1 Piɛri 5 - Kazambale lé Sebe Sauunu 1979

’Ka Kazambale lé trubɛ pa

¹ Maa a we plana kalé mi segelenu lɛ. Maa é ziin, maa a wo va mi segele do nya, yé maa Krist lé nyanéblelenu ye, yé anzé a fua tɔbɔle lé é dan bɔra lɛ bɛ, a va. We lé maa a plana ’kaa mi segelenu lɛ, yee lé ke ’ko:

² Kazambale lé trubɛnu lé é wo bɛ pa ka lee, ’ka wo pa é zima ma; té ka a kɛlɛ gla nya lo, ’ka kɛlɛ bli drɔɔ nya; té ka kɛlɛ fɛ yele wo nwiin we ma lo, naa, ’ka kɛlɛ wo sɔle ka lɛ we ma;

³ té kabo pla wo nwiin bélé fɛan zo lé wa ka wuozannu nya, a zo lo, naa, ’ka kɛlɛ trubɛnu lé wekɛlɛmazannu nya ma.

⁴ Yé dé Mipazan segele da yian ma, tɔkoro lé ke fua tɔbɔle nya, ’té é ’ka sɛra lo, ka dan a ye lɛ kazé nya.

⁵ É ziin, ’kaa mi boronénu, ’ka pla mi segelenu wuo. Yé ’kaa faa, ’ka ka ke kun é zima we faa gi, bo kɛlɛle kiéné nya, naa, Kazambale éé dɔa boblɛnmunu ma, Yé éé zin kɛla bokiénémunu lɛ.

⁶ ’Kabo kɛlɛ kiéné Kazambale bɛ plɛplɛ wuo, yé dé a bléyi bɔ yé Kazambale ’é ka kɛlɛ blɛn;

⁷ yeebozen ɛ ka paan, amalé ’ka kalé gibɔrɔmawenu faa bɛ pa a lee.

⁸ ’Ka kɛlɛ ’wuoatazannu nya ma. ’Ka vo é vuole ma. Ka nyanézan yonufaatagɔné a giéna bélé golizra lé é ke wena, a zo, mi lé é dan a ble lɛ, a mavɔɔle nya, bɛwemalé ’ka kɛlɛ ’wuoatazannu nya yé ’ka vuo.

⁹ ’Ka dɔ a ma plɛplɛ blipale tegele nya; ka a gi dɔɔ léé, nyanénu lé ka ke a blena, ka bwenu lé wo ke é nwɛɛnle tɛrɛ la, wa yee nyané duo ɛ blena.

¹⁰ Zin faa kɛlɛ Bale, yee ɛ ka laa Jézu Krist gi élé fua lé a glɛ ’ka lo, a blele ma, dé ka nyané ble bléyi sɛ nya faa, é dan gun si lɛ ka ma, é dan ka dɔ lɛ plɛplɛ, é dan ka fuu dɔ lɛ ka ta, é dan ka dɔ lɛ gligli.

¹¹ Plɛplɛ a yee ɛ lee, lɛɛfaama, a glɛ ’ka lo. Amɛɛn.

Weale voélazan

¹² Maa a dére sɛ ’ko pana ka lɛ zia Silvɛn lé é ke an yuɛ gi yarapawela bwe nya, a lee. Maa a gyɛ we plale ka lɛ valé ka bɔn gi kinile we gi léé, Kazambale lé zin bozen a ’bɛ ɛ zo. ’Ka dɔ a ta ma.

¹³ Munu lé Bale wo si a va, ’té wo ke léglizi nya Babilɔn, é valé an be Maak, wo we ka va.

¹⁴ ’Ka we ka ke va sɔlɛle lé mituu gyɛle nya. ’Kaa faa lé ka ke Krist gi, ’ka vo drɔɔ ma.