1 Minwiinzannu 21 - Kazambale lé Sebe Sauunu 1979

Nabɔt lé dɔrɔféi

¹ We lé é bɔ we ’konu zuo, yee lé ke ’ko. Jizréɛl mi Nabɔt lé dɔrɔféi ana Jizréɛl, Samari nwiinzan blɛn Akab lé kɔn bɛ do la.

² Yé Akab we fe Nabɔt lɛ léé: ’Ilé dɔrɔféi nɔ an lɛ yé maa a kɛlɛ anlé zianféi nya, naa, é a anlé kɔn punma. Dɔrɔféi lé ke é zima é mini a ta, maa dan ’bɛ nɔ lɛ i lɛ; dé ’bɛ kaan lo, maa a lɔa gɔɔli nya, ’té dé ’bɛ sɔ i lɛ.

³ Naa, Nabɔt a zi pa Akab lɛ léé: Té Gakelebale a nyi si léé, maa an tinu zarafɛ nɔ i lɛ lo.

⁴ Akab wɔra élé kɔn gi é bli kyɛ dɔle valé bli flile nya, dére ’ko lé Jizréɛl mi Nabɔt a fe a lɛ, a we ma. Nabɔt léé: Maa ’ka dan an tinu zarafɛ nɔ lɛ i lɛ lo. Yé é yia élé yialafɛ ta, yé é yara dɔ kɔnguru ma zia yé é ’ka fɛ do kpen ble lɛ lo.

⁵ A na Jézabɛl da a va yé é lé a lɛ léé: Mɛmalé i bli kyɛ dɔ yé i ’ka fɛ blé loo?

⁶ É a zi pa a lɛ léé: Maa we fe Jizréɛl mi Nabɔt lɛ yé maa lé a lɛ léé, élé dɔrɔféi nɔ an lɛ gɔɔli ma, dé ’bɛ kaan lo, dé é sɔ a lɛ, maa dan dɔrɔféi bɛ nɔ lɛ a lɛ a lɛ gi. Naa, é léé, é ’ka dan élé dɔrɔféi nɔ lɛ an lɛ lo.

⁷ Yé a na Jézabɛl lé a lɛ léé: Bian i ke é plale Izraɛl nwiin loo? ’I nwa, ’i fɛ ble, i gi ’é nana; maa dan Jizréɛl mi Nabɔt lé dɔrɔféi nɔ lɛ i lɛ.

⁸ Yé Jézabɛl sɛbɛnu gyɛ Akab tɔ gi yé é wo lɛ tan zɔrɔkaanyɔɔ nya, yé é Akab lé bɛmazéné dɔra wo ta nuu, yé é wo pa mi segelenu valé minwiinmunu lé wo ke Nabɔtnu nya fla do la, wo lɛ zia.

⁹ We lé é a gyɛ sɛbɛ ’konu gi, yee lé ke ’ko: ’Ka lɔrɔ sɔnle zana dɔɔ munu lɛ; ’ka Nabɔt nyana munu ’lɛ,

¹⁰ yé ’ka mi naané fié dɔ a yara yé ’wo we fe a ma léé, é bale pa Bale valé minwiinzan blɛn ma. A zuo ’ka go a nya béera, ’ka gɔlɛ vuli a va yé ’é ga.

¹¹ Nabɔt lé flamunu koo, mi segelenu valé minwiinmunu lé wo ke fla ’ko ta koo, wa kɛlɛ bélé fɛan zo lé Jézabɛl a fe wo lɛ, a zo, we lé é ke é gyɛle sɛbɛnu lé é a pa wo lɛ zia, wo gi, a yɛrama.

¹² Wo lɔrɔ sɔnle zana dɔɔ munu lɛ yé wo Nabɔt dɔ munu ’lɛ;

¹³ mi naané fié da yé wo dɔ a yara yé wo we fe munu lɛ Nabɔt ma ’ko zo léé: Nabɔt bale pa Bale valé minwiinzan blɛn ma. A zuo, wo goan flagini ma yé wo gɔlɛ vuli a va yé é ga.

