1 Minwiinzannu 22 - Kazambale lé Sebe Sauunu 1979

Balelayezan Misé we lɛ kini Akab lɛ

¹ Lɛɛ yaa gi guli ’ka Siri valé Izraɛl méléna lo.

² Lɛɛ yaazan nya Juda nwiinzan blɛn Jozafat go Izraɛl nwiinzan blɛn va.

³ Izraɛl nwiinzan blɛn lé é wuomunu lɛ léé: Ka ’ka a gi dɔɔa léé, Ramɔt lé ke Galaad tɛrɛ la, é a kozé nya loo? Yé ko ’ka we do kpen kɛlɛna a sile Siri nwiinzan blɛn lee we gi lo.

⁴ Yé é lé Jozafat lɛ léé: É sɔ i lɛ léé, i go an va Ramɔt lé ke Galaad tɛrɛ la, a sile we gii? Jozafat a zi pa Izraɛl nwiinzan blɛn lɛ léé: Kaa go; maa valé bii a do, anlé munu valé ilé munu a do, anlé wisoonu valé ilé wisoonu a do.

⁵ A zuo Jozafat lé Izraɛl nwiinzan blɛn lɛ léé: Ilé zanté, ’i we laa Gakelebale dére lee.

⁶ Izraɛl nwiinzan blɛn balelayemunu zén ékeva, wo mi wuru fié bɔa, yé é lé wo lɛ léé: An go guli dan Ramɔt lé ke Galaad tɛrɛ la, a va, taa, é a lé an sɔn vɔ a maa? Yé wa zi pa léé: ’I go, Mizan é dan a pa lɛ minwiinzan blɛn lee.

⁷ Naa, Jozafat léé: Gakelebale lé balelayezan do kpen ’ka ’ko é dɛrɛ yé ko bɔa we laale lɛ Gakelebale lee a nya loo?

⁸ Izraɛl nwiinzan a zi pa Jozafat lɛ léé: Mi do ana é ziin yé ko bɔa we laale lɛ Gakelebale lee ’bɛ nya; naa, a za a an gi, é ’ka balelawe zin fé an lɛ monomono lo, é balelawe naané saa ɛ fé, azama. Jimla be Misé lé. Yé Jozafat léé: Té minwiinzan é we fe ’bɛ zo lo ma.

⁹ Yé Izraɛl nwiinzan blɛn miblale do laa yé é léé: ’I da Jimla be Misé nya an lɛ.

¹⁰ Izraɛl nwiinzan blɛn valé Juda nwiinzan blɛn Jozafat a é nyanale ’wolé webleblin ta do do, wolé fuasɔ nya wo ta, Samari gɔrɔ ’léé. ’Té balelayemunu faa éé balelawe fé wo ’lɛ.

¹¹ Kénaana be Sédésias foliɛwɔlɛ bélinu kɛlɛ yé é léé: Gakelebale léma: Bélinu ’ko nya lé i dan Siri munu gyɛ lɛ fɔɔ yé i wo guru zana a gi.

¹² Yé balelayezannu faa balelawe duo fe, yé wo léé: ’I go Ramɔt, Galaad tɛrɛ la. A ’wuo é dan vo lɛ i lɛ yé Gakelebale é dan a pa lɛ minwiinzan blɛn lee.

¹³ Nwunvɔzan lé é go Misé laa lɛ, é lé a lɛ léé: Bé ye, balelayezannu dére a do yé wa balelawe néné fena minwiinzan blɛn lɛ; amalé, ka dére ’é kɛlɛ wo nya do ma. ’I we néné fe ma.

¹⁴ Misé a zi pa léé: Gakelebale a é yuɛma. We lé Gakelebale é dan a fe lɛ an lɛ, yee lé maa dan a fe lɛ.

¹⁵ É bɔ minwiinzan blɛn va aan wo, minwiinzan blɛn lé a lɛ léé: Misé, ko go guli dan Ramɔt lé ke Galaad tɛrɛ la, a va, laa, taa, ko diéraa? É a zi pa a lɛ léé: ’I go, a ’wuo é dan vo lɛ i lɛ yé Gakelebale é dan a pa lɛ minwiinzan blɛn lee.

¹⁶ Yé minwiinzan lé a lɛ léé: É a lé maa a fe i lɛ gɔnɔ nɔɔ, léé, ’i bale ’nyɔɔn léé, i dan webozen saa ɛ fe lɛ an lɛ Gakelebale tɔ gii?

