1 Minwiinzannu 3 - Kazambale lé Sebe Sauunu 1979

Salomɔn wedɔɔle laa Gakelebale lee

¹ Salomɔn é gi pa do Éjipiti minwiinzan va lesile nya. É Faraɔn lu si é na nya, yé é da a nya David lé fla fɔɔ yé é nyaa élé kɔn valé Gakelebale lé kɔn dɔle nya, é valé Jérusalɛm zi gɔrɔ bole nya.

² Munu éé bale baan gɔnwiin balebannanu saa ɛ na, naa, fɔɔ bléyi ’ko va wo ’ka tan Gakelebale tɔ gi kɔn dɔ lɛ lo;

³ Gakelebale sɔ Salomɔn lɛ yé é é ti David lé gɔnɔlawe kɛla. Naa, éé Bale baan winu valé lasikɔrɔnu nya gɔnwiin balebanna ɛ na.

⁴ Minwiinzan go Gabaɔn Bale banle we gi, naa, é a gɔnwiin balebannanu va balebanna segele nya. Balebanwi lé wa kyɛ blé, Salomɔn a wuru soru nɔ balebanna ta.

⁵ Gakelebale da Salomɔn va nyɛ fla é béli Gabaɔn, yé Bale lé a lɛ léé: Wean sɔ i lɛ léé, maa a kɛlɛ i lɛ, bé laa an lee.

⁶ Salomɔn a zi pa léé: An ti i wuozan David tawo i ’lɛ, yarapalale koo, we tegele kɛlɛle koo, é bli drɔle i vazia koo, wo nya, amalé i we zin kɛlɛ a lɛ é baba; i we zin ’ko tadɔ a lɛ yé i négɔné nɔ a lɛ yé ’bɛ nyana alé webleblin ta fɛan zo lé wa ye kyɔ, a zo.

⁷ Sin, Gakelebale, anlé Bale, i wuozan pla munu nwiin an ti David pa gi; yé maa a nékénéné nya, yé an ’ka we ’ko kɛlɛ lɛ é kyɛn lo.

⁸ Munu lé i wo si a va, munu kiɛre lé wo ’ka bɔa wo nɔnɔle lɛ wo kiɛre we ma lo, i wuozan a wo méléna.

⁹ Amalé ’i wedɔɔbli nɔ i wuozan lɛ, ilé munu lé weblele we gi, wezin valé wenyané va sile we gi. Naa, ilé munu kiɛre ’ko, de ɛ bɔa wolé we blele lɛɛ?

¹⁰ We lé Salomɔn a laa, é sɔ Mizan lɛ.

¹¹ Yé Bale lé a lɛ léé: I we ’ko laa an lee bɛ, yé mɔnle tɛrɛ la koo, fuanu koo, i nyanézannu gale koo, i ’ka wo laa lɛ izé nya lo, yé i wedɔɔle laa, we tegele kɛlɛle we gi,

¹² bé ye, maa dan we kɛlɛ lɛ i dére yɛrama. Maa dan wedɔɔbli valé gikinibli nɔ lɛ i lɛ fɛan zo, i bɔmazan ’ka tan kɛlɛ lɛ lo, yé wo ’ka dan i bɔmazan ye lɛ monomono lo.

¹³ ’Bɛ ta loru, fɛ lé i ’ka a ma laa lɛ lo, fua valé tɔbɔle koo, maa dan wo nɔ lɛ i lɛ fɛan zo, ilé tɛrɛla faa gi bii valé minwiinzan bɛ ’ka dan bɔ lɛ ékema lo.

¹⁴ Yé dé i tawo anlé zinu ta an déretawe valé anlé bélidɔwe kɛlɛle nya, i ti David a kɛlɛ fɛan zo, a zo, maa dan ilé tɛrɛla taa pa lɛ.

¹⁵ Salomɔn vuo. ’Bɛ zo lé é nyɛ gyɛ. Salomɔn da Jérusalɛm é ziin yé é go Gakelebale lé gipawe pagikɛsu ’lɛ. Balebanwi lé wa kyɛ blé, é ’bɛ valé bɔvɔ sarakanu bo, yé é fɛti kɛlɛ é wuozannu faa lɛ.

Salomɔn bɔrɔdɛ lomu fié lé we ble

¹⁶ Bɔrɔdɛ lomu fié da minwiinzan va, yé wo dɔ a ’lɛ.

¹⁷ A do léé: Anzan, ilé zanté, maa valé an bɔluzan ’ko, ko nyanaan kɔn do gi, yé an né yaa ana mi.

¹⁸ ’Bɛ zuo yi yaa, yé é ’ézé né yaa é ziin. Ko nyanaan ékeva, mi bɛ do kpen ’ka ko va kɔn gi lo, ko mi fié ’té lé.

¹⁹ Le ’ko yia é be ta é béli, amalé é ga.

²⁰ É nwa tu la, yé bléyian va lé i wuole a yigyɛna é an be sia an blinii, yé é a yia é blinii; yé é ’é be gale yia an blinii.

²¹ Bladi pa yé an nwa nyɔ dɔle an be ’léé we gi; yé bé ye, é a é gale. Tu kini é zima aan wo, maa nagini é zima yé bé ye, é ’ka an be lé maa a yaa, a nya lo.

²² Le koɛ léé: Gba, an be a é yuɛma yé i be a é gale. A vininzan a zi pa léé: Gba, i be ga, yé an be a é yuɛma. ’Bɛ zo lé wo we fe minwiinzan yara.

²³ Minwiinzan léé: Le do léé, é be ɛ ke é yuɛma yé i be a é gale; yé a koɛ léé: Gba, i be ɛ ke é gale, yé an be a é yuɛma.

²⁴ Yé é léé: ’Ka da gwɔun nya an lɛ. Yé wo da gwɔun nya minwiinzan lɛ.

²⁵ Yé minwiinzan léé: ’Ka né yuɛmale bɔi fié, ’ka a kuru nɔ a do lɛ yé a kuru do ’é vo a do lɛ.

²⁶ Yé né yuɛmale bu gi kɛlɛ wéii a be lé we ma yé é lé minwiinzan lɛ léé: Aa, anzan, ’i né yuɛmale nɔ a lɛ, té bé gyɛ lo. Naa, a bɔluzan léé: É ’ka voo anzé nya lo, yé é ’ka voo izé nya lo; ’ka bɔi.

²⁷ Yé minwiinzan léé: ’Ka né yuɛmale nɔ le vininzan lɛ, té bé gyɛ lo. Yee ɛ ke a bu nya.

²⁸ Minwiinzan we ’ko yuɛ gi bo fɛan zo, Izraɛlnu faa a ’ma. Yé wa ye léé, Bale lé wedɔɔle a a gi, yé é zi gɔɔn a lɛ alé weblele gi, amalé woo kanaan minwiinzan blɛn lee.