1 Samuɛl 1 - Kazambale lé Sebe Sauunu 1979

Elkananu go Bale ban lɛ Silo

¹ Mi do ana Ramataim‐Sofim, wa laama Elkana. É si Éfraim gɔ ma. É a Jéroam be nya, Jéroam a Éliu be nya, Éliu a Tou be nya, Tou a Éfrat mi Suf be nya.

² A na a fié. Wa do laama Ane yé wa koɛ laama Pénina; nénu a Pénina lee, naa, né do kpen ’ka Ane lee lo.

³ Lɛɛ do do gi, gɔné ’ko éé sié élé fla yé éé goo Silo diale é bli la we gi lai sunyanu lé Gakelebale ’lɛ, ’é valé a banle we gi. ’Bɛna lé Gakelebale banzannu fié ke, Éli benu Ofoni valé Finé lé.

⁴ Dé Elkana Bale ban yian nya, a na Pénina koo, négɔné valé nélomu lé é a yaa ’bɛ ma koo, éé wozé wi no.

⁵ Naa, Ane lé Gakelebale a kɛlɛ sɔnzan nya, ’bɛ sɔ a lɛ, amalé éé ’bɛ zé no gɔnɔ fié.

⁶ A zana na éé we nanaan a ma, Gakelebale a kɛlɛ sɔnzan nya fɛan zo bɛ, ’bɛ we ’nale a ma we gi.

⁷ Lɛɛ faa gi we ’ko éé bɔa ’bɛ zo. Dé Ane go Gakelebale lé kɔn gi vu, Pénina éé we nanaan a ma, wenanabɛ duo gi. ’Té Ane éé wuvɔa yé é ’ka fɛ blé lo.

⁸ A zana Elkana lé a lɛ léé: Ane, mɛmalé i wuvɔa yé i ’ka fɛ blé loo? Mɛmalé i bli kyɛ dɔɔ? An fila vɔle ’ka mini lɛ i lɛ négɔné vu ta loo?

⁹ Dé wo fɛ ble yé wo fɛ mini Silo faa, Ane nwa. ’Té Balebanzan Éli a é nyanale blin do ta Gakelebale lé kɔn wɛyili do sɔnɔ.

¹⁰ Ane bazoro Gakelebale lɛ é zuru va kyɛ dɔle nya ye a yuɛ’yi so.

¹¹ É bale kun a fele nya léé: Lai sunyanu lé Gakelebale! maa, i wuole ’ko, dé i anlé nyanéblele ye, dé an sele dɔ i gi yé i gi ’ka san lɛ an ma lo, dé i négɔné nɔ an lɛ, maa dan a nɔ lɛ bii Gakelebale lɛ alé tɛrɛla faa gi yé wo ’ka dan a nwin puiɛ lɛ monomono lo.

¹² É mɔn bazorona Gakelebale lɛ fɛan zo, Éli a lɔlu ye;

¹³ Ane we fe é bli gi, yé a lɔlu nyɔɔn é pla, naa, mi ’ka a dére maan lo.

¹⁴ É dɔ Éli gi léé, nwɛ a gyɛ yé é lé a lɛ léé: Ilé nwɛgyɛle é dan nyaa lɛ mɛ yi laa? ’I daan nwɛ ma.

¹⁵ Ane a zi pa léé: Anzan, gba, maa a le lé é ke nyané blena é bli gi, a nya, yé maa ’ka nwɛ valé dɔrɔ mini lɛ lo; naa, maa a an bli gi we faa bɔrɔna Gakelebale lɛ.

¹⁶ Té i an ye le vɔnle nya lo, naa, an bli kyɛ dɔle lé é gié é glɛ la valé yara lé an gyɛle ɛ bléyi ’ko bɔ an ma bazorona.

¹⁷ Éli léé: ’I go drɔɔ ma, ba lé bé zoro Izraɛl lé Bale lɛ, ’é a ’ma ma.

¹⁸ Ane léé: Maa i yuɛ gi bɔ ma. Yé lezan ’ko go. É fɛ ble yé a yara dɔbɛ nɔla.

¹⁹ Wo nwa bladi tutu yé wo dia wo bli la Gakelebale ’lɛ faa yé wo zi sia yé wo go wolé fla Rama. Elkana go é na Ane zuo kɔn gi yé Ane sele dɔ Gakelebale gi.

Samuɛl yaale

²⁰ ’Bɛ lɛɛ ’ko gi Ane bɔn si yé é négɔné yaa yé é a tɔ pa Samuɛl; é léé, maa a laa Gakelebale lee, azama.

²¹ A zana Elkana valé élé kɔngimunu faa go Gakelebale lé lɛɛ do do gi saraka bo lɛ, ’bɛ valé alé bale kunle lɛ sɔɔle we ma.

²² Naa, Ane ’ka go lɛ lo, yé é lé é zana lɛ léé: Dé né si nyɔ ma faa, maa dan go lɛ a nya a gɔɔnle Gakelebale lɛ we gi, yé ’é vo ana yifaama.

²³ A zana Elkana lé a lɛ léé: We lé é dɔ i gi wezin nya, bé kɛlɛ. Bé sile nyɔ ma lɛbɛn. Gakelebale ’é dére lɛ sɔɔ ma. Yé lezan vo yé é vo nyɔ nɔna é be lɛ, fɔɔ yé é si nyɔ ma.

²⁴ Né si nyɔ ma aan wo, Ane go a nya é lee, yé dirigɔné yaa koo, burupun vlekyɛɛ do koo, nwɛ kuo do koo, é go wo nya é lee. É go né nya Gakelebale lé kɔn gi Silo; naa, né a tan kiéné.

²⁵ Wo dirigɔnénu bɔrɔ bo yé wo go né nya Éli va.

²⁶ Ane léé: Anzan, ’i tɔné dɔ an lɛ. I léli a é yuɛma weboen nya, le lé é dɔ i sɔnɔ yi la ’ko, ’té éé bazoroan Gakelebale lɛ bɛ, maa lé.

²⁷ Né ’ko lé we ma lé an bazoro yi la. Yé we lé maa a laa Gakelebale lee, é a ’ma.

²⁸ É ziin, é sɔ an lɛ léé, maa né ’ko nɔ Gakelebale lɛ. Maa a nɔ Gakelebale lɛ alé tɛrɛla faa gi. Yé wo dia wo bli la Gakelebale ’lɛ.