¹⁷ Misé a zi pa léé: Maa Izraɛlnu faa ye é nwɛɛnle gɔnu ma bélé ’blanu lé wo tabinzannu ’ka lo, wo zo, yé Gakelebale léé: Munu ’ko, wozan ’ka lo; wo faa do do ’é nɔla drɔɔ ’wolé kɔn ’léé ma.

¹⁸ Izraɛl nwiinzan lé Jozafat lɛ léé: Maa ’ka a fe lɛ i lɛ loo? É ’ka balelawe néné fé an lɛ lo, é balelawe naané saa ɛ fé.

¹⁹ Yé Misé léé: ’I Gakelebale dére ’ma ma. Maa Gakelebale ye é nyanale élé fuablin ta, yé lai sunyanu faa a é dɔle a sɔnɔ, a bɛyila valé a bɛbola.

²⁰ Yé Gakelebale léé: De ɛ dan Akab saan lɛ, yé é go Ramɔt lé ke Galaad tɛrɛ la, ana, yé é gaa? Wa zi pa a lɛ, yé a do a fe ’ko zo, yé a do a fe ’ko zo.

²¹ Yé léli do da Gakelebale ’lɛ, yé é léé: Maa ɛ dan a saan lɛ.

²² Gakelebale lé a lɛ léé: Kaa? É a zi pa léé: Maa dan go lɛ yé maa dan kɛlɛ lɛ vié léli nya alé balelayezannu faa ’léé. Gakelebale léé: I dan a saan lɛ weboen nya. ’I go, bé kɛlɛ a zo.

²³ Yé sin, bé ye, Gakelebale vié léli pa balelayezannu lé ke ’ko, wo ’léé. Yé Gakelebale wenaané fe i ma.

²⁴ Yé Kénaana be Sédésias bié yé é Misé blin gyɛ yé é léé: Gakelebale léli gié kyɛn zia yé é si maa va yé é go bii va wefele i lɛ we gii?

²⁵ Misé a zi pa léé: Yian nya lé i dan i yɔɔnanu gini lɛ kɔnmi zi, i dan ana ye lɛ.

²⁶ Izraɛl nwiinzan blɛn léé: ’Ka Misé si yé ’ka goan flazan Amon valé minwiinzan blɛn be Joas va.

²⁷ ’Ka fe léma: Minwiinzan blɛn léma: ’Ka mi ’ko vɔ bokɔn gi, yé ’ka nyané ble buru valé ’yi nɔ a lɛ fɔɔ yé an da é ziin drɔɔ.

²⁸ Misé léé: Dé i da é ziin drɔɔ na, ’té Gakelebale ’ka we fe lɛ maa nya lo. Yé é lé é ziin léé: ’Kaa munu faa, ’ka ’ma ma.

Akab gale

²⁹ Izraɛl nwiinzan blɛn valé Juda nwiinzan blɛn Jozafat go Ramɔt lé ke Galaad tɛrɛ la, ana.

³⁰ Izraɛl nwiinzan blɛn lé Jozafat lɛ léma: Maa dan an ma nɔla lɛ gulidanle we ma; naa, bii, ibo lé sɔ zén i ta. Yé Izraɛl nwiinzan blɛn é ma nɔla, yé wo go guli dan lɛ.

³¹ ’Té Siri nwiinzan élé goronu nwiinzannu yɔ do wɔlɛ vu ta fié béli dɔ kɔɔn léé: Dé é a mi kiéné nyaoo, dé é a mi blɛn nyaoo, té ka guli dan a va lo; naa, ’ka guli dan Izraɛl munu nwiinzan do kpen ɛ va.

³² Goronu nwiinzannu Jozafat ye aan wo, wo léé: Weboen lé, Izraɛl nwiinzan lé. Yé wo bié guli danle a va we gi. Jozafat siaa dére plɛplɛ nya.

³³ Goronu nwiinmunu a ye aan wo léé, é ’ka Izraɛl nwiinzan blɛn nya lo, wo si a va.

³⁴ Yé mi do élé sa vuli é pla yé é Izraɛl nwiinzan blɛn gyɛ élé gɔlɛtayɔɔfɛ vɔna é ke ’léé na. Minwiinzan blɛn lé élé gorovɔzan lɛ léé: ’I nɔla; ’i an si guli danna na; an tuo.

