1 Samuɛl 11 - Kazambale lé Sebe Sauunu 1979

Saul Amɔn munu kele

¹ Amɔn mi Nakas da Jabɛs mabɛn lɛ Galaad tɛrɛ la. Jabɛs munu faa lé Nakas lɛ léé: ’I gi pa do ko va yé ko pla i wuo.

² Naa, Amɔn mi Nakas a zi pa wo lɛ léé: Wean ta lé kaa gi paan do, yee lo; dé ka nyi si yé maa ka faa bɛyila yuɛnu so yé é kɛlɛ yaraɛwe nya Izraɛl faa ma, ’té é nyaa.

³ Jabɛs mi segelenu lé a lɛ léé: ’I yi sɔrafié nɔ ko lɛ yé ko munu nwunvɔ Izraɛl tɛrɛ faa la; yé dé ko bɔvazan ’ka lo, ’té kobo nɔ i lɛ.

⁴ Nwunvɔzannu bɔ Saul lé Gibéa yé wo we ’konu fe munu lɛ. Yé munu faa siaa wu nya.

⁵ Yé bé ye, Saul valé élé dirigɔnénu si féi, ’té é a wo zuo, yé é léé: Mɛ ɛ kɛlɛ munu lɛ yé woo wuvɔaa? We lé Jabɛs munu a fe, wa zuo fe a lɛ.

⁶ Saul we ’konu ’ma tɔɔn, Bale Léli a kun yé a bli fli é baba.

⁷ É dirigɔné fié si yé é wo wi bɔi woléwoléné, yé é wo pa zia Izraɛl tɛrɛ faa la nwunvɔzannu lee, a fele nya léé: Dé miomian ’ka da lɛ Saul valé Samuɛl zuo lo, wo dan alé dirigɔnénu kɛlɛ lɛ ’ko zo. Gakelebale lé kana zén munu gi yé wo zi sia bélé mi do zo.

⁸ Saul wo nɔnɔ Bézɛk; Izraɛl lé nénu a mi baa yɔ sɔrafié wɔlɛ vu, yé Juda munu a mi baa vu ta soru.

⁹ Nwunvɔzannu lé wo da wo va, wo lé ’bɛnu lɛ léé: ’Ka fe Jabɛs‐Galaad munu lɛ léé: Tɛlɛ, dé yiri a plɛplɛ, ka dan ka bɔavazannu ye lɛ. Nwunvɔzannu we ’ko fe Jabɛs munu lɛ, yé wo gi nana

¹⁰ yé wo lé Amɔn munu lɛ léé: Tɛlɛ, ko dan da lɛ ka va yé dé wean sɔ ka lɛ, ’ka kɛlɛ ko lɛ.

¹¹ ’Bɛ é tu kini Saul munu guli palu yaa nya. Wo wɔra Amɔn munu lé sɔkɔn dɔna tu kini bléyi va yé wo wo gyɛ fɔɔ yé yiri siéla. Munu lé wo so wo lee, wo fwila, yé mi fié ’ka vo lɛ ékeva lo.

¹² Munu lé Samuɛl lɛ léé: Mi kyɛnnu ɛ fe yi la léé: Mɛmalé Saul éé plaan ko nwiin? ’Ka munu ’ko nɔ ko lɛ, ko wo gyɛ.

¹³ Naa, Saul léé: Wo ’ka dan mi do kpen gyɛ lɛ kyɔ lo, Gakelebale Izraɛl si we gi kyɔ, azama.

¹⁴ Samuɛl lé munu lɛ léé: ’Ka da, kaa go Gilgal, plale mi nwiin dɔle gligli we gi ’bɛna.

¹⁵ Munu faa go Gilgal yé wo Saul dɔ minwiinzan nya Gakelebale ’lɛ, Gilgal. Wo bɔvɔ sarakanu bo Gakelebale lɛ ’bɛna; yé ’bɛna lé Saul valé Izraɛl munu faa wobo nɔ gi nanale baba lɛ.