1 Minwiinzannu 20 - Kazambale lé Sebe Sauunu 1979

Akab Sirinu nwiinzan blɛn kele

¹ Sirinu nwiinzan blɛn Bɛn‐Adad élé sunyanu faa zén ékeva; minwiinzan blɛn yɔ do wɔlɛ vu ta fié koo, wisoonu koo, goronu koo, wa a va. É go yé é Samari mabɛn yé é guli vɔ wo lɛ.

² É munu nwunvɔ fla Izraɛl nwiinzan blɛn Akab va, a fele a lɛ we gi léé: Bɛn‐Adad léma:

³ Ilé gɔɔli valé ilé kyan a anzé nya, i nanu valé ilé nénu va né nɔnɔminu a anzé nya.

⁴ Izraɛl nwiinzan blɛn léé: Anzan, minwiinzan, maa valé anlé fɛnu faa a izé nya, bé fe fɛan zo, a zo.

⁵ Nwunvɔzannu da é ziin yé wo léé: Bɛn‐Adad léma: Ilé gɔɔli koo, ilé kyan koo, i nanu valé ilé nénu koo, i dan wo nɔ lɛ ’é lɛ.

⁶ Amalé tɛlɛ, bléyi ’ko va, é dan é wuomunu pa lɛ zia i va; wo dan ilé kɔn valé i wuozannu lé kɔnnu gi puo lɛ yé fɛ faa lé ke i lee fɛwezan nya, wo dan a si lɛ.

⁷ Izraɛl nwiinzan blɛn élé tɛrɛ la mi segelenu faa laa yé é léé: ’Ka gini, yé ka gi dɔɔ léé, mi ’ko a a va léé, é we naané kɛlɛ ko lɛ; naa, é we pa an lɛ zia, an nanu valé anlé nénu koo, anlé gɔɔli valé anlé kyan koo, a ma laale we gi yé maa ’ka a gba vɔ lɛ a lɛ lo.

⁸ Mi segelenu faa valé munu faa lé Akab lɛ léé: Té i tɔné dɔ a lɛ lo, té bé nyi si lo.

⁹ Yé é lé Bɛn‐Adad lé nwunvɔmunu lɛ léé: ’Ka fe anzan minwiinzan lɛ léma: We faa lé bé laa i wuozan lee é vinin bɛ, maa nyi si, naa, we ’ko, an ’ka bɔa ’bɛ kɛlɛle lɛ lo. Nwunvɔmunu go yé wa zi pa dére fe Bɛn‐Adad lɛ.

¹⁰ Bɛn‐Adad we pa Akab lɛ zia léé: Dé Samari lé vun an vamunu faa bɛ nya do do fan, balenu ’é we kɛlɛ an lɛ wolé plɛplɛ faa nya ma.

¹¹ Izraɛl nwiinzan blɛn a zi pa léé: Mi lé é ke gulidanfɛnu zénna ’é ta, té ébo tɔ bɔ bélé mi lé ’bɛ ke wo sina ’é ta, ’bɛzan zo lo.

¹² Bɛn‐Adad we zi pa dére ’ko ’ma bléyian va, ’té é a nwɛ minina minwiinzannu va sɔkɔnnu wuo, yé é lé é wuomunu lɛ léé: ’Ka ma’lɛrɛ! Kaa bɔra fla mi.

¹³ Naa, balelayezan do bié Izraɛl nwiinzan blɛn Akab va yé é léé: Gakelebale léma: I mi gbau ’ko yee? Maa dan wo pa lɛ i lee kyɔ yé bé gi dɔɔ léé, maa a Gakelebale nya.

¹⁴ Akab léé: Mi kyɛn nyaa? Yé é a zi pa léé: Gakelebale léma: Tɛrɛpalunu nwiinmunu wuozannu nya lé. Akab léé: De ɛ dan dɔ lɛ yee guli zi ’lɛɛ?

