl lé Izai lɛ léé: I benu faa lé ke ’koo? Yé é léé: É vo a voélazan nya, naa, é a ’blanu tabinna. Yé Samuɛl lé Izai lɛ léé: ’I mi pa zia a laana, naa, ko ’ka dan nyana lɛ fɛ zi lo fɔɔ ’té é da é wo.

¹² Yé Izai mi pa zia a laana. Naa, é a fu yé a yuɛ a é zima yé a yara a é nɔnɔmi. Gakelebale lé Samuɛl lɛ léé: ’I nwa, ’i nyɔnɔ zén a nwiin, naa, yee lé sin bɛ.

¹³ Wibéli lé nyɔnɔ ke a gi, Samuɛl a si, yé é nyɔnɔ zén a nwiin a bwenu yuɛ va. É sia yi ’ko ma, Gakelebale Léli éé David kunwo yifaama. Samuɛl nwa yé é go Rama.

Léli naané da Saul va — David da Saul lé kɔn ’léé

¹⁴ Gakelebale Léli si Saul ta yé léli naané do lé Bale a pa zia, é nyané pa Saul ta.

¹⁵ Saul wuomunu lé é lɛ léé: Bé ye, Bale lé léli naané do a nyané pana i ta.

¹⁶ Kozan ’é we fe ma. I wuozannu a i ’lɛ ’ko. Wo dan kɔnɔgyɛzan gini lɛ; yé dé Bale lé léli naané do i kun, é dan kɔnɔ gyɛ lɛ, yé ’bɛ é dan i tɔrɔ paa lɛ.

¹⁷ Saul a zi pa é wuozannu lɛ léé: Mi lé é kɔnɔ gya é zua, ’ka a gini, ’ka da a nya an va.

¹⁸ A wuomunu va mi do léé: Bé ye, maa Bɛtléɛm mi Izai be do ye, yé é kɔnɔ gyɛle dɔɔ; é a mi plɛplɛ nya é ziin, nyanazan nya, gulidanzan nya, éé we fé é zima yé a yara a nɔnɔmi yé Gakelebale a a va.

¹⁹ Saul munu nwunvɔ Izai va a fele a lɛ we gi léé: I be David lé ke ’blanu va, bé pa an lɛ zia.

²⁰ Izai sokofale do si yé buru koo, wikɔlɛkuo do lé ke é fanle dɔrɔ nya koo, boligɔné koo, é wo pla a punu kɔné nya, yé é fɛ ’konu pa Saul lɛ zia é be David lee.

²¹ David da Saul va, yé ébo gɔɔn a lɛ, yé é sɔ Saul lɛ é baba, yé é a kɛlɛ élé gulidanfɛnu kɔné sizan nya.

²² Saul we pa Izai lɛ zia léé: Ilé zanté, ’i David vo an va, naa, é sɔ an lɛ.

²³ Yé dé Bale lé léli a Saul ta David éé kɔnɔ sian, ’té éé a gya; yé Saul é vo drɔɔ yé a fila é vɔ yé léli naané é si Saul va.