1 Piɛri 1 - Kazambale lé Sebe Sauunu 1979

Weale lé

¹ ’Kaanu lé ka ke é kinile ékema yé ka kɛlɛ bɛnnu nya, Pɔnt tɛrɛ la koo, Galasi tɛrɛ la koo, Kapadose tɛrɛ la koo, Azi tɛrɛ la koo, Bitini tɛrɛ la koo, wona bɛ, an we ka va. Maa Piɛri lé an ke Jézu Krist lé nwunvɔzan nya, maa ɛ ke sɛbɛ ’ko gyɛna ka lɛ.

² Tibale ka si a va élé tɛlɛ tɛlama wedɔɔle yɛrama, yé Léli Sauun ka pa é yɛrama Bale zé nya, kalé Jézu Krist lɛdɔmale valé ka kɛlɛle a nyɛ nwɛɛn ta munu nya we gi. Bale lé zin kɛlɛle ka lɛ valé Bale lé ka vole drɔɔ gi ’é gyɛ ma.

Bli vole we lɛ bozen

³ Kaazan Jézu Krist Ti lé ke é ziin alé Bale nya, a drɔɔ ’é vo ma. A nyanai zén kaa ta é baba amalé é kaa yaa é dɛrɛ Jézu Krist nwale gamunu va nya, léé, kaa bli vole we lɛ ’é kɛlɛ bli vole we lɛ bozen nya.

⁴ É ziin, é kaa yaa é dɛrɛ kaalé tɔnɔ blele we gi. Tɔnɔ ’ko ’ka sɛra lo, a tiri ’ka dɔa lo, a ma ’ka yuruan lo yé a ta a é dɔle la gi kazé nya.

⁵ Ka bli a Kazambale lɛ amalé alé plɛplɛ éé ka tabin‐é fɔɔ yé ka béliwe lé Kazambale a ma’lɛrɛle nyaa, yé ’é a nagɔɔn bléyi voéla nya.

⁶ Ka gi ’é nana we ’ko ma ma, dɔlé ’té sin é a lé ka bli gi kyɛ é dɔ bléyi sɛ nya ka gidanwenu kiɛre lé we ma. Kalé blipale gidanle wea é baba é mini kyan lé éé bɔa sɛrɛle lɛ, ’té wa gi daan kyɛ va duowo bɛ, a ta.

⁷ Kalé blipale gidanle é dan nɔla lɛ ka ma ka tɔ zin fele koo, kalé fua koo, ka tɔbɔle koo, wo nya, Jézu Krist bɔrayi nya munu yuɛ va, amalé Bale éé ka gi daan.

⁸ Ka ’ka tan Jézu ye lɛ lo, yé é sɔ ka lɛ duowo; ka bli a a lɛ, dɔlé ’té ka ’ka tan a ye lɛ lo, yé ka gi a é nanale, gi nanale blɛn lé a gifedére ’ka lo, ’té é gié é glɛ la, a nya,

⁹ naa, kalé blipale mafɛ lé ke ka boen bélile nya.

¹⁰ Zin lé ke é tadɔle kazé nya, balelayemunu a zuo fe balelawe fele nya; yé yee balelayemunu ɛ ka bélimawe gi laa, ’té wa gi kulian.

¹¹ Krist lé nyanéblelenu valé fua lé é dan a ble lɛ ’bɛ zuo, Krist Léli lé ke balelayemunu gi, é a ’bɛ gɔɔnna aan wo wo lɛ a bléyi ’lɛ, amalé wo kwa kuli léé, wa kɛlɛbléyi valé a ma we kénékénénénu faa dɔɔ.

¹² Yé Bale a gɔɔn wo lɛ léé, wo ’ka we ’konu fena wobozen lé we ma lo, naa, ka ɛ lé we ma lé wo ke wo fena. Yé sin, Bale Léli Sauun pa zia yé alé plɛplɛ nya lé munu we ’konu fe ka lɛ sin. Lanjenu bozen, wo bli a é bɔle a ma léé, ’wo we ’konu gi maan.

É a lé kalé tawobɛ ’é kɛlɛ sauun

¹³ Amalé ’ka ka gi bɔrɔlenu dɔ bélé woo doa dɔa ’wo gyɛn fɛan zo, a zo; ’kabo kun, yé zin lé Bale é dan a kɛlɛ lɛ ka lɛ Jézu Krist bɔrayi nya, ’ka bli kɛlɛ a yele lɛ tegele ma.

¹⁴ ’Ka we kɛlɛ bélé mi lɛdɔma nénu zo, fɛnu lé ka bli bɔ wo ma é kyɛn ka tanyila bléyi va bɛ, té ka tawo wo zuo lao lo.

¹⁵ Naa, mi lé é ka laa, é a sauun, amalé ka é ziin ’ka kɛlɛ sauun kalé tawobɛ faa gi,

¹⁶ fɛan zo lé Bale lé sɛbɛ a fe, a zo. É léé: Maa Bale a sauun, amalé ’ka kɛlɛ sauun.

¹⁷ Mi lé éé munu faa lé we blé wo kɛlɛwe yɛrama, ’té é ’ka glɛ dɔa mi gi bɛ lo, dé ka a laan ka Ti, ’ka tawo kanale nya a lee, kalé dɔwola tɛrɛ la.

¹⁸ Ka a gi dɔɔ léé, é vinin ka tawo ka tranu lé gwɛma tawobɛ gi, naa sin, Bale ka si ’bɛ zuo. É ’ka ka tabo lɛ kyan valé gɔɔlifu lé woo sɛra, ’bɛnu nya lo.

¹⁹ Krist lé ke bélé ’blané lé gyɛ ’ka a ma lo, ’té we do kpen ’ka a kɔlɛ ma lo, a zo, a nyɛ wezan nya lé Bale ka tabo.

²⁰ Bale Krist kɛlɛ ’blané nya é kyɛn tɛrɛ bɔrale ’lɛ, yé é a nagɔɔn bléyi voélanu nya kalé we ma.

²¹ Yee ɛ ma lé é ziin ka bli vo Kazambale lé, ’bɛ a si gale va yé ’bɛ fua nɔ a lɛ bɛ, ’bɛ lɛ, ka pale Kazambale ta valé ka bli vole Kazambale lɛ we gi.

²² Webozen lɛdɔmale nya lé ka boen kɛlɛ wéiin, ka sɔle ka ke lɛ tegele bélé bwenu zo we gi, amale sin, ’ka sɔ ka ke lɛ é baba, ka bli faa nya ma.

²³ Naa, wo ’ka ka yaa lɛ é dɛrɛ fɛwɔlɛ lé éé vɔn‐o, a nya lo, wo ka yaa é dɛrɛ fɛwɔlɛ lé é ’ka vɔn‐o lo, a nya, Kazambale dére yuɛmale lé éé voo lɛɛfaama, a nya.

²⁴ Naa, Mi faa a bélé lu zo, Yé mi lé fua faa a bélé lu vwi zo, Lu éé gaan yé a vwi éé diaan,

²⁵ Naa, Mizambale dére éé voo lɛɛfaama. Yee dére ’ko lé wa fe ka lɛ Wenéné fele nya.