¹⁵ Yé é léé: Bii lé. Yé wo tɛrɛpalunu nwiinmunu wuozannu gié Akab ’lɛ yé é a ye léé, wa mi wuru do yɔ do wɔlɛ vu ta fié; ’bɛ zuo wo Izraɛl lé nénu faa gié a ’lɛ, yé wo kɛlɛ mi baa yaa wuru soru.

¹⁶ Wo bɔra é yiéyi. Bɛn‐Adad a nwɛ minina fɔɔ yé nwɛ a gyɛ sɔkɔnnu wuo, minwiinzannu yɔ do wɔlɛ vu ta fié lé wo da bɔ lɛ a va, wo va.

¹⁷ Tɛrɛpalunu nwiinmunu wuozannu bɔra é vinin. Yé Bɛn‐Adad a ’ma, yé wa fe a lɛ léé, munu a sina Samari.

¹⁸ É léé, Dé wo da drɔɔ, ’ka wo kun é yuɛma; dé wo da guli nya, ’ka wo kun é yuɛma.

¹⁹ Tɛrɛpalunu nwiinmunu wuozannu valé sunyanu lé woo goo wo zuo, dé wo si fla

²⁰ wo faa do do wozé mi gyɛ, yé Sirimunu vɔ fli gi. Izraɛl wo zuo bin. Siri nwiinzan blɛn Bɛn‐Adad vɔ fli gi élé wisoo ta, élé wisootamunu va.

²¹ Izraɛl nwiinzan blɛn bɔra yé é wisoonu gyɛ yé é goronu sɛrɛ yé é Sirimunu kele bɛblɛɛ.

²² Yé balelayezan bié Izraɛl nwiinzan blɛn va, yé é lé a lɛ léé: ’I go, ’ibo dɔ plɛplɛ, bé gini, yé dé i dan wean kɛlɛ lɛ, bé gi dɔɔ; naa, lɛɛ bɛ gi Siri nwiinzan blɛn é dan nwa lɛ i ma é ziin.

²³ Siri nwiinzan blɛn wuomunu lé ’é lɛ léé: Wolé bale a gɔ ma bale nya; bɛwemalé wa plɛplɛ é mini ko ta. Naa, kaa guli dan wo va fɛna pɛblɛɛna, yé dé ko plɛplɛ ’ka mini lɛ wo ta lo, ko dan a ye lɛ.

²⁴ Bé kɛlɛ ’ko zo ma: ’i minwiinzannu si wo dɔna do do yé ’i sunyanu nwiinzannu dɔ wo pa gi;

²⁵ ’i sunya palu kɛlɛ bélé é vinin zé zo, wisoonu valé goronu é ziin, wo ’léé ’é kɛlɛ bélé é vinin zé zo. Yé ko dan guli dan lɛ wo va fɛna pɛblɛɛna, yé dé ko plɛplɛ ’ka mini lɛ wo ta lo, ko dan a ye lɛ. É tɔné dɔ wo lɛ yé é a kɛlɛ a zo.

²⁶ ’Bɛ zuo lɛɛ gi, woo Sirimunu gié Bɛn‐Adad ’lɛ yé é go Afɛk vazia, guli danle Izraɛl va we gi.

²⁷ Izraɛl lé nénu é ziin, wo wo gié wo nwiinzan ’lɛ; wo fɛblele si yé wo go kee lɛ Sirimunu nya. Wo nyana sɔkɔn gi wo yara, bélé boli paluné fié zo, yé Sirimunu ana tɛrɛ faa ta ble.

²⁸ Bale lé mi bié, yé é lé Izraɛl nwiinzan blɛn lɛ léé: Gakelebale léma: Sirimunu a fe léé, Gakelebale a gɔnu ma bale nya yé é ’ka gɔ méléna bale nya lo, bɛwemalé maa dan mi gbau ’ko pa lɛ i lee, yé ka dan a gi dɔɔ lɛ léé, maa a Gakelebale nya.

²⁹ Wo nyana wo ke yara yi sɔrafié. A yi sɔrafiézan nya wo guli sia, yé Izraɛl munu Siri munu lé ganela sunyanu gyɛ mi baa yɔ fié wɔlɛ vu yi do kpen nya.

