1 Samuɛl 13 - Kazambale lé Sebe Sauunu 1979

Wo guli dan Filisitinu va

¹ Saul pla Izraɛl nwiin lɛɛ do; a plale wo nwiin lɛɛ fiézan nya

² é Izraɛl munu si a va mi baa do wuru soru; mi baa do a yee ɛ va Mikimas valé Bétɛl gɔ nwiin yé mi wuru soru a Jonatan va Gibéa, Bɛnjamɛn tɛrɛ la. É mi pɔnénu pa zia wolé sɔkɔn ’léé do do.

³ Filisitinu sunyanu palu do lé ke Géba, Jonatan bɛ mini wo lɛ, yé Filisitinu a ’ma. Saul léé, ’wo béli fɛn tɛrɛ faa la, a fele nya léé: Ébrunu, ’ka tɔné dɔ ma.

⁴ Izraɛl faa a ’ma léé, wa fena léé, Saul lé guli bɛ dia Filisitinu sunya palu do ta, yé Izraɛl gin dɔ Filisitinu nyé gi. Yé wo munu laa léé, ’wo go Saul va Gilgal.

⁵ Filisitinu zén ékeva gulidanle we gi Izraɛl va. Goro wuru soru valé wisootazannu baa yaa a wo lee, yé munu ’ko wa bélé nyéné lé ke wɛyi gɔɔn ma kiɛre yé wo ’ka bɔa a nɔnɔle lɛ lo, a zo. Wo da wolé sɔkɔn dɔ lɛ Mikimas, Bɛt‐Avan yirinwanazia.

⁶ Wo wo tunu yé Izraɛl munu a ye léé, guli bɛ mini wo lɛ, yé wo yɔɔ gɔmagurunu gi koo, yilinénu kwɛɛ gi koo, gɔlɛnu méléna koo, zéiinnu gi koo, ’yigurunu gi koo, wona.

⁷ Ébru mi kenu é ziin wo Juudɛn kini gole we gi Gad valé Galaad tɛrɛ la. Saul a tan Gilgal, yé a vamunu faa ma nyɔɔn.

⁸ Saul Samuɛl lɛbɛn yi sɔrafié, Samuɛl a fe fɛan zo, a zo. Naa, Samuɛl ’ka da lɛ Gilgal lo yé munu kini ékema yé wo si Saul ma baa.

⁹ Yé Saul léé: ’Ka da balebanwi lé wa kyɛ blé, a nya an lɛ, yee valé bɔvɔ sarakabofɛnu nya. Yé é balebanwi kyɛ ble.

¹⁰ É nyaa a kyɛ blele nya aan wo, Samuɛl da, yé Saul bɔra wele we gi a va.

¹¹ Samuɛl léé: Mɛ lé bé ’lɛrɛ bɛɛ? Saul a zi pa léé: Maa ye aan wo léé, munu a sina an va, yé i ’ka dana, yi lé bé dɔ, a nya lo, yé Filisitinu a é zénle ékeva Mikimas,

¹² maa lé anbo lɛ léé: Filisitinu é dan da lɛ an va Gilgal yé maa ’ka tan bazoro lɛ Gakelebale lɛ lo. Ana lé anbo tunu yé maa balebanwi kyɛ ble.

¹³ Samuɛl lé Saul lɛ léé: Bé kɛlɛ ’tu nya; we lé Gakelebale, ilé Bale a fe i lɛ, i ’ka a kɛlɛ lɛ lo. Dé bé lɛdɔma kɔɔn, Gakelebale ’kanɔ i plale Izraɛl nwiin glɛ dɔa lo,

¹⁴ naa, sin, i plale wo nwiin ’ka dan mɔn lɛ lo. Mi do lé é sɔ Gakelebale lɛ a bli gi, é a si a va, yé Gakelebale a dɔ élé munu nwiinzan nya; we lé Gakelebale a fe i lɛ, i ’ka a kɛlɛ lɛ lo, azama.

¹⁵ ’Bɛ zuo, Samuɛl nwa yé é si Gilgal yé é go Gibéa, Bɛnjamɛn tɛrɛ la. Saul é vamunu nɔnɔ; wo mi wuru yaa bɔa.

¹⁶ Saul koo, a be Jonatan koo, wo vamunu koo, wa Géba, Bɛnjamɛn tɛrɛ la, yé Filisitinu a Mikimas.

¹⁷ Mi palu yaa si Filisitinu nyanana fɛnu sile gla nya we gi; a do Ofra zi sia Sual tɛrɛ la zia;

¹⁸ a do Bɛt‐Orɔn zi sia; tɛrɛ glɛ la zi lé ke Séboim yara, nyéné saa lé fɛna bɛ do la, a palu yaazan ’bɛ zi sia.

¹⁹ Folibozan do kpen ’ka Izraɛl tɛrɛ faa la lo; naa, Filisitinu léé: ’Ko gwɔun valé din folile yi ga Ébrunu lee.

^20-21 Lialianu koo, gwanénu koo, zaanu koo, lialianénu koo, dé wo kɛlɛ é tuntun, Izraɛl munu faa do do é go wo nya Filisitinu va, wolé fle koo, wolé gwané koo, wolé bli sia foliɛwɔlɛ koo, wolé zaa koo, wo ’lɛ gyɛle we gi, ’bɛ valé foroné ’lɛ ma bole we gi.

²² ’Bɛ lé we ma lé gulidanyi nya, dé é a gwɔun nyaoo, dé é a din nyaoo, a do kpen ’ka Saul valé Jonatan va mi do lee lo; wa Saul valé é be Jonatan ɛ lee.

²³ Yé Filisitinu lé sunyanu palu do da yé wo nyana kli Mikimas lé zi prɔɔné ’léé.