1 Minwiinzannu 2 - Kazambale lé Sebe Sauunu 1979

David é dére voélanu vo Salomɔn va

¹ David gabléyi a bɔna aan wo, é dére vo é be Salomɔn va léma:

² Maa a gona tɛrɛ faa lé zi siana. ’I bli ta dɔ plɛplɛ, ’i kɛlɛ gɔné nya.

³ ’I Gakelebale, ilé Bale lé bélidɔwenu sɔnnénu pa, ’i tawo alé zinu ta, ’i alé bélidɔwe pun tawe kɛlɛ, ’i a dére tawe kɛlɛ, ’i alé webledére tawe kɛlɛ, ’i alé wepladére tawe kɛlɛ, fɛan zo lé wa gyɛ Moizi lé bélidɔwe gi, a zo, yé dé i wean kɛlɛoo, dé i go fɛanaoo, yé a lɛ é sɔɔ i lɛ é zima,

⁴ yé we lé Gakelebale a fe an lɛ, yé a lɛ é sɔɔ. Gakelebale lé an lɛ léma: Dé i benu ’wo yuɛ pa ’wolé tawobɛ va, dé wo tawo an ’lɛ yarapalale koo, wo bli faa koo, wo léli faa koo, wo nya, i ’ka dan vuru lɛ i paizan nyanale ma Izraɛl lé webleblin ta monomono lo.

⁵ We lé Séruja be Joab a kɛlɛ an lɛ, yé we lé é a kɛlɛ Izraɛl lé sunyanu nwiinzannu fié, Nɛɛ be Abinɛɛ valé Jétɛɛ be Amasa lɛ, bé gi dɔɔ. É wo gyɛ; é mi nyɛ zana vole drɔɔ bléyi va bélé guli dan bléyi zo, yé é gulidannyɛ pa kyɛsidi lé ke a gyɛn valé sawala lé ke a gane ma, wo ma.

⁶ ’I we kɛlɛ ilé wedɔɔle yɛrama, dé a nwana bɔoo, té bé nyi si léé, é go drɔɔ gamunu nyanana lo.

⁷ ’I Galaad mi Baazilai benu mawe kɛlɛ é zima, munu lé woo fɛ blé ilé tablé ta, ’wa wo vamunu nya ma; naa, wo an mawe kɛlɛ a zo, bléyian va lé an vɔ fli gi i bwe Abusalɔm lee, a bléyi va.

⁸ Bé ye, Bɛnjamɛn mi lé é si Basurim, Géra be Siméi a i va. Yian nya lé maa a gona Maanaim é bale pa an ma plɛplɛ. Naa, é da an si lɛ zia Juudɛn ba gi, yé maa Gakelebale ’nyɔɔn a lɛ léé: An ’ka dan i gyɛ lɛ gwɔun nya lo.

⁹ Sin, té bé vo yé wo ’ka we lɛ dɔa a gi lo lo; naa, i a wedɔɔzan nya yé we lé é a lé bé kɛlɛ a lɛ, bé gi dɔɔ. Bé kɛlɛ léé, dé a nwana bɔoo, ’é go gamunu nyanana nyɛ nya é ta.

David gale

¹⁰ David yi gyɛ é tinu va yé wa pa David lé fla.

¹¹ David pla Izraɛl nwiin lɛɛ yɔ fié; é pla wo nwiin lɛɛ sɔrafié, ’té é a Ébrɔn, yé é pla wo nwiin lɛɛ yɔ do wɔlɛ vu ta yaa, ’té é a Jérusalɛm.

¹² Salomɔn nyana é ti David lé webleblin ta, yé é pla mi nwiin gligli.

Adonija gale

¹³ Agit be Adonija go Salomɔn bu Bat‐Sééba va. ’Bɛ lé a lɛ léé: I dagiwe a drɔɔ? É a zi pa léé: Iin.

¹⁴ Yé é lé é ziin léé: ’An dére do fé i lɛ.

¹⁵ ’Bɛ lé a lɛ léé: Bé fe. Yé é léé: Bé gi dɔɔ léé, kɛlɛle minwiinzan se a anzé nya yé Izraɛl munu faa yuɛ a an lɛ léé, ’an pla wo nwiin. Naa, kɛlɛle minwiinzan nya se nɔla yé é kɛlɛ an zuané zé nya, Gakelebale a nɔ a lɛ, azama.

