1 Piɛri 4 - Kazambale lé Sebe Sauunu 1979

¹ Krist nyané ble é kɔlɛ gi, bɛwemalé ka é ziin, gi bɔrɔle duo ’é kɛlɛ ka ’wuo gi ma. Naa, mian é nyané ble é kɔlɛ gi, é si wenyané zuo,

² léé, alé tɛrɛlayinu lé wo vo a lee, té ’é wo kɛlɛ tɛrɛlamunu lé blibɔmawe yɛrama é dɛrɛ lo, naa, ’é wo kɛlɛ Kazambale lé blibɔmawe yɛrama.

³ É vinin na, ka tawo yolémunu lé blibɔmawe yɛrama; ’té ka we vɔnle kɛla, ’té ka bli éé bɔa fɛnu ma, ’té ka nwɛ taan, ’té ka nyɔnɔfɛ kiɛre kiɛre blé, ’té ka fɛ kiɛre kiɛre minian, ’té ka miyilinu bɔa, dɔlé ’té miyili bɔle yi a é gale. ’Bɛ a é yi.

⁴ Sin, ’bɛ zo wenu lé mi ’ka a kɛla lo, ’té wa kɛlɛna bélé blii lé, ka péli ’ka é vɔle wo va ’bɛ kɛlɛna é dɛrɛ lo, amalé wo gi vuru, yé wa ka tɔ sɛrɛna.

⁵ Wo dan a zuo fe lɛ mi lé a ma ke é ’lɛrɛle miyuɛmalenu valé migalenu lé we blele we ma bɛ, a lɛ.

⁶ Bɛwemalé wo Wenéné fe é ziin gamunu lɛ, léé, dé wo wolé we ble tɛrɛlamunu lé we blele yɛrama faa, yé wo léli ’é vo é yuɛma, fɛan zo lé Kazambale ke é yuɛma, a zo.

⁷ Fɛnu faa bɔ nyaana. ’Ka kɛlɛ ’wuoatazannu nya yé ’kabo kun, yé ’ka bazoro.

⁸ We blɛn lé ke ’ko: ’ka sɔ ka ke lɛ é baba, naa, sɔlɛle éé wenyané kiɛre ta saan sɔɔn.

⁹ ’Ka ka ke bɛn si é zima, té ka kɛlɛ gun gyɛle nya lo.

¹⁰ Blɛ lé ka a ye, ka faa do do ’é mi bɛnu mawenu kɛlɛ a nya, yé ’ka kɛlɛ Kazambale lé zin gɔnɔ faa gulizannu nya é zima.

¹¹ Dé mi do a we fena, ’é a fe Kazambale dére yɛrama; dé mi do a mi mawe kɛlɛna, ’é a kɛlɛ, plɛplɛ lé Kazambale a nɔ a lɛ, a nya. ’Ka we faa kɛlɛ Kazambale tɔ bɔle we gi Jézu Krist lé, fua valé plɛplɛ ke a lee lɛɛfaama bɛ, a nya. Amɛɛn.

Krétiɛn lé nyanéblebɛ

¹² ’Kaa lé ka sɔ an lɛ, té ka gi é vuru ka gidanwe lé é ke ka ma tɔntɔn bélé vɔnɔ zo bɛ, a ma lo; ’bɛ ’ka mi givuruwe nya lo.

¹³ Naa, ka gi ’é nana léé, nyanénu lé Krist a ble, kazé a wo va, yé ka gi ’é nana fɔɔ yé é gié a glɛ la, Krist lé fua nagɔɔn yi nya.

¹⁴ Dé wo ka sɔnɔ Krist tɔ ma, kazé a néné, naa, fuasan Léli, Kazambale Léli, é a ka ta.

¹⁵ Té ka va mi do kpen é kle ble migyɛle koo, kyeenwole koo, wenaané kɛlɛle koo, wɔrale mi bɛ lé we gi koo, wolé we ma lo.

¹⁶ Naa, dé mian kle ble ’é kɛlɛle Krétiɛn nya lé we ma, té yara ’é ’bɛzan gyɛ ’bɛ we ma lo, naa, ’é Kazambale tɔ bɔ Krétiɛn tɔ lé we ma.

¹⁷ Weblebléyi bɔ sin, yé a péli éé sian Kazambale lé kɔngimunu va. Yé dé a pélisia kaa va, munu lé wo ’ka Kazambale lé Wenéné lɛdɔama lo, wozé we ’wuo é dan pla lɛ kaa?

¹⁸ Yé dé mi tegele sile we gi kɛlɛ tɔntɔn, Kazambale lé zi ma wenyané fezannu valé wenyanékɛlɛzannu zé é dan kɛlɛ lɛ kaa?

¹⁹ Amalé, munu lé wo ke kle blena Kazambale lé blibɔmale yɛrama, é a lé woboen bɛ pa Fɛkɛlɛzan lé é ke yarapawelazan nya, a lee, ’té woo wezin kɛla.