1 Piɛri 3 - Kazambale lé Sebe Sauunu 1979

Le zananu valé gɔné nanu giébɛ

¹ Gɔné nanu, ka é ziin, ’ka pla ka zananu wuo, léé, dé gɔné kenu ’ka Bale dére lɛdɔama lo, dé mi do kpen ’ka we fé wo lɛ looo, wo dan si lɛ we gi ’wo nanu kɛlɛwe ma,

² ’té dé wa ye léé, ka giébɛ a wéiin yé ka a plana wo wuo.

³ Té ka ’lɛrɛ kɔlɛmafɛnu lé wo ke nwin tanle koo, mi’lɛrɛkyan koo, sɔ zima koo, wo nya lo,

⁴ naa, ’lɛrɛfɛ lé é ke é yɔɔle mi gi, ’té é ’ka sɛra lo, ’ka ’lɛrɛ ’bɛ nya. Yee lé ke bli zin valé bli drɔɔ nya. Yee ɛ ke fɛwezan nya Kazambale yuɛ gi.

⁵ Lomu sauun lé wo bli ke Kazambale lɛ, wa kɛlɛ yee ɛ zo é kyɛn, yé wo pla wo zananu wuo,

⁶ bélé Sara lé é Abraam lɛdɔma yé é a laa ézan, a zo. Dé ka wezin kɛla, ’té kana do kpen ’ka ka gi lo, ’té ka kinin Sara lunu nya.

⁷ ’Kaa gɔnénu, le ’ka plɛplɛ bélé gɔné zo lo, amalé ’ka nyana ka nanu va wedɔɔle nya. Fɛan zo lé kabozen vole é yuɛma ye zin nya, a zo duo lé wa ye é ziin, amalé ’ka wo kun é zima, té kalé bazorole é sɛrɛ lo we gi.

’Ka kle ble we tegele ma

⁸ A lɛ sɔɔ dére lé é ke léé, ka faa lé gibɔrɔle ’é kɛlɛ do; ka faa bli ’é kɛlɛ do; ka bwenu ’é sɔ ka lɛ; ka nyanai ’é zén; ’kabo kɛlɛ kiéné.

⁹ Té ka wenyané lɛgi pa wenyané nya lo; yé té ka sɔnɔ lɛgi pa sɔnɔ nya lo; naa, ’ka munu drɔɔ vo, alé we ma lé wo ka laa, kaboen drɔɔ vole we gi.

¹⁰ Dé é sɔ mian lɛ léé, élé tɛrɛla ’é kɛlɛ néné, Yé ’é gi nana yinu ye, ’É yuɛ pa ébo va wenyané fele ma, Yé ’é yuɛ pa é lɔlu va dabli dérenu fele ma.

¹¹ ’É si wenyané ma baa yé ’é wezin kɛlɛ ma, ’É vole drɔɔ nagini yé ’é go a zuo ma,

¹² Naa, Mizambale yuɛ a mi tegelenu ta, Yé a tɔné a é dɔle wolé bazorole lɛ, Naa, Mizambale yara a wenyanékɛlɛmunu ma plɛplɛ.

¹³ Dé ka a wezin kɛlɛna ka sɔbɛla nya, de ɛ dan kle pa lɛ ka taa?

¹⁴ Dé é kɛlɛ léé, ka kle ble we tegele ma, ’té kazé a é zima. Té ka kana wo kana?-?mawe lee lo; té ka gi kyɛ é dɔ lo;

¹⁵ naa, ’ka Krist pa é yɛrama ka bli gi Kazan nya. We lé ka bli ke a lɛ, dé miomian é a gi laa ka lee, ’ka gi fe a lɛ. ’Ka a fe bli drɔɔ valé kanale nya,

¹⁶ ’té kalé wevasibli ’ka we dɔa ka nwiin lo. ’Ka kɛlɛ ’bɛ zo, yé dé munu ka tɔ sɛrɛ, yara é dan kalé Krist zuo tawobɛ sɔnɔzannu gyɛ lɛ.

¹⁷ Dé é a Kazambale lé blibɔmawe nya léé, kaa nyané ble wezin kɛlɛle ma, ’bɛ fila vɔ. Té kaa nyané ble wenyané kɛlɛle ma lo.

¹⁸ Krist é ziin, é nyané ble wenyané ma gɔnɔ do; yee, Mi Tegele, é nyané ble mi plenu lé we gi, gole ka nya Kazambale va we ma; dé é a a kɔlɛ nya, ’bɛ ga, yé dé é a a léli nya, ’bɛ béli;

¹⁹ a léli duo nya lé é go we fe lɛ bokɔn gi lélinu lɛ.

²⁰ Lélinu ’ko, wa é vinin tɔnégiplɛplɛzannu nya, bléyian va lé Kazambale é bli kɛlɛ tiéé munu ma, Noé lé ’yitagoro kɛlɛbléyi va. Mi sɛ lé ’yi wo béli, wa ’yitagoro gi mi sɔraa.

²¹ ’Yi ’ko a batizé lé éé ka sié we gi sin, a tɔmase nya. Batizé ’ka ka kɔlɛ zurule we nya lo, dé kalé wevasibli ’ka we dɔa ka nwiin Kazambale yara lo, yee lé ke batizé nya, yé é ka sié we gi Jézu Krist nwale gale va nya.

²² Jézu go la gi yé é nyana Kazambale bɛyila, yé lanjenu koo, fɛnu lé woo wo lɛdɔama koo, plɛplɛnu koo, wo pla a wuo.