1 Samuɛl 12 - Kazambale lé Sebe Sauunu 1979

Samuɛl dére vo élazan

¹ Samuɛl lé Izraɛl faa lɛ léé: Bé ye, we faa lé ka a fe an lɛ, maa an tɔné dɔ ka lɛ yé maa ka nwiinzan blɛn dɔ.

² Yé sin, ka nwiinzan blɛn lé é dan tawo lɛ ka ’lɛ, yee lo. Dé é a maa nya, maa a é kwa yé an nwana fuola yé an benu a ka va; maa tawo ka ’lɛ, é sia an kiéné bléyi va fɔɔ kyɔ yi nya.

³ Maa lo. ’Maa an ma we fe Gakelebale valé alé nyɔnɔzénnwiinzan yara. Maa mi kyɛn lé dirigɔné sii? Maa mi kyɛn lé sokofale sii? Maa nyané pa mi kyɛn ta, yé maa we tɔntɔn kɛlɛ mi kyɛn lɛɛ? Maa blɛfɛ si mi kyɛn lee, an dɔle a zuo we gii? Maa dan a lɛgi nɔ lɛ.

⁴ Wa zi pa léé: I ’ka nyané pa lɛ ko ta lo, yé i ’ka we tɔntɔn kɛlɛ lɛ ko lɛ lo, yé i ’ka fɛ do kpen si lɛ mi do lee lo.

⁵ É lé wo lɛ é ziin léé: Gakelebale a wenayezan nya yé alé nyɔnɔzénnwiinzan a wenayezan nya kyɔ léé, ka ’ka kalé fɛ ye lɛ an lee lo. Wa zi pa léé: Iin, wana wenayezannu nya.

⁶ Yé Samuɛl lé munu lɛ léé: Gakelebale ɛ Moizi valé Arɔn dɔ gligli yé é ko tinu si Éjipiti tɛrɛ la.

⁷ Sin, ’ka dɔ bɛ, yé we zin faa lé Gakelebale a kɛlɛ ka valé ka tinu lɛ, maa dan a zuo fe lɛ ka lɛ Gakelebale ’lɛ.

⁸ Jakɔb dale Éjipiti tɛrɛ la zuo, ka tinu siaa Gakelebale lɛ, yé Gakelebale Moizi valé Arɔn pa zia yé wo ka tinu si Éjipiti tɛrɛ la yé wo wo nyana fɛkona.

⁹ Naa, wo gi san Gakelebale wolé Bale ma; yé é wo dan Asɔɔ sunyanu nwiinzan Sizéra koo, Filisitinu koo, Moab nwiinzan koo, wo lee, yé wo guli dan wo nya.

¹⁰ Wo siaa é ziin Gakelebale lɛ yé wo léé: Ko Gakelebale vo yé ko Baalnu valé Asataténu bɔ, amalé ko wenyané kɛlɛ; sin, ’i ko si ko nyanézannu lee, yé ko dan i bɔ lɛ.

¹¹ Yé Jérubaal koo, Bédan koo, Jɛfeté koo, Samuɛl koo, Gakelebale wo pa zia, yé é ka si ka nyanézannu lee yé ka vo drɔɔ.

¹² ’Bɛ zuo, ka a ye léé, Amɔnnu minwiinzan Nakas da ka ma yé ka lé an lɛ léé: Gba, naa, mi do é dan pla lɛ ko nwiin, dɔlé ’té Gakelebale, kalé Bale a ka nwiinzan nya.

¹³ Amalé ka nwiinzan lé ka a si a va, ka nwiinzan lé ka a ma laa, yee lo; ka ye, Gakelebale ka nwiinzan dɔ.

¹⁴ Dé ka kana Gakelebale lee, dé ka a bɔ, dé ka a dére lɛdɔma, dé ka ’ka ka tɔné gi kɛlɛ lɛ plɛplɛ Gakelebale dére ma lo, ka dan yere lɛ Gakelebale, kalé Bale ma, ka valé ka nwiinzan nya.

¹⁵ Naa, dé ka ’ka Gakelebale dére lɛdɔ lɛ a ma lo, dé ka sɔn vɔ Gakelebale dére ma, Gakelebale bɛ é dan kɛlɛ lɛ ka ma, é kɛlɛ ka tinu ma fɛan zo, a zo.

¹⁶ ’Ka lɛbɛn é ziin ’ko, yé we blɛnblɛn lé Gakelebale é dan kɛlɛ lɛ ka yuɛ va yé ka a ye.

¹⁷ Buruwɔlɛ gyɛbléyian ke ’ko loo? Maa dan Gakelebale laa lɛ yé é dan zagelenu ban lɛ yé é lɛɛ pa zia, kalé a gi dɔɔle we gi léé, ka wenyané kɛlɛ Gakelebale ma ka nwiinzan ma laale nya.

¹⁸ Samuɛl Gakelebale laa, yé Gakelebale zagelenu ban yé é lɛɛ pa zia ’bɛ yi duo nya. Munu faa kana Gakelebale valé Samuɛl lee é baba.

¹⁹ Munu faa lé Samuɛl lɛ léé: ’I bazoro Gakelebale, ilé Bale lɛ i wuozannu lé we ma, té ko ga lo we gi; naa, ko kolé wenyanénu taa pa ko nwiinzan ma laale nya.

²⁰ Samuɛl lé munu lɛ léé: Té ka kana lo. Weboen lé, ka wenyané kɛlɛ; naa, té ka diéra Gakelebale zuo lo, ’ka a bɔ ka bli faa nya;

²¹ té ka diéra lo; dé ’bɛ kaan lo ka dan go lɛ boafɛnu zuo, ’té wo tɔnɔ ’ka lo yé wo ’ka ka sié we gi lo; wa boafɛnu nya, azama.

²² É a Gakelebale gi léé, é ka kɛlɛ élé munu nya, amalé é ’ka dan élé munu vo lɛ wo saa lo, a tɔ blɛn lé we ma.

²³ Yé dé maa daan bazorole ma ka zuo ’té ma wenyané kɛlɛ. Té maa ’bɛ zo wenyané kɛlɛ lo ma. Maa dan zi drɔle valé zi zima gɔɔn lɛ ka lɛ.

²⁴ Naa, ’ka kana Gakelebale lee ma, yé ’ka a bɔ tɔnégidrɔɔ valé ka bli faa nya ma; we plɛplɛ lé é a kɛlɛ ka méléna, ka a yé loo?

²⁵ Dé ka wenaané kɛlɛ, ka dan zamaga wo lɛ, ka valé ka nwiinzan blɛn nya.