1 Samuɛl 14 - Kazambale lé Sebe Sauunu 1979

Nyanazan Jonatan

¹ Yi do nya Saul be Jonatan lé pɛniɛ lé é alé gulidanfɛnu kɔné sié, a lɛ léé: ’I da, ’ko go Filisitinu lé gulimabɛnna lé ke mun zia bɛ, ana. Yé é ’ka we do kpen fe lɛ é ti lɛ lo.

² Saul a Gibéa glɛ mun ta, Migrɔn lé grénadéyili wuo, yé a vamunu woo mi wuru yaa bɔa.

³ Éli lé ke Gakelebale banzan nya Silo, a be Finé be I‐Kabɔd bwe Akitub be Akija, yee ɛ ke balebanzan nya ’bɛ bléyi va, a ta lé éfɔdi ke. Munu ’ka a gi dɔɔ lɛ léé, Jonatan go lo.

⁴ Giénanu lé Jonatan a kwa kulina léé, é gié ana yé é bɔ Filisitinu lé gulimabɛnna, fɛna do ana, gɔlɛ ganzan nana do a a bɛ do la, yé gɔlɛ ganzan nana do a a bɛ koɛ la, wa do laama Bosɛt yé wa koɛ laama Séné.

⁵ A do a yirinwana bɛbolazia Mikimas yara, yé a do a yirinwana bɛyilazia Géba yara.

⁶ Jonatan lé pɛniɛ lé éé alé gulidanfɛnu kɔné sié, a lɛ léé: ’I da ’ko go fɔɔ yé ko bɔ ganedɔlozannu ’konu lé gulimabɛnna. Dé Gakelebale é dan pa lɛ ko vaa? Naa, dé munu a kiɛreoo, dé munu ’ka kiɛre looo, Gakelebale é bɔalɛ yé é munu si we gi wo nya.

⁷ Jonatan lé gulidanfɛnu kɔné sizan lé a lɛ léé: Dé wean sɔ i lɛ, bé kɛlɛ, dé fɛana sɔ i lɛ, ’i go ana. Dé i go fɛofɛana, maa go i zuo.

⁸ Jonatan léé: Eɛ, ’ko go munu ’konu va yé kobo nagɔɔn wo lɛ.

⁹ Dé wa fe léé: ’Ka dɔ bɛ fɔɔ yé ko go ka va, ’té ko vo ko pa gi, té ko go wo va lo.

¹⁰ Naa, dé wa fe léé: ’Ka da ko va, ’té Gakelebale wo pa ko lee, amalé ko dan go lɛ wo va. ’Bɛ é dan kɛlɛ lɛ tɔmase nya ko lɛ.

¹¹ Wo fiénu wobo ta bɔra Filisitinu lé gulimabɛnna yé Filisitinu léé: Ka yua, Ébrunu bɔra wo yɔɔna gurunu gi.

¹² Yé gulimabɛnna munu lé Jonatan valé élé gulidanfɛnu kɔné sizan lɛ léé: ’Ka da loru ko va, yé ko we do nagɔɔn ka lɛ. Jonatan lé élé gulidanfɛnu kɔné sizan lɛ léé: ’I da an zuo, naa Gakelebale wo pa Izraɛl lee.

¹³ Yé Jonatan gɔ gié é bli la, yé alé gulidanfɛnu kɔné sizan go a zuo. Jonatan go wo diale nya yé alé gulidanfɛnu kɔné sizan go wo gyɛle nya a zuo.

¹⁴ Wo kelele pélisiale ’ko, Jonatan valé élé gulidanfɛnu kɔné sizan mi yɔ do gyɛ fɛana, ana é bɔalɛ é tuabuféi san do bɔ.

¹⁵ Kana zén sunyanu koo, ana tɛrɛlamunu koo, Filisitinu faa koo, wo gi. Gulimabɛnna munu valé ’wii mi ta munu é ziin, kana zén wo gi yé di kini ana tɛrɛ la munu gi. É a bélé Bale lé kana lé.

Wo Filisitinu gyɛ guli nya

¹⁶ Saul a Gibéa Bɛnjamɛn tɛrɛ la, yé alé fɛtagini munu a ye léé: Filisitinu gu kini ékema yé wo go bɛ fié la.

¹⁷ Yé Saul lé é vamunu lɛ léé: ’Ka munu nɔnɔ, dé mi kyɛɛn si ko vaa? Wa nɔnɔ yé Jonatan valé élé gulidanfɛnu kɔné sizan ’ka ana lo.

