1 Minwiinzannu 18 - Kazambale lé Sebe Sauunu 1979

Éli valé Baal banmunu

¹ Yi kiɛre gié, yé Gakelebale we fe Éli lɛ, lɛɛ yaazan gi. É léé: ’I go, ’ibo nagɔɔn Akab lɛ yé maa dan lɛɛ da lɛ tɛrɛ la.

² Yé Éli go ébo nagɔɔnle Akab lɛ we gi. Lɔrɔ dɔ é baba Samari tɛrɛ la.

³ Yé Akab élé kɔn nwiinzan Abudias laa. (Naa, Abudias éé kanaan Gakelebale lee é baba;

⁴ bléyian va lé Jézabɛl Gakelebale lé balelayezannu kulu ga, Abudias balelayezannu si yɔ soru yé é wo yɔɔ mi yɔ fié wɔlɛ vu vu gɔmagurunu gi, yé é buru valé ’yi nɔ wo lɛ.)

⁵ Akab lé Abudias lɛ léé: ’I gié tɛrɛ faa la, ’i go ’yibɔnanu valé yuubɛnu gi, dé i dan lu ye lɛɛ? yé ko a nɔ wisoonu valé sokofalenu lɛ yé wo vo é yuɛma yé ko ’ka winu gya lo.

⁶ Wo tɛrɛ guli ’wo ke ma, giéle a faa ta we gi; Akab go é do zi do ta yé Abudias go é do zi bɛ ta.

⁷ Abudias a zia aan wo, yee valé Éli kee. Abudias a dɔɔ yé é dia é bli la yé é léé: Anzan Éli, bii léé?

⁸ É a zi pa léé, maa lé; ’i go, bé fe izan lɛ léé: Éli lo.

⁹ Yé Abudias léé: Mɛ wenyané lé maa a kɛlɛ yé i i wuozan pa Akab lee, yé é an gyɛɛ?

¹⁰ Gakelebale a é yuɛma. Bɛn valé bɛntɛrɛ lé anzan ’ka mi nwunvɔ lɛ wona i ginile we gi lo, ’bɛ ’ka lo; yé dé wonu a fe léé, i ’ka ’wo va lo, é lé wo lɛ léé, ’wo bale ’nyɔɔn ’é lɛ.

¹¹ Yé sin, bii léé, an go an fe anzan lɛ léé: Éli a muun?

¹² A zuo, dé an si i va, Gakelebale léli é dan go lɛ i nya, dé fɛ kyɛnna léé? maa ’ka ’bɛna dɔɔa lo; yé dé an go a zuo fe lɛ Akab lɛ, yé é ’ka i ye lɛ lo, é dan an gyɛ lɛ. Dɔlé ’té i wuozan kanale Gakelebale lee pélisia é kénéné la bléyi va.

¹³ Dé Jézabɛl a Gakelebale lé balelayezannu gyɛna, we lé maa a kɛlɛ, wo ’ka a fe lɛ anzan lɛ loo? Maa balelayezannu yɔ soru yɔɔ mi yɔ fié wɔlɛ vu vu gɔmagurunu gi yé maa buru valé ’yi nɔ wo lɛ.

¹⁴ Yé sin bii