¹⁶ Sin, maa we do laa i lee. Té bé nyané kɛlɛ an lɛ lo.

¹⁷ ’Bɛ léé: Bé fe. Yé é léé: Ilé zanté, bé fe minwiinzan Salomɔn lɛ léé, ’é Sunɛm le Abisag nɔ an lɛ an na nya, naa, é ’ka dan a fe lɛ bii lɛ gba lo.

¹⁸ Bat‐Sééba léé: Maa ’ma. Maa dan ilé we fe lɛ minwiinzan blɛn lɛ.

¹⁹ Bat‐Sééba go minwiinzan Salomɔn va Adonija lé we fele a lɛ we gi. Minwiinzan nwa a sile zia we gi, yé é yia é bli la a ’lɛ, yé é nyana élé webleblin ta. Wo da blin nya minwiinzan bu zé nya, yé é nyana a bɛyila.

²⁰ A zuo é léé: Maa a we kiéné laana i lee, té bé nyané kɛlɛ an lɛ lo. Yé minwiinzan lé a lɛ léé: An bu, bé laa, naa, maa ’ka dan a nyané kɛlɛ lɛ i lɛ lo.

²¹ É léé: ’Wo Sunɛm le Abisag nɔ i bwe Adonija lɛ a na nya ma.

²² Minwiinzan Salomɔn a zi pa é bu lɛ léé: Mɛmalé i Sunɛm le Abisag ma laa Adonija zé nyaa? ’I kɛlɛle minwiinzan nya se ma laa azé nya é ziin. Naa, é a an bwe nya . . . yee koo, Balebanzan Abiataa koo, Séruja be Joab koo, bé ma laa wo faa zé nya.

²³ Yé minwiinzan Salomɔn Gakelebale ’nyɔɔn léé: Dére lé Adonija a fe ’ko, dé a ma ban ’ka alé tɛrɛla nyaale nya lo, Gakelebale ’é we kɛlɛ an lɛ élé plɛplɛ faa nya ma.

²⁴ Sin, Gakelebale lé é an dɔ gligli yé é an nyana an ti David lé webleblin ta, yé é anlé kɔn kɛlɛ kyɔ élé blikɛlɛlɛdére yɛrama, é a é yuɛma; kyɔ, Adonija é dan ga lɛ.

²⁵ Yé minwiinzan Salomɔn Jéojada be Bénaja nwunvɔ yé é a gyɛ, yé Adonija ga.

Wo Abiataa bin — Joab gale

²⁶ A zuo minwiinzan blɛn lé Balebanzan Abiataa lɛ léé: ’I go Anatɔt, ibozen lé tɛrɛnu ta, naa, a yara a lé i ga; naa, i Mizan Gakelebale lé kɛsu kɔné si an ti David yara, yé i wɔra an ti lé nyanéblelenu faa gi, amalé maa ’ka dan i gyɛ lɛ kyɔ lo.

²⁷ ’Bɛ zo lé Salomɔn Gakelebale lé balebannyanama si Abiataa lee, we lé Gakelebale a fe Silo Éli lé munu lé we ma, a lɛ sɔɔle we gi.

²⁸ Joab lé é go Adonija zuo, dɔlé ’té é ’ka go lɛ Abusalɔm zuo lo, é we ’ko ’ma. Yé Joab ’é ta yɔɔ Gakelebale lé sɔkɔn gi yé é kun balebanna bélinu ma.

²⁹ Wa fe minwiinzan Salomɔn lɛ léé, Joab ’é ta yɔɔ Gakelebale lé sɔkɔn gi yé é a balebanna sɔnɔ. Yé Salomɔn Jéojada be Bénaja nwunvɔ yé é léé: ’I go, bé gyɛ.

³⁰ Bénaja bɔ Gakelebale lé sɔkɔn ma yé é lé Joab lɛ léé: ’I bɔra. Minwiinzan ɛ fe. Naa, é a zi pa léé: Gba, an gaan ’ko. Bénaja go a zuo fe lɛ minwiinzan lɛ léé, ’ko zo lé an we fe Joab lɛ, yé ’ko zo lé é a zi pa an lɛ.