¹⁴ Yé wo we pa Jézabɛl lɛ zia léé, wo Nabɔt gyɛ gɔlɛ nya yé é ga.

¹⁵ Jézabɛl a ’ma aan wo léé, wo Nabɔt gyɛ gɔlɛ nya yé é ga, é lé Akab lɛ léé: ’I nwa, Jizréɛl mi Nabɔt lé dɔrɔféi lé é ’ka a nyi si lɛ léé, é a nɔ i lɛ gɔɔli ma lo, bé si; naa, Nabɔt ’ka é yuɛma é dɛrɛ lo, é ga.

¹⁶ Akab a ’ma aan wo léé, Nabɔt ga, é nwa yé é go Jizréɛl mi Nabɔt lé dɔrɔféi si lɛ ézé nya.

¹⁷ Yé Gakelebale lé Tisibi mi Éli lɛ léma:

¹⁸ ’I nwa, ’i go Izraɛl nwiinzan blɛn Akab va Samari; é a Nabɔt lé féi, ana lé é a gona a sina ézé nya.

¹⁹ Bé fe a lɛ léma: Gakelebale léma: Bii ’ka migyɛzan valé kyeenwozan nya loo? Yé bé fe a lɛ léma: Gakelebale léma: Fɛana lé blénnu Nabɔt nyɛ flan, ana duo lé wo dan ibozen nyɛ flan lɛ.

²⁰ Akab lé Éli lɛ léé: An nyanézan, i an yee? Yé é a zi pa léé: We lé ke é naané Gakelebale yuɛ gi, ibo nɔ a kɛlɛle lɛ, amalé maa i ye.

²¹ Bé ye, maa dan we tɔntɔn bɔ lɛ i ma; maa dan i sia lɛ bélé bli zo, dé mian ke Akab zé nya, dé é a luu nyaoo, dé é a miné nyaoo, dé wa Izraɛl tɛrɛ faa la, maa dan wo kulu ga lɛ tata,

²² yé maa dan i gɔnɔlamunu zé kɛlɛ lɛ bélé Nébat be Jéroboam valé Akija be Baésa gɔnɔlamunu zé zo, i an bli fli yé i Izraɛl kɛlɛ wenyanékɛlɛzannu nya, azama.

²³ Gakelebale Jézabɛl ma we fe é ziin, yé é léé: Blénnu é dan Jézabɛl ble lɛ Jizréɛl flazigɔrɔ sɔnɔ.

²⁴ Dé Akab lé mian é ga fla, blénnu é dan a ble lɛ, dé alé mian é ga féi, lagi mianénu é dan a ble lɛ.

²⁵ We lé ke é naané Gakelebale yuɛ gi, mi lé ébo nɔ ’bɛ kɛlɛle lɛ bélé Akab zo, ’bɛzan ’ka lo, ’té a na Jézabɛl a nyunuan.

²⁶ É wenaané kɛlɛ é baba, gole nya miyilinu zuo bélé Amoré munu lé Gakelebale wo bin Izraɛl munu ’lɛ, wo zo.

²⁷ Akab dére ’konu ’ma Éli ta aan wo, élé sɔnu fia, yé é bɔlɔ zén é ta sɔ nya yé é lɔrɔ sɔn; é yii bɔlɔ ’ko nya é ta yé é tawo wɔɔɔ.

²⁸ Yé Gakelebale lé Tisibi mi Éli lɛ léé:

²⁹ Akab ébo kɛlɛ kiéné an ’lɛ fɛan zo, bé yee? Ébo kɛlɛ kiéné an ’lɛ, bɛwemalé maa ’ka dan we tɔntɔn bɔ lɛ a ma a yuɛma bléyi va lo; a be lé tɛrɛla bléyi va lé maa dan we tɔntɔn bɔ lɛ alé munu ma.