1 Minwiinzannu 5 - Kazambale lé Sebe Sauunu 1979

Salomɔn Balebangikɔn dɔfɛnu ma’lɛrɛ

¹ Tii minwiinzan Iiram é wuozannu nwunvɔ Salomɔn va, naa yifaama David sɔ a lɛ yé é a ’ma léé, wo nyɔnɔ zén Salomɔn nwiin a kɛlɛle minwiinzan nya we gi é ti pa gi.

² Salomɔn we pa Iiram lɛ zia léé:

³ Bé gi dɔɔ léé, gulinu lé an ti David nyanézannu a zi lɛ sɔɔ a nya fɔɔ yé Gakelebale wo pla a wuo, wolé we ma lé an ti David ’ka bɔ lɛ kɔn dɔle lɛ Gakelebale alé Bale lɛ lo.

⁴ Sin, Gakelebale, anlé Bale an vo drɔɔ bɛ faa ma; an nyanézannu ’ka é dɛrɛ lo, di kinié migiwe ’ka é dɛrɛ lo.

⁵ Bé ye, é a an gi léé, ’an kɔn dɔ Gakelebale, anlé Bale tɔ nya, Gakelebale a fe an ti David lɛ fɛan zo, a zo. É léé: I be lé maa dan a nyana lɛ i pa gi, ilé webleblin ta, yee ɛ dan kɔn dɔ lɛ an tɔ nya.

⁶ Sin, ’i munu bɔɔ pa léé, wo sɛdrɛyilinu vɔ an lɛ Liban tɛrɛ la. Anlé nyanamapamunu é dan kɛlɛ lɛ izé va, yé maa dan ilé nyanamapazannu banwo lɛ, gɔɔli ’léé lé i dan a fe lɛ, a nya; naa, bé gi dɔɔ léé, ko va mi do kpen ’ka yili vɔle dɔɔa bélé Sidɔn munu zo lo.

⁷ Iiram Salomɔn dére ’ma aan wo, a gi nana é baba, yé é léé: Gakelebale lé é wedɔɔbe nɔ David lɛ, a plale munu kiɛre ’ko nwiin we ma, a drɔɔ ’é vo kyɔ ma.

⁸ Yé Iiram we pa Salomɔn lɛ zia léé: We lé bé pa an lɛ zia, maa ’ma. We faa lé é sɔ i lɛ sɛdrɛyili valé siprɛyili lé we nya, maa dan a kɛlɛ lɛ.

⁹ Anlé nyanamapamunu é dan wo si lɛ Liban yé wo go wo nya wɛyi va, yé maa dan wo pa lɛ zia wɛyi ta wo polu dɔle nya ékema fɛana lé i dan a fe lɛ an lɛ, ana; maa dan wo fuo lɛ ’bɛna, yé i wo si. Fɛ lé é sɔ an lɛ an ban nya, yee lé ke léé, ’i anlé kɔngimunu lé fɛblele nɔ.

¹⁰ Iiram sɛdrɛyili valé siprɛyili nɔ Salomɔn lɛ, a ’léé lé é sɔ a lɛ, a nya.

¹¹ Yé Salomɔn buruwɔlɛ vlekyɛɛ baa yɔ soru valé ɔlivi nyɔnɔ zima ’bali yɔ do wɔlɛ vu ta soru nɔ Iiram lɛ alé kɔngimunu lé fɛ nya; yee lé Salomɔn a no Iiram lɛ lɛɛ do do ma.

¹² Gakelebale wedɔɔle nɔ Salomɔn lɛ, é blikɛlɛlɛdére fe a lɛ fɛan zo, a zo. Yé Iiram valé Salomɔn vo drɔɔ wo ke va yé wo gi pa do.

¹³ Yé minwiinzan Salomɔn fɔrɔlɔnu si Izraɛl tɛrɛ faa la; wa mi baa vu ta soru.

¹⁴ É wo nwunvɔ Liban tɛrɛ la moné do mi baa soru, ’té éé wo tavɔɔan; woo moné do kɛla Liban, a zuo woo moné fié kɛla ’wo va. Adoniram a fɔrɔlɔnu nwiin.

¹⁵ Salomɔn lé kɔnésimunu a mi baa yɔ do wɔlɛ vu ta soru, yé munu lé woo gɔlɛ ma nyaan gɔ nwiin, ’bɛnu a mi baa yɔ fié,

¹⁶ yé munu lé wo ke nyanamanu nwiin, ’té woo yuɛ paan nyanamapazannu va, wa mi baa do, wuru suiɛdo yɔ soru, wo ’ka wo pa lɛ a vininnu va lo.

¹⁷ Minwiinzan wo bɔɔ pa léé, ’wo gɔlɛ zima blɛnblɛnnu ma nyaa kɔngane vɔgɔlɛ nya.

¹⁸ Salomɔn lé nyanamapazannu koo, Iiram zé koo, Gibli munu koo, wa ma nyaa yé wo yilinu valé gɔlɛnu ma’lɛrɛ, kɔn dɔle we ma.