1 Minwiinzannu 4 - Kazambale lé Sebe Sauunu 1979

Salomɔn lé mi blɛnnu

¹ Minwiinzan blɛn Salomɔn a Izraɛl faa nwiinzan nya.

² Minwiinmunu lé woo alé nyanama paan, wo lé ke ’ko: Balebanzan Sadɔk be Azaria koo,

³ Siisa benu Éliorɛf valé Akija koo, wa sɛbɛgyɛmunu nya; Akilud be Jozafat a sɛbɛtadɔzan nya;

⁴ Jéojada be Bénaja a sunyanu faa nwiinzan nya; Sadɔk valé Abiataa a Balebanzannu nya;

⁵ Natan be Azaria a fɛblele simunu nwiinzan nya; Natan be Zabud a tɛrɛnwiinzan nya, minwiinzan blɛn lé mi zin nya;

⁶ Akisaa a minwiinzan lé kɔntabinzan nya; Abada be Adoniram a gɔɔlibansizan nya.

⁷ Salomɔn lé fɛblele sizannu a vu ta fié Izraɛl faa nwiin. Wo minwiinzan valé élé kɔngimunu lé fɛblele sié moné ma moné ma.

⁸ Wo tɔ lé ke ’ko: Uru be a a nya do, Éfraim gɔ ma.

⁹ Dékɛɛ be a a nya do, Makas koo, Saalbim koo, Bɛt‐Sémɛs koo, Élɔn koo, Bɛt‐Aanan koo, wona.

¹⁰ Ézɛd be a a nya do Arubɔt; Soko valé Éfɛɛ tɛrɛ faa bɛ a é pale ’bɛ lee.

¹¹ Dɔɔ lé tɛrɛ faa a Abinadab be lee. Salomɔn lu Tafat a a na nya.

¹² Taanak valé Mégido koo, Bɛt‐Séan lé ke Saatan sɔnɔ Jizréɛl gɔ nyana ma koo, é sia Bɛt‐Séan fɔɔ yé é bɔ Abɛl‐Méola, fɔɔ yé é bɔ Jokoméam zi, wa Akilud be Baana lee.

¹³ Gébɛɛ be a a nya do Ramɔt, Galaad tɛrɛ la; Manasé be Jaii lé flanu lé ke Galaad tɛrɛ la, wa a lee; Aagɔb lé fɛna a a lee é ziin Bazan tɛrɛ la, fla blɛn yɔ yaa lé, yé wo zi gɔrɔ a é bole yé wo ’léé duoli a zéné nya.

¹⁴ Ido be Akinadab a a nya do Maanaim.

¹⁵ Akimaas a a nya do Néfitali. É Salomɔn lu Bazmat si é na nya.

¹⁶ Usai be Baana a a nya do Béalɔt valé Azɛɛ tɛrɛ la.

¹⁷ Paruas be Jozafat a a nya do, Isakaa tɛrɛ la.

¹⁸ Éla be Siméi a a nya do Bɛnjamɛn tɛrɛ la.

¹⁹ Uri be Gébɛɛ a a nya do Galaad tɛrɛ la; Amoré mununwiinzan Sioni lé fɛna valé Bazan mununwiinzan Ɔg lé fɛna a a lee. Fɛblele sizan a do kpen tɛrɛ ’ko la.

Salomɔn plale mi nwiin tɔbɔle?-?alé wedɔɔle

²⁰ Juda valé Izraɛl munu a kiɛre é baba, wa bélé wɛyi gɔɔn ma nyéné zo. Woo fɛ blé, ’té woo fɛ minian, ’té wo gi éé nanaan.

²¹ Salomɔn pla bɛntɛrɛnu faa nwiin, é sia yuu ma fɔɔ yé é bɔ Filisitinu lé tɛrɛ la, fɔɔ yé é bɔ Éjipiti tɛrɛ glɛ la; woo dan Salomɔn blan nya yé wo pla a wuo alé tɛrɛla faa gi.

²² Fɛ lé Salomɔn a blé yi do do ma, yee lé ke ’ko: Burupun zima vlekyɛɛ wuru do yɔ soru koo, burupun vlekyɛɛ wuru yaa koo,

²³ gɔrɔ gi dirigɔné buale vu koo, bwila dirigɔné yɔ do koo, ’bla yɔ soru koo, woo lé; yé yilédiri koo, gɔrɔ koo, zun‐ɛn koo, miané nyɔnɔzannu koo, wo ’ka ’bɛ nɔnɔan lo.

²⁴ Tɛrɛ lé ke yuu zi, é sia Tifasak fɔɔ yé é bɔ Gaza, é a é plale a faa nwiin, yé é a é plale yuu zi minwiinzannu faa nwiin. Yé a zi munu faa vo a va drɔɔ.

²⁵ É sia Dan fɔɔ yé é bɔ Bɛɛ‐Sééba, kana do kpen ’ka Juda valé Izraɛl gi lo, wo faa a é nyanale wobo lé dɔrɔyili valé wobo lé bɔrɔyili wuo do do Salomɔn bléyi faa va.

²⁶ Wisoo dɔna a wisookɔn gi baa yɔ do, yé vɔwisootazannu a mi baa suiɛdo.

²⁷ Salomɔn koo, munu faa lé woo fɛ blé alé tablé ta koo, fɛblele sizannu éé dan wolé fɛ nya ’wolé moné yɛrama do do; wo ’ka vuru lɛ fɛ do kpen ma lo.

²⁸ Woo dan sɔnmlén valé lu nya é ziin, kɔnésiwisoonu valé vɔtawisoonu zé nya fɛana lé minwiinzan ke, ana; woo dan a nya, wo wo béli dɔ fɛan zo do do, a zo.

²⁹ Wedɔɔle koo, ’wuo zin baba koo, we gɔ do do dɔɔle kiɛre bélé wɛyi gɔɔn ma nyéné zo koo, Bale wo nɔ a lɛ.

³⁰ Salomɔn lé wedɔɔle mini yirinwanazia munu faa lé wedɔɔle ta, yé é mini Éjipiti munu lé wedɔɔle ta.

³¹ É we dɔɔ é mini mi faa ta, Ézra mi Étan koo, Makɔl benu Éman valé Kalkɔl valé Daada koo, é mini wozé ta; a tɔ nwɛɛn a zi bɛnnu faa va.

³² É wegɔné vɔ baa do wuru soru yé é lɛrɛ wuru soru lɛrɛ soru vɔ.

³³ É yilinu ma we fe, é sia Liban lé sɛdrɛyili ma fɔɔ yé é bɔ izopéyili lé éé bɔraan flagɔrɔ ma, a ta; winu koo, mianénu koo, ménénu koo, pɔnu koo, é wo ma we fe é ziin.

³⁴ Bɛnnu faa vamunu éé dan Salomɔn lé wedɔɔle ’male we gi, ’té tɛrɛ la minwiinzannu lé wo alé wedɔɔle tawe ’ma bɛ, woo wo paan zia a va.