1 Piɛri 2 - Kazambale lé Sebe Sauunu 1979

Gɔlɛ yuɛmale valé bɛn sauun

¹ Mi blifliwe faa koo, dabliwe faa koo, bodrɔle koo, bli bɔle mi bɛ lé fɛ ma koo, liwole faa koo, ’ka daan wo ma.

² Ka a bélé liinénu zo, amalé ka bli ’é bɔ nyɔyi tegele lé ke Bale dére nya, a ma, fɛan zo lé liinénu bli éé bɔa nyɔyi ma, a zo. Dé ka a mini, ka dan tin lɛ a nya yé ka béli,

³ ’té dé ka Mizan lɛdan, yé ka a ye néné.

⁴ ’Ka bié Jézu va; gɔlɛ yuɛmale lé, munu sɔn vɔ a ma yé Kazambale a si élé fɛwezan nya bɛ, ’ka bié a va;

⁵ ka é ziin, ka a gɔlɛ yuɛmalenu nya yé dé ka bié a va ka dan kɛlɛ lɛ lélikɔn valé Balebanmunu gɔnɔ sauun nya Bale banle we gi, lélifɛ lé é sɔ Kazambale lɛ Jézu lé we ma, a nya.

⁶ Naa, é a é gyɛle Kazambale lé sɛbɛ gi léé: Ka ye, maa kɔnsungɔlɛ wezan si a va yé maa a pla Siɔn; Mi lé é bli voo a lɛ, ’bɛzan gi ’ka dan vuru lɛ é ma monomono lo.

⁷ ’Kaa lé ka bli vo Jézu lɛ, é a fɛwezan nya ka lee, naa, Kazambale lé sɛbɛ léma: Gɔlɛ lé kɔndɔzannu sɔn vɔ a ma, É kinin kɔnsungɔlɛ nya,

⁸ Misaangɔlɛ nya, Midiéragɔlɛ nya. Munu lé wo ’ka ’wo bli vo lɛ Jézu lɛ lo, Jézu kɛlɛ yee gɔlɛ nya wo lɛ. Wo ’ka dɔ lɛ Bale dére ta lo, amalé misaangɔlɛ ’ko, é wo saan. Kazambale a kɛlɛ é kyɛn, amalé é kɛlɛ a zo.

⁹ Naa, kazé ’ka ’bɛ zo lo; ka a bɛn lɛgɔnɔ do lé Bale a si a va, a nya, yé yee fuaneé Bale ka dɔ ’é banzannu nya; ka a bɛntɛrɛ lé Bale a pa é yɛrama, a nya; ka a migɔnɔ lé Kazambale wo tabo wo nya, mi lé é ka laa ’té ka a gunu va yé é go ka nya élé san zima va bɛ, kalé a tɔ zin bɔle we gi.

¹⁰ É vinin, té ka a é pla, naa sin, ka kɛlɛ Kazambale bɛn nya. É vinin Kazambale nyanai ’ka zén lɛ ka ta lo; naa, sin a nyanai zén ka ta.

’Ka tawo Kazambale wuomunu lé tawobɛ nya

¹¹ ’Kaa lé ka sɔ an lɛ, ka a bɛnnu valé giézannu nya, amalé maa we plaan ka lɛ léé, mi dɔbɛ kyɛn lé blibɔmawenu lé woo guli daan mi boen va, ’ka daan wo ma.

¹² Ka giébɛ ’é kɛlɛ é zima yolémunu worona. Wa ka tɔ sɛrɛna bélé fɛan zo lé ka a wenaanékɛlɛzannu nya, a zo, naa, dé Kazambale da wo va yian nya wo dan Kazambale tɔ zin bɔ lɛ ka kɛlɛwe zinnu yele ma.

¹³ ’Ka pla minwiinmunu faa wuo Mizan lé we ma,

¹⁴ dé é a mi faa nwiinzan blɛn nyaoo, dé é a gbɔrɔnamanu lé é wo pa zia welɛdɔle wenaanékɛlɛmunu gi, é valé wezinkɛlɛmunu tɔ zin fele we gi bɛ, wo nyaoo, ’ka pla wo wuo.

¹⁵ É a Kazambale lé blibɔmawe nya léé, wezin kɛlɛle nya lé ka tavomunu lé tanyila wefele tadɔa.

¹⁶ ’Ka tawo minénu nya, naa, té ka we lɛrɛlɛrɛ kɛlɛ ka vole kaboma tɔ gi lo. ’Ka we kɛlɛ Kazambale wuomunu lé wekɛlɛbɛ nya.

¹⁷ ’Ka munu faa lɛdɔma; ’ka ka bwenu lɔrɔ pa; ’ka kana Kazambale lee; ’ka minwiinzan lɛdɔma.

Jézu kɛlɛ kalé wekɛlɛmazan nya

¹⁸ Miwuomunu, ’ka pla kazannu wuo kanale tegele nya, mi zinnu valé bli drɔɔzannu saa kaan lo, naa, dé wo bli a tɔntɔn‐oo, ’ka pla wo wuo.

¹⁹ Dé ka a kle blena, we lé é ’ka ka pai nya lo, a ma, dé ka gi bɔrɔ Kazambale ma yé ka ’wuo dɔ a wuo, ’bɛ a wezin nya Kazambale yuɛ gi.

²⁰ Dé wo kle pa ka ta kabo lé wenyané kɛlɛle ma yé ka dɔ ’bɛ wuo, de ɛ ka tɔ bɔa ’bɛ we maa? Naa, dé ka dɔ klenu wuo kalé wezin kɛlɛle ma, ’bɛ a é sɔke Kazambale yuɛ gi.

²¹ We ’ko ma lé wo ka laa, naa, Krist é ziin é nyané ble kalé we gi, yé é wekɛlɛmawe vo ka va, kalé we kɛlɛle a ma we gi.

²² Krist ’ka wenyané kɛlɛ lɛ monomono lo, Yé dabli dére do kpen ’ka a ’léé lo;

²³ wa sɔnɔ yé é ’ka wo sɔnɔ lɛ lo; wo nyané pa a ta yé é ’ka siaa lɛ wo ta lo, naa, ébo bɛ pa mi lé éé we blé tegele, a lee;

²⁴ é dɔ kaalé wenyané gi ébozen kɔlɛ nya yili la, kaa gale kaalé wenyanénu vazia we gi yé kaa vo é yuɛma we tegele kɛlɛle we gi; a tuolenu ma lé kaa béli.

²⁵ Naa, ka a turu bélé ’bla sanlenu zo, naa, sin, ka nɔla ka boen pazan va, ka boen tabinzan va.