³⁵ Guli lɛ si yi ’ko nya. Minwiinzan blɛn vo élé goro gi Siri munu yara, yé é ga nyanadi. A tuona nyɛ yoro yé é zana goro gi.

³⁶ Yiri vɔ bléyian va, wo siaa sɔkɔn dɔna faa na: Mi faa do do ’é go ’wolé fla! Yé wo faa do do é go ’wolé tɛrɛ la.

³⁷ ’Bɛ zo lé minwiinzan blɛn ga. Wo goan Samari yé wo minwiinzan blɛn pa Samari.

³⁸ Bléyian va lé wa goro zuruna Samari yi ba gi, blénnu Akab nyɛ flan, ’té bɔrɔdɛ lomu éé zuruwo ana, dére lé Gakelebale a fe, a yɛrama.

³⁹ Akab kɛlɛwe pɔnénu, we faa lé é a kɛlɛ koo, kɔn lé é a dɔ vwii suiɛ nya koo, fla faa lé é wo pa koo, wa é gyɛle Izraɛl nwiinzan blɛnnu lé we zuo fe sɛbɛ gi.

⁴⁰ Akab yi gyɛ é tranu va. A be Akazia pla munu nwiin a pa gi.

Juda nwiinzan blɛn Jozafat

⁴¹ Izraɛl nwiinzan blɛn Akab lɛɛ ziɛnzan nya Aza be Jozafat pla Juda nwiin.

⁴² Bléyian va lé Jozafat kɛlɛ minwiinzan blɛn nya, ’té a lɛɛ a yɔ do wɔlɛ vu ta soru yé é pla munu nwiin Jérusalɛm lɛɛ yɔ do wɔlɛ soru. Wa bu laama Silsi lu Azuba.

⁴³ É tawo é ti Aza lé tawobɛ gi, yé é ’ka é yara si lɛ a ta lo, yé we lé ke é zima Gakelebale yuɛ gi, yee lé é a kɛlɛ.

⁴⁴ Naa, we do ana, é ’ka gɔ nwiin yobannanu si lɛ ana lo; munu éé saraka boo ’té woo lasikɔrɔ no gɔ nwiin yobannanu na.

⁴⁵ Jozafat valé Izraɛl nwiinzan blɛn worona vo drɔɔ.

⁴⁶ Jozafat kɛlɛwe pɔnénu, alé we blɛnblɛnnu kɛlɛle valé alé guli danle?-?nu, wa é gyɛle Juda nwiinzan blɛnnu lé we zuo fe sɛbɛ gi.

⁴⁷ Bɔrɔdɛ lomu pɔnénu lé wo ke ana, é sia a ti Aza bléyi va, é wo si ana.

⁴⁸ Minwiinzan blɛn ’ka Édom lo; gbɔrɔnama ɛ ke é plale wo nwiin.

⁴⁹ Jozafat Taasis ’yitagoronu kɛlɛ léé, ’wo go Ofii kyan ginile we gi; naa, wo ’ka go lɛ lo, ’yitagoronu sɛrɛ Esijɔn‐Gébɛɛ, azama.

⁵⁰ Yé Akab be Akazia lé Jozafat lɛ léé: É sɔ i lɛ léé, an wuozannu é go i wuozannu va ’yitagoronu gii? Yé Jozafat ’ka a nyi si lɛ lo.

⁵¹ Jozafat yi gyɛ é tranu va, yé wa pa é tranu va, é tra David lé fla. Yé a be Joram pla munu nwiin a pa gi.

Izraɛl nwiinzan blɛn Akazia

⁵² Juda nwiinzan blɛn Jozafat lɛɛ vu ta sɔrafiézan nya, Akab be Akazia pla Izraɛl nwiin Samari. É pla Izraɛl nwiin lɛɛ fié.

⁵³ We lé ke é naané Gakelebale yuɛ gi, yee lé é a kɛlɛ, yé é tawo é ti valé é bu koo, Nébat be Jéroboam lé é Izraɛl kɛlɛ wenyané kɛlɛzannu nya koo, wo gane pa gi.

⁵⁴ É Baal bɔ yé é dia é bli la a ’lɛ, yé é Gakelebale Izraɛl lé Bale bli fli, a ti a kɛlɛ fɛan zo, a zo.