1 Samuɛl 15 - Kazambale lé Sebe Sauunu 1979

Saul guli dan Amalɛk munu va

¹ Samuɛl lé Saul lɛ léé: Maa lé, Gakelebale an nwunvɔ nyɔnɔ zénle i nwiin i kɛlɛle alé munu, Izraɛl munu nwiinzan blɛn nya we gi, amalé ’i tɔné dɔ Gakelebale dére lɛ.

² Lai sunyanu lé Gakelebale léma: We lé Amalɛk a kɛlɛ Izraɛl lɛ a sile Éjipiti bléyi va, zi dɔle nya a ’lɛ, a sele a an gi.

³ ’I go sin, ’i guli dan Amalɛk va yé ’i alé fɛnu faa sɛrɛ; té i wo do kpen vo lo; gɔnénu valé lomu koo, nénu valé nyɔmanénu koo, dirinu valé ’blanu koo, nyɔgɔménu valé sokofalenu koo, ’ka bale pa wo ma, ’ka wo faa gyɛ.

⁴ Saul munu laa yé é wo nagini Télaim; ganelamunu a mi baa yɔ soru yé Juda munu a mi baa soru.

⁵ Saul tawo fɔɔ yé é bɔ Amalɛk lé fla, yé é zidɔmunu dɔ wo ’lɛ gɔnu worona.

⁶ É lé Kéni munu lɛ léé: ’Ka si Amalɛknu méléna, ’ka go, té ka zamaga wo wo nya lo we gi; naa, ka wezin kɛlɛ Izraɛl lé nénu lɛ, wo sile Éjipiti bléyi va. Yé Kéni munu si Amalɛk méléna.

⁷ Saul lé guli bɛ mini Amalɛknu lɛ, é sia Avila fɔɔ yé é bɔ Sure lé ke Éjipiti yara, ana.

⁸ É Amalɛk nwiinzan Agaga si é yuɛma yé é munu faa gyɛ tata gwɔun nya.

⁹ Naa, Agaga koo, ’bla zimanu koo, dirigɔné zimanu koo, wi zinnu koo, ’blané nyɔnɔzannu koo, fɛnu faa lé ke é zima koo, Saul valé munu wo tadɔ, wo ’ka a va léé, wa sɛrɛ lo, naa, serelebomafɛnu valé fɛ naane saa lé wa sɛrɛ.

Saul Bale lɛgama

¹⁰ Gakelebale we fe Samuɛl lɛ, yé é lé a lɛ léé:

¹¹ Saul diéra an zuo, yé é ’ka tawoo an dére ta lo, amalé an bli nɔla a dɔle minwiinzan nya we ma. Samuɛl bli kyɛ dɔ yé é tu kini wuvɔle nya Gakelebale lɛ.

¹² É nwa bladi tutu, gole Saul va we gi. Yé wo da a fe lɛ a lɛ léé: Saul go Kaamɛl yé bé ye, é é seledɔmigifɛ dɔ; ’bɛ zuo é nɔla yé é gié yé é go Gilgal.

¹³ Samuɛl go Saul va yé Saul lé a lɛ léé: Gakelebale ’é i drɔɔ vo ma. Maa Gakelebale dére tawe kɛlɛ.

¹⁴ Samuɛl léé: Dé é a ’bɛ zo ’naan, ’blanu wele lé éé wɔraan an tɔné gi, ’bɛ valé diri wele lé maa a maan, ’bɛ gi lé nɔɔ?

¹⁵ Saul a zi pa léé: Munu si wo nya Amalɛk munu va; ’blanu valé dirinu lé ke é zima é mini ’wo bɔlunu ta, munu wo tadɔ, saraka bole we gi Gakelebale, ilé Bale lɛ; yé ko a pɔnénu gyɛ.

¹⁶ Samuɛl lé Saul lɛ léé: ’I dɔ, yé we lé Gakelebale a fe an lɛ kyɔ é béli, yé maa a fe i lɛ. Yé Saul lé a lɛ léé: Bé fe.

¹⁷ Samuɛl léé: Bléyian va lé i ke kiéné ibo yuɛ gi, i ’ka kinin lɛ Izraɛl bɛnnu nwiinzan nya loo? Gakelebale ’ka nyɔnɔ zén lɛ i nwiin i kɛlɛle Izraɛl nwiinzan nya we gi loo?