¹⁸ Yé Saul lé Akija lɛ léé: ’I Bale lé kɛsu bié. (Naa, ’bɛ bléyi va, ’té Bale lé kɛsu a Izraɛl lé nénu va.)

¹⁹ Saul a we fena Balebanzan lɛ bléyian va, Filisitinu lé gulimabɛnna vun wele gi go gyɛle nya, yé Saul lé Balebanzan lɛ léé: ’I bɛ si ana.

²⁰ ’Bɛ zuo Saul valé é vamunu faa zén ékeva yé wo go wo ’lɛ fɔɔ yé wo bɔ gulidanna; yé bé ye, Filisitinu gwɔun so a gi ’wo ke ma; wo bɔ gyɛ.

²¹ ’Bɛ ta loru, Ébrunu lé ke Filisitinu wuo é kyɛn, yé wo go wo va gulimabɛnna, wo nɔla sin yé wo pa Izraɛl munu lé wo ke Saul valé Jonatan va, wo va.

²² Izraɛl munu faa lé wo ke é yɔɔle Éfraim gɔ ma, wa ’ma aan wo léé, Filisitinu a vlan buruna, wo é ziin wo wo zuo bin gulidanna.

²³ Gakelebale Izraɛl si we gi ’bɛ yi nya yé wo go guli danle nya fɔɔ Bɛt‐Avan zi.

Jonatan bale ’nyɔɔle sɔnné sɛrɛ

²⁴ ’Bɛ yi nya Izraɛl munu wɔlɛ gi nyaa ’wo ma. Saul lé kɔɔn munu lɛ léé, ’wo bale ’nyɔɔn léé, mi lé é fɛ ble yiri vɔle ’lɛ, ’té maa ’ka tan we lɛgi pa lɛ an nyanézannu ma lo, ’wo bale pa a ma ma. Yé mi do kpen ’ka fɛ ble lɛ lo.

²⁵ Munu faa bɔ pɔrɔ gi, fɛ lé zɔrɔnyɔnɔ ke ana tɛrɛ va, ana.

²⁶ Munu wɔra pɔrɔ gi aan wo, wo zɔrɔnyɔnɔ ye yorona; munu kana bale ’nyɔɔnle lee, amalé mi do kpen ’ka é bɛ wo lɛ é ’léé lo.

²⁷ Bale ’nyɔɔnle lé Saul a fe munu lɛ, é kɛlɛ Jonatan ma trɔnné va; yé yili lé ke a lee, é a lɔlu zua zɔrɔnyɔnɔ va yé é a wɔra é ’léé; yé a yuɛ fuo.

²⁸ Yé munu va mi do we fe a lɛ léé: I ti léé, munu ’é bale ’nyɔɔn, a fele nya léé, mi lé é fɛ ble kyɔ ’wo bale pa a ma ma. Naa, munu wɔlɛ gi nyaa ’wo ma tata.

²⁹ Yé Jonatan léé: An ti munu saan. Ka ye, an zɔrɔnyɔnɔ ’ko lɛdan yé an yuɛ fuo fɛan zo, ka ye do.

³⁰ Weboen lé, zarafɛ lé munu a ye ’wo nyanézannu va, dé munu a ble kyɔ ’naan, ’té Filisitinu kelele ’ka kɛla kɔɔn blɛɛn loo?

³¹ ’Bɛ yi ’ko nya wo Filisitinu gyɛ, é sia Mikimas fɔɔ yé é bɔ Ajalɔn. Munu wɔlɛ gi nyaa ’wo ma é baba

³² yé wo ’wii zarafɛnu ta. ’Blanu koo, dirigɔnénu koo, dirinénu koo, wo wo bɔrɔ bo tɛrɛ va yé wo wo ble wo nyɛ nya é gi.

³³ Wa zuo fe Saul lɛ yé wo léé: Bé ye, munu a wenyané kɛlɛna Gakelebale ma nyɛ blele nya. Saul léé: Ka wenyané kɛlɛ; ’ka gɔlɛ blɛn do burula an va ’ko é nya do.

³⁴ ’Bɛ zuo é léé: ’Ka nwɛɛn munu méléna, ’ka fe wo faa do do lɛ léé, dé wolé dirigɔné léé, dé wolé ’bla léé, ’wo da a nya an va yé maa a bɔrɔ bo ’ko. ’Bɛ zuo ka dan fɛ ble lɛ yé ka ’ka dan wenyané kɛlɛ lɛ Gakelebale ma wi blele é nyɛ nya é gi lo. ’Bɛ béli mi faa do do da élé dirigɔné nya, a bɔrɔ bole gɔlɛ ta we gi.

