1 Minwiinzannu 19 - Kazambale lé Sebe Sauunu 1979

Éli go Orɛb gɔ nwiin

¹ We faa lé Éli a kɛlɛ yé é Baal lé balelayezannu gyɛ fɛan zo, Akab a zuo fe Jézabɛl lɛ.

² Jézabɛl mi nwunvɔ Éli va a fele a lɛ we gi léé: Tɛlɛ, bléyi ’ko va, i we kɛlɛ wo lɛ fɛan zo, dé maa ’ka we kɛlɛ lɛ bii lɛ a zo lo, balenu ’é we kɛlɛ an lɛ wolé plɛplɛ faa nya ma.

³ Éli a ’ma aan wo, é nwa yé é vɔ fli gi, té é ga lo we gi. Bɛɛ‐Sééba lé ke Juda zé nya, é bɔ ’bɛna yé é wuozan vo ana.

⁴ Yeebozen go bwi gi, yé é tawo yi do yé é nyana jénɛyili wuo yé é ga laa léé: ’Bɛ a é yi. Sin, Gakelebale, ’i an léli si, naa, an ’ka mini lɛ an tranu ta lo.

⁵ É yia yé é yi gyɛ jénɛyili wuo. Yé bé ye, lanje do é bɛ mane a ma yé ’bɛ lé a lɛ léé: ’I nwa, ’i fɛ ble.

⁶ É a nagini, ’té gato lé ke é dɔnele gɔlɛ kyɛdɔle ta, é valé ’yibɔ do a a ’wuoplalafɛ sɔnɔ. É fɛ ble yé é fɛ mini yé é yia é ziin.

⁷ Gakelebale lé lanje da a gɔnɔ fiézan nya yé ’bɛ é bɛ mane a ma yé ’bɛ léé: ’I nwa, ’i fɛ ble, naa, zi a grɔgrɔ i ma.

⁸ É nwa, é fɛ ble yé é fɛ mini; yé plɛplɛ lé fɛblele ’ko a nɔ a lɛ, a nya lé é tawo yiéyi yɔ fié valé béli yɔ fié fɔɔ yé é bɔ Bale lé gɔ Orɛb ma.

⁹ ’Bɛna é wɔra gɔmaguru gi yé é tu kini ana. Yé bé ye, Gakelebale lé a lɛ léé: Éli, i a mɛ kɛlɛna koo?

¹⁰ É a zi pa léé: Maa Gakelebale, lai sunyanu lé Bale lé we kɛlɛ an sɔbɛla nya; naa, Izraɛl lé nénu ilé gipawe vo yé wo i bannanu zana a gi yé wo ilé balelayezannu gyɛ gwɔun nya; maa ɛ vo, an do kpen, yé wa kwa kulina léé, wo anlé tɛrɛla nyaa.

¹¹ Gakelebale léé: ’I bɔra, ’i dɔ gɔ ma Gakelebale ’lɛ. Yé bé ye, Gakelebale gié. Fu gié plɛplɛ é baba yé é gɔ fee gyɛ yé é gɔlɛnu ’wii Gakelebale ’lɛ; Gakelebale ’ka fu gi lo. Fu giéle zuo, tɛrɛ ma nyɔɔn; Gakelebale ’ka tɛrɛ ma nyɔɔnle gi lo.

¹² Tɛrɛ ma nyɔɔnle zuo, kyɛ kɛlɛ; Gakelebale ’ka kyɛ gi lo. Kyɛ é zuo gun gyɛle néné drɔɔ do da.

¹³ Éli a ’ma aan wo é sɔ bua é yara yé é bɔra yé é dɔ gɔmaguru ’léé. Yé bé ye, dére do lé a lɛ léé: Éli, i a mɛ kɛlɛna ’koo?

¹⁴ É a zi pa léé: Maa Gakelebale, lai sunyanu lé Bale, lé we kɛlɛ an sɔbɛla nya; naa, Izraɛl lé nénu ilé gipawe vo yé wo i bannanu zana a gi, yé wo ilé balelayezannu gyɛ gwɔun nya; maa ɛ vo, an do kpen, yé wa kwa kulina léé, wo anlé tɛrɛla nyaa.

¹⁵ Gakelebale lé a lɛ léé: ’I go, ’i zi sia é ziin bwi gi fɔɔ yé i bɔ Damas; dé i bɔ ’bɛna ’i nyɔnɔ zén Azaɛl nwiin a kɛlɛle Siri nwiinzan blɛn nya we gi.

¹⁶ ’I nyɔnɔ zén Nimisi be Jéu nwiin yé é kɛlɛ Izraɛl nwiinzan blɛn nya; yé i nyɔnɔ zén Abɛl‐Méola mi Safat be Élizé nwiin yé ’é kɛlɛ i pa gi balelayezan nya.

¹⁷ Yé é dan kɛlɛ lɛ léé, mian é so Azaɛl lé gwɔun lee, Jéu é dan a gyɛ lɛ, yé mian é so Jéu lé gwɔun lee Élizé é dan a gyɛ lɛ.

¹⁸ Naa, maa munu baa yaa wuru soru tadɔ Izraɛl, munu faa lé wo ’ka ’wo powuo zun lɛ Baal lɛ lo, ’té wo lɔlu ’ka pwɛpwɛ vɔ lɛ a ma lo, wo nya.

Éli Élizé laa

¹⁹ Éli si ’bɛna yé é Safat be Élizé ye, ’té éé nyanama paan. Dirigɔné fié fié a a ’lɛ vu ta fié, ’té yee ɛ ke a vu ta fiézan va. Éli bié a va yé élé sɔ zén a ta.

²⁰ Élizé élé dirigɔné vo, yé é vlan buru Éli zuo yé é léé: Maa an ti valé an bu yai vɔa faa, yé an da i zuo ma. Éli lé a lɛ léé: ’I go yé ’i da; naa, we lé maa a kɛlɛ i lɛ, ’i gi bɔrɔ a ma.

²¹ Élizé si Éli va yé é dirigɔné fié si yé é Bale ban a nya; é wolé fɛganayili kɛlɛ kyɛ nya yé é wo dɔne yé é a dɔra munu ma. ’Bɛ zuo é nwa, yé é go Éli zuo yé é nyanama pa a lɛ.