¹⁸ Gakelebale i pa zia a fele nya léé: ’I go, yé wenyanékɛlɛmunu ’ko, Amalɛknu, ’i wo gyɛ; ’i guli dan wo va fɔɔ yé i wo faa gyɛ tatata.

¹⁹ Mɛmalé i ’ka i tɔné dɔ lɛ Gakelebale dére lɛ loo? Mɛmalé i ’wii gulizarafɛnu ta yé i Gakelebale ’namawe kɛlɛɛ?

²⁰ Saul a zi pa Samuɛl lɛ léé: An tɔné dɔ Gakelebale dére lɛ é zima, yé zi lé Gakelebale a gɔɔn an lɛ, maa a ta tawo. An da Amalɛknu nwiinzan Agaga nya yé an Amalɛk munu faa gyɛ;

²¹ naa, munu ’blanu valé dirinu si gulizarafɛnu va, fɛnu lé wa nɔ Bale lɛ, alé fɛ vininnu nya saraka bole we gi Gakelebale, ilé Bale lɛ, Gilgal.

²² Samuɛl léé: Balebanwe kyɛblele valé sarakanu bole éé sɔa Gakelebale lɛ bélé tawole Gakelebale dére ta zoo? Bé ye, lɛdɔmale fila vɔ é mini saraka bole ta, yé a dére ta tawole fila vɔ é mini ’blagɔné nyɔnɔ ta.

²³ Naa, lɛgamale a bélé ’moné dɔle zo, yé dɔle mi ma plɛplɛ a bélé yobanle valé miyilinu zo. I sɔn vɔ Gakelebale dére ma, amalé é sɔn vɔ i kɛlɛle minwiinzan nya ma é ziin.

²⁴ Yé Saul lé Samuɛl lɛ léé: An Gakelebale lé bélidɔwe sɛrɛ yé an ’ka i dére lɛdɔ lɛ a ma lo amalé maa wenyané kɛlɛ; an kana munu lee yé an tɔné dɔ wo dére lɛ.

²⁵ Sin, ilé zanté, ’i an ma we vo, ’i da an va é ziin yé an dan dia lɛ an bli la Gakelebale ’lɛ.

²⁶ Samuɛl lé Saul lɛ léé: I sɔn vɔ Gakelebale dére ma, yé Gakelebale sɔn vɔ i ma, té i kɛlɛ Izraɛl nwiinzan nya é dɛrɛ lo we gi, amalé an ’ka dan go lɛ i va lo.

²⁷ Yé Samuɛl é nwun zi dɔ a ta yé é a gona aan wo, Saul alé sɔ kun é lɔlu ma, yé é fia.

²⁸ Samuɛl lé a lɛ léé: Gakelebale i kɛlɛle Izraɛl nwiinzan nya se si i lee kyɔ yé é a nɔ mi bɛ lé ’bɛ ke é zima é mini bii ta, a lɛ.

²⁹ Mi lé é ke Izraɛl lé plɛplɛ nya, é ’ka vié woo lo yé a bli ’ka nɔlaan lo, é ’ka mi nya yé a bli éé nɔlaan lo, azama.

³⁰ Saul lé é ziin léé: An wenyané kɛlɛ! Sin, ilé zanté, ’i an lɛdɔma anlé munu lé mi segelenu yuɛ va, Izraɛl yuɛ va; ’i da an va é ziin yé maa dan dia lɛ an yara Gakelebale ilé Bale ’lɛ.

³¹ Samuɛl nɔla yé é go Saul zuo yé Saul dia é bli la Gakelebale ’lɛ.

³² ’Bɛ zuo Samuɛl léé: ’Ka da Amalɛk munu nwiinzan Agaga nya an lɛ. Yé Agaga bié a va gi nanale nya, naa, é a fena é bli gi léé: Weboen lé, ga nyanale si an ’léé sin.

³³ Samuɛl léé: Ilé gwɔun nénu si lomu lee fɛan zo, a zo duo lé i bu é dan vuru lɛ é be ma lomu méléna. Yé Samuɛl Agaga bɔi é kuru nya Gakelebale ’lɛ, Gilgal.

³⁴ Samuɛl Rama zi sia, yé Saul go élé Gibéa, élé kɔn ’léé.

³⁵ Samuɛl ’ka go lɛ we lɛ Saul va é dɛrɛ lo fɔɔ yé a gayi bɔ a zo; naa, Gakelebale é bli nɔla Saul kɛlɛle Izraɛlnu nwiinzan blɛn nya ma, amalé Samuɛl Saul ma wuvɔ.