³⁰ A pɔnénu vɔ fli gi yé wo go Afɛk yé flagɔrɔ zana mi baa vu ta yaa mi wuru soru lé wo vo, wo ta. Bɛn‐Adad vlan buru fla, yé é go wɔrale nya kɔnnu gi.

³¹ A wuozannu lé a lɛ léé: Bé ye, ko a ’ma léé, Izraɛl nwiinzannu a nyanai zén mitazannu nya; ko dan bɔlɔ dɔ lɛ ko gyɛn, yé ko dan bale dɔ lɛ ko ’wuo ma, yé ko dan go lɛ Izraɛl nwiinzan blɛn va; dé é dan ko vo lɛ é yuɛmaa?

³² Yé wo bɔlɔ dɔ wo gyɛn yé wo bale dɔ wo ’wuo ma yé wo go Izraɛl nwiinzan blɛn va. Wo léé: I wuozan Bɛn‐Adad léma: ’I é vo é yuɛma. Akab léé: É a tan é yuɛmaa? An bwe lé.

³³ Dére ’ko kɛlɛ munu ’konu lɛ tɔmase zima nya yé wo lé é kele léé: Bɛn‐Adad a i bwe nya. Yé é léé: ’Ka go ’ka da a nya an lɛ. Bɛn‐Adad da a va yé Akab a vɔ élé goro gi.

³⁴ Bɛn‐Adad lé a lɛ léé: Fla faa lé an ti a si i ti lee, maa dan wo nɔ lɛ i lɛ wo pai, yé ilé zinu é dan kɛlɛ lɛ Damas fɛan zo lé an ti zé kɛlɛ Samari, a zo. Yé Akab léé: Maa é ziin, maa dan daan lɛ i ma, ’té dé ko gi pa do. Yé é gi pa do a va yé é daan a ma yé é go.

Balelayezan do we dɔ Akab nwiin

³⁵ Balelayezannu va mi do lé é bɔluzan lɛ Gakelebale dére nya léé: Ilé zanté, ’i an bla. Naa, mi ’ko ’ka a blale nyi si lɛ lo.

³⁶ Yé é lé a lɛ léé: Bé ye, i ’ka Gakelebale dére lɛdɔ lɛ a ma lo, amalé dé i si an va golizra é dan i gyɛ lɛ. É si a va aan wo, wo valé golizra kee yé ’bɛ a gyɛ.

³⁷ É mi do ye é ziin yé é léé: Ilé zanté, ’i an bla. Mi ’ko a bla yé é a tuo.

³⁸ Balelayezan go yé é dɔ minwiinzan ’lɛ zia, yé é ’é ma nɔla sɔbɛné vurule nya é yuɛnu ta.

³⁹ Minwiinzan blɛn a giéna bléyian va, é siaa a lɛ yé é léé: I wuozan a guli méléna; yé bé ye, mi do bié yé é da mi do nya an va yé é léé: ’I yuɛ pa gɔné ’ko va; dé é san, i dan ga lɛ a pa gi, dé ’bɛ kaan lo, ’i gɔɔlifu talan do no.

⁴⁰ Yé i wuozan yuɛi kyɛ a bléyian va, gɔnézan san. Izraɛl nwiinzan blɛn léé: Ibo lé we lé bé ble i boan bɛ.

⁴¹ Tɔɔn, balelayezan sɔbɛné si é yuɛ la yé Izraɛl nwiinzan a dɔɔ balelayezannu va mi do nya.

⁴² Yé é lé minwiinzan blɛn lɛ léé: Gakelebale léma: Mi lé maa bale pa a ma léé, ’wa pa fwi tɛrɛ la, i daan a ma, amalé i dan ga lɛ a pa gi, yé ilé munu a alé munu pagizannu nya.

⁴³ Izraɛl nwiinzan blɛn go ’é va ’é yara kyɛ vɔle nya a gi valé bliflile nya, yé é bɔ Samari.