³¹ Minwiinzan lé Bénaja lɛ léé: É a fe fɛan zo, bé kɛlɛ a zo; ’bɛ zo lé nyɛ lé Joab a zana é pla, ’té a zanamawe ’ka bɛ lo, i dan a si lɛ maa valé an ti lé kɔngimunu nwiin.

³² Gakelebale é dan a nyɛwe dɔ lɛ abo nwiin, naa, mi fié lé wo ke tegele, ’té wo ke mi zinnu nya é mini yee ta, é ’bɛnu gyɛ gwɔun nya an ti ma trɔnné va, yé wo ga; Izraɛl lé sunyanu nwiinzan Nɛɛ be Abinɛɛ valé Juda lé sunyanu nwiinzan Jétɛɛ be Amasa lé.

³³ Wo nyɛwe a Joab valé é kulunu nwiin lɛɛfaama; naa, David koo, é kulu koo, élé kɔn koo, élé webleblin koo, Gakelebale é dan wo vo lɛ drɔɔ lɛɛfaama.

³⁴ Jéojada be Bénaja go yé é Joab gyɛ yé é ga. Yé wa pa élé kɔn gi, bwi gi.

³⁵ Minwiinzan blɛn Jéojada be Bénaja dɔ sunyanu faa nwiinzan nya Joab pa gi, yé é Balebanzan Sadɔk dɔ Abiataa pa gi.

Siméi gale

³⁶ Minwiinzan Siméi laa yé é lé a lɛ léé: ’Ilé kɔn dɔ Jérusalɛm; ’i nyana ’bɛna; té i bɔra gole ’ko valé ’kona we gi lo.

³⁷ Bé gi dɔɔ é zima léé, dé i bɔra yé i Sédrɔn yuu kini yian ma, i dan ga lɛ ’bɛ yi duo nya; i nyɛ é dan dɔ lɛ ibo nwiin.

³⁸ Siméi a zi pa minwiinzan lɛ léé: ’Bɛ a é zima; we lé anzan minwiinzan a fe, i wuozan é dan a kɛlɛ lɛ. Yé Siméi mɔn Jérusalɛm.

³⁹ Lɛɛ yaa nyaale zuo, é kɛlɛ léé, Siméi wuozannu fié vɔ fli gi yé wo go Gat minwiinzan Maaka be Akis va. Wa zuo fe Siméi lɛ léé: Bé ye, i wuomunu a Gat.

⁴⁰ Siméi nwa yé é nyanalafɛ pla élé sokofale punu yé é go Akis va Gat, ’é wuozannu ginile we gi. Yé Siméi go yé é wuomunu si Gat yé é da wo nya.

⁴¹ Wa fe Salomɔn lɛ léé, Siméi si Jérusalɛm yé é go Gat yé é da é pai.

⁴² Minwiinzan Siméi laa yé é lé a lɛ léé: Maa ’ka Gakelebale ’nyɔɔn lɛ i lɛ, yé maa ’ka a fe lɛ i lɛ wéiin léé, dé i bɔra yian ma gole ’ko valé ’kona we gi, i dan ga lɛ a yi nya, loo? Yé i ’ka a zi pa lɛ an lɛ léé, ’é a ’ma, é a zima, loo?

⁴³ Mɛmalé ’naan, anlé Gakelebale ’nyɔɔnle valé we lé maa i béli dɔ a nya, i ’ka tawo lɛ a ta loo?

⁴⁴ Yé minwiinzan lé Siméi lɛ léé: Wenyané faa lé bé kɛlɛ an ti David lɛ, bé gi dɔɔ i bli gi; Gakelebale ’é ilé weple dɔ i nwiin ma.

⁴⁵ Naa, minwiinzan Salomɔn drɔɔ é dan vo lɛ yé David lé webleblin é dan dɔ lɛ gligli Gakelebale yara yifaama.

⁴⁶ Yé minwiinzan blɛn ’é dérenu fe Jéojada be Bénaja lɛ, yé ’bɛ bɔra yé ’bɛ Siméi gyɛ; yé Siméi ga. ’Bɛ zo lé kɛlɛle minwiinzan blɛn nya se dɔ gligli Salomɔn lee.