1 Samuɛl 10 - Kazambale lé Sebe Sauunu 1979

¹ Samuɛl nyɔnɔ kuoné si yé é a zén Saul nwiin. É pwɛpwɛ vɔ a ma yé é léé: Gakelebale ’ka nyɔnɔ zén lɛ i nwiin i plale alé munu nwiin we ma loo?

² Kyɔ, dé i si an va faa i dan mi fié ye lɛ Rasɛl vun sɔnɔ, Bɛnjamɛn tɛrɛ glɛ la, Sɛlitas. Wo dan a fe lɛ i lɛ léé, sokofaledanu lé i go wo gini lɛ, wo bɔra a gi; i ti ’ka é gi bɔrɔna sokofaledanu lé we ma é dɛrɛ lo, naa, é a i gi bɔrɔ pana yé é léé: Maa dan kɛlɛ lɛ kaa an be lé we maa?

³ Dé i si ’bɛna, i dan go lɛ i ’lɛ mi, yé i dan bɔ lɛ Tabɔɔ sɛnéyili wuo, ana lé ka dan kee lɛ mi yaa lé wa gona Bale bɔ lɛ Bétɛl, wo nya, ’té boligɔné yaa kɔné a wo va mi do nwiin, yé buru yaa a a ’koɛ lee, ’té nwɛ kuo do a a koɛ lee.

⁴ Wo dan i sina laa lɛ, yé wo dan buru fié nɔ lɛ i lɛ, yé bé si wo lee.

⁵ ’Bɛ zuo i dan bɔ lɛ Gibéa‐Eloim, fɛana lé Filisitinu lé sunyanu palu do ke, ana. Dé i bɔra fla tɔɔn, ka dan kee lɛ balelayemunu palu do lé wo ke sina loru balebanna, wo nya, ’té kpélégyɛzan koo, poogyɛzan koo, séénfɛnzan koo, kɔnɔgyɛzan koo, wa wo ’lɛ, ’té wobozen éé balelawe fé.

⁶ Gakelebale Léli é dan i kun lɛ, i dan balelawe fe lɛ wo va, yé i dan nɔla lɛ mi bɛ nya.

⁷ Dé tɔmasenu ’ko lɛ sɔɔ i lɛ, dé wean dɔ i gi, bé kɛlɛ, naa, Bale a i va.

⁸ ’Bɛ zuo i dan go lɛ tɛrɛ zia Gilgal an ’lɛ; yé maa dan da lɛ i va, balebanwi lé wa kyɛ blé, a nɔle valé bɔvɔ saraka bole we ma. I dan an lɛbɛn lɛ yi sɔrafié, fɔɔ yé an da i va, yé we lé é a lé bé kɛlɛ, yé maa a fe i lɛ.

⁹ Yé dé Saul é nwun zi dɔ Samuɛl ta yé wo kini ékema tɔɔn, Bale bli dɛrɛ nɔ a lɛ, yé tɔmasenu ’ko, wo faa lɛ sɔɔ yee yi duo nya.

¹⁰ Wo bɔ Gibéa aan wo, wo kee balelayezannu palu do nya. Bale Léli a kun yé é balelawe fe wo va.

¹¹ Munu faa lé wa dɔɔ é kyɛn, wa ye léé, é a balelawe fena balelayemunu va, yé wo lé ’wo ke lɛ léé: Mɛ ɛ kɛlɛ Kis be lɛ kyɔɔ? Saul é ziin é a balelayezannu va mi do nyaa?

¹² Gibéa mi do léé: Yé de ɛ ke wo ti nyaa? ’Bɛ ta lé woo gɔné vɔa léé: Saul é ziin é a balelayezannu va mi do nyaa?

¹³ É nyaa balelawefele nya aan wo, é go balebanna loru.

¹⁴ Saul ti bwe lé Saul valé a wuozan lɛ léé: Ka go kyɛɛn? Saul a zi pa léé: Ko go sokofaledanu gini lɛ yé ko ’ka wo ye lɛ lo, yé ko go Samuɛl va.

¹⁵ Saul ti bwe lé é ziin léé: We lé Samuɛl a fe i lɛ, bé fe an lɛ.

¹⁶ Saul a zi pa é ti bwe lɛ léé: É ko bli dɔrala léé, wo sokofaledanu ye. Yé plale mi nwiin lé we lé Samuɛl a fe a lɛ, é ’ka ’bɛ do kpen fe lɛ a lɛ lo.

Wa zana dɔɔ léé, Saul a Minwiinzan Blɛn nya

¹⁷ Samuɛl munu zén ékeva Gakelebale ’lɛ Misipa,

¹⁸ yé é lé Izraɛl lé nénu lɛ léé: Gakelebale, Izraɛl lé Bale léma: Maa Izraɛl si Éjipiti tɛrɛ la yé maa ka si Éjipiti munu valé bɛnnu faa lé wo nyané pa ka ta, wo lee.

¹⁹ Yé kyɔ, ka a sɔn vɔna kalé Bale lé é ka si kalé nyanéblele faa valé kalé kleblele faa lee, a ma, yé ka lé a lɛ léé, ’i ’wo nwiinzan dɔ. Sin, ’ka da Gakelebale ’lɛ ka bɛn ma bɛn ma, mi wuru soru soru.

²⁰ Samuɛl Izraɛl bɛnnu faa bié yé wo Bɛnjamɛn bɛn si a va.

²¹ É Bɛnjamɛn bɛn bié wo gɔnɔla ma gɔnɔla ma, yé wo Matri gɔnɔ si a va. ’Bɛ zuo wo Kis be Saul si a va. Wa nagini, yé wo ’ka a ye lɛ lo.

²² Wo we zuo laa Gakelebale lee é ziin léé: Mi bɛ ana é ziin? Yé Gakelebale léé: Bé ye, é a é yɔɔle kɔnénu méléna.

²³ Wo go vlan nya yé wa si ana yé é dɔ munu méléna. A nwiin mini wo faa la, yé wo va mi grɔgrɔ éé bɔa a puo wuo.

²⁴ Samuɛl lé munu faa lɛ léé: Mi lé Gakelebale a si a va, ka yee? A bɔmazan ’ka munu faa méléna lo. Yé munu faa siaa léé: Ko nwiinzan blɛn ’é vo é yuɛma ma!

²⁵ Yé a se a minwiinzan blɛn lɛ fɛan zo, Samuɛl a gɔɔn munu lɛ. É a gyɛ sɛbɛ la yé é a pla Gakelebale ’lɛ. ’Bɛ zuo é munu pa zia wolé kɔn ’léé do do.

²⁶ Saul é ziin, é go élé kɔn ’léé Gibéa. Nyanazannu palu do lé Bale we fe wo bli gi, wo go a zuo.

²⁷ Naa, mi vɔnlenu ana duowo, yé wo léé: I! ɛɛ, mi ’ko ɛ ko sié we gii? Yé wo nyé yéli a ma, yé wo ’ka da lɛ blɛfɛ nya a lɛ lo. Naa, Saul é tɔné sia ’bɛnu dére ta.