1 Minwiinzannu 9 - Kazambale lé Sebe Sauunu 1979

Bale bɔra Salomɔn va é ziin

¹ Salomɔn nyaa aan wo Gakelebale lé kɔn valé minwiinzan lé kɔn dɔle nya, é valé alé sɔlɛwe faa kɛlɛle nya,

² Gakelebale bɔra Salomɔn va a gɔnɔ fiézan nya, é bɔra a va Gabaɔn fɛan zo, a zo.

³ Yé Gakelebale lé a lɛ léé: Ilé bazorole valé zanté lé bé vɔ an lɛ, maa maan; kɔn ’ko lé bé dɔ an tɔ pale a ma yifaama we gi, maa a kɛlɛ sauun yé an yuɛ valé an bli é dan kɛlɛ lɛ ana yifaama.

⁴ Yé bii, dé i tawo an ’lɛ, i ti David tawo fɛan zo, a zo, bli tegele valé we drɔle kɛlɛle nya, ’té we faa lé maa i béli dɔ a nya, ’té bé kɛla, dé i tawo anlé bélidɔwe valé an déretawenu yɛrama,

⁵ maa dan ilé plale mi nwiin lé webleblin dɔ lɛ gligli Izraɛl, maa fe i ti David lɛ fɛan zo, a zo, léé, é ’ka dan vuru lɛ ’é paizan nyanale ma Izraɛl lé webleblin ta lo.

⁶ Naa, dé ka si an va, ka valé ka benu nya, an sɔnnénu valé anlé bélidɔwenu lé maa wo fe ka lɛ, dé ka ’ka wo ta tawo lɛ lo, dé ka go bale bɛnu bɔ lɛ yé ka dia ka bli la wo ’lɛ,

⁷ maa dan Izraɛl si lɛ tɛrɛ lé maa a nɔ a lɛ, a ta; kɔn lé maa an tɔ pa a ma, maa dan a si lɛ an yuɛi, yé Izraɛl é dan kɛlɛ lɛ yérisiémazannu valé gɔnévɔmazannu nya bɛnnu faa va.

⁸ Kɔn ’ko a é dɔle gɔ nwiin fɛan zo bɛ, dé mian gié a sɔnɔ, a gi é dan vuru lɛ a ma yé é dan ’furu fɛn lɛ. Wo dan a fe lɛ léé: Mɛmalé Gakelebale we kɛlɛ tɛrɛ ’ko valé kɔn ’ko lɛ a zoo?

⁹ Yé wo dan a zi pa lɛ léé: Gakelebale, wolé Bale lé é wo tranu si Éjipiti tɛrɛ la, wa vo yé ’wobo yere bale bɛnu ma yé wo dia ’wo yara ’bɛnu ’lɛ yé wo ’bɛnu bɔ, ’bɛzama; bɛwemalé Gakelebale we tɔntɔn faa ’ko bɔ wo ma.

Salomɔn flanu pa — É ’yitagoronu kɛlɛ

¹⁰ Lɛɛ yɔ do giéle zuo, Salomɔn nyaa kɔn fié dɔle nya, Gakelebale lé kɔn valé minwiinzan lé kɔn lé.

¹¹ Sɛdrɛyilinu koo, siprɛyilinu koo, kyan koo, Tii minwiinzan Iiram wo nɔ Salomɔn lɛ, a ’léé lé é sɔ a lɛ, a nya, amalé Salomɔn Galilé tɛrɛ la fla yɔ do nɔ Iiram lɛ.

¹² Iiram si Tii, flanu lé Salomɔn a nɔ a lɛ, wo naginile we gi. Naa, wo ’ka sɔ lɛ a lɛ lo,

¹³ yé é léé: An bwe, fla kaanu lé bé nɔ an lɛ bɛɛ? Yé wana laama Kabul tɛrɛ, yé tɔ ’ko vo a ma fɔɔ kyɔ.

¹⁴ Iiram kyan pa zia minwiinzan lɛ talan yɔ suiɛdo nya.

¹⁵ Fɔrɔlɔnu lé Salomɔn a si Gakelebale lé kɔn valé ébo lé kɔn dɔle koo, Milo pale koo, Jérusalɛm gɔrɔ bole koo, Asɔɔ valé Mégido valé Gézɛɛ pale koo, wo we gi, wolé we lé ke ’ko:

¹⁶ Éjipiti minwiinzan Faraɔn guli dan Gézɛɛ va yé é a si, yé é a kyɛ vɔ yé Kanaan munu lé woo nyanaan yee fla la, é wo gyɛ. A zuo é a nɔ é lu, Salomɔn na lɛ, blɛ nya.

¹⁷ Gézɛɛ koo, Bɛt‐Orɔn tɛrɛzan koo,

¹⁸ Baalat koo, Tadamɔɔ koo, Salomɔn wo pa ana bwi la.

¹⁹ Alé fɛtadɔ flanu koo, alé goronu dɔ flanu koo, alé wisoo ta sunyanu lé flanu koo, é wo pa; fɛ faa lé é sɔ Salomɔn lɛ léé, ’é a dɔ Jérusalɛm koo, Liban koo, tɛrɛ faa lé é ke é plale wo nwiin koo, wona, é wo faa kɛlɛ.

²⁰ Amorénu koo, Étinu koo, Férézinu koo, Éévinu koo, Jébusinu koo, wolé munu lé wo vo, ’té wo ’ka Izraɛl lé nénu nya bɛ lo,

²¹ wo kulunu lé wo vo ana tɛrɛ la yé Izraɛl lé nénu ’ka bɔ lɛ wo gyɛle lɛ tata gwɔun nya lo, Salomɔn wo kɛlɛ luunu nya, yé wo vo ’bɛ nya fɔɔ kyɔ yi nya.

²² Naa, Salomɔn ’ka Izraɛl lé nénu kɛlɛ lɛ luu nya lo; naa, wa sunyanu koo, a wuozannu koo, munu nwiinzannu koo, sunyanu nwiinzannu koo, alé goronu valé alé wisoota sunyanu nwiinzannu koo, wo nya.

²³ Munu lé Salomɔn wo pla nyanamanu nwiin, wa mi wuru fié yɔ sɔrafié wɔlɛ vu, yé wa é plale nyanamapamunu nwiin.

²⁴ Faraɔn lu si David lé fla yé é go kɔn lé Salomɔn a dɔ a lɛ, a gi. ’Bɛ zuo Salomɔn Milo pa.

²⁵ Salomɔn Bale ban, balebanwi lé wa kyɛ blé, a nya, yé é bɔvɔ sarakanu bo lɛɛ do gɔnɔ yaa, balebanna lé é a kɛlɛ Gakelebale zé nya, a ta, yé é lasikɔrɔnu kyɛ ble, balebanna lé ke Gakelebale ’lɛ, a ta. Yé é kɔn dɔle lɛ sɔɔ.

²⁶ Minwiinzan Salomɔn ’yitagoronu kɛlɛ Esijɔn‐Gébɛɛ, Élɔt sɔnɔ wɛyi sɔɔn gɔɔn ma, Édom tɛrɛ la.

²⁷ Iiram bozen wuozannu lé wo ke nyanama pa ’yitagoro gi munu lé wo wɛyi lé we dɔɔ, wo nya, é a pa zia Salomɔn lé nyanamapazannu va ’yitagoronu ’ko gi.

²⁸ Wo go Ofii yé wo kyan si ’bɛna talan wuru fié yɔ do, yé wo go a nya minwiinzan Salomɔn lɛ.