³⁵ Saul Gakelebale banna kɛlɛ; é a balebanna vininzan lé é a kɛlɛ Gakelebale lɛ, a nya.

³⁶ Saul léé: Kaa zun é béli ’ko Filisitinu zuo, kaa tu kini wolé fɛnu sile nya, té kaa wo do kpen vo é yuɛma lo. Munu léé: Dé bé ye é zima fɛan zo, bé kɛlɛ. Yé Balebanzan léé: Kaa bié Bale va ’ko.

³⁷ Yé Saul a laa Bale lee léé: Maa go Filisitinu zuoo? I dan wo pa lɛ Izraɛlnu lee? Naa, é ’ka a zi pa lɛ a lɛ bléyi ’ko nya lo.

³⁸ Saul léé: ’Kaa minwiinmunu, ’ka faa bié ’ko; ka nagini, dé mɛ wenyané lé wa kɛlɛ kyɔɔ?

³⁹ Izraɛl siwegizan Gakelebale a é yuɛma, dé é a an be Jonatan nyaoo, é dan ga lɛ. Yé munu va mi do kpen ’ka a zi pa lɛ a lɛ lo.

⁴⁰ É lé Izraɛl faa lɛ léé: ’Ka dɔ bɛ do la, yé maa valé an be Jonatan, ko dɔ bɛ do la. Yé munu lé Saul lɛ léé: Bé ye é zima fɛan zo, bé kɛlɛ.

⁴¹ Saul lé Gakelebale lɛ léé: Izraɛl lé Bale, ’i webozen nagɔɔn. ’Munnu Jonatan valé Saul nagɔɔn yé ’munnu ’ka a gyɛ lɛ mi bɛ tɔ nya lo.

⁴² Saul léé: ’Ka ’munnu zun maa valé an be Jonatan ma. Yé ’munnu Jonatan nagɔɔn.

⁴³ Saul lé Jonatan lɛ léé: We lé bé kɛlɛ, bé fe an lɛ. Jonatan a fe a lɛ yé é léé: Maa zɔrɔnyɔnɔ kiéné lɛdan yili lé ke an lee, a lɔlu nya. Maa lo, an dan ga lɛ.

⁴⁴ Yé Saul léé: Jonatan, dé i ’ka gaan lo, Bale ’é we kɛlɛ an lɛ élé plɛplɛ faa nya ma.

⁴⁵ Munu lé Saul lɛ léé: Jonatan lé é Izraɛl si we blɛn gi ’naan, yee ɛ gaan? Monomono lo! Gakelebale a é yuɛma. Yee valé Bale we kɛlɛ ékeva kyɔ, amalé a nwin gɔ do kpen ’ka dan dia lɛ tɛrɛ va lo. ’Bɛ zo lé munu Jonatan béli yé é ’ka ga lɛ lo.

⁴⁶ Saul daan Filisitinu zuo binle ma yé Filisitinu go ’wo va.

Saul plale munu nwiin

⁴⁷ Saul plale Izraɛl nwiin lɛ sɔɔ aan wo, é guli dan é nyanézannu faa va, é zi fɛfaana, Moab koo, Amɔnnu koo, Édom koo, Soba nwiinzannu koo, Filisitinu koo, woo lé; dé é yara dɔ fɛana, guliwuo vo a lɛ.

⁴⁸ Élé plɛplɛ nagɔɔn, é Amalɛk kele, yé munu lé wo ’wiié Izraɛlnu ta, é Izraɛlnu si wo lee.

⁴⁹ Saul benu a Jonatan koo, Jisivi koo, Malkisua koo, wo nya. A lu a fié; wa vininzan laama Mérab yé wa zuan laama Mikal.

⁵⁰ Wo Saul na tɔ laama Akimaas lu Akinoam. Alé sunyanu nwiinzan lé ke a ti bwe Nɛɛ be Abinɛɛ nya.

⁵¹ Saul ti Kis valé Abinɛɛ ti Nɛɛ wa Abiél benu nya.

⁵² Guli vo ’wo valé Filisitinu méléna Saul lé tɛrɛ la faa gi; yé dé Saul gɔné plɛplɛ nyanazan ye tɔɔn, éé a sié ’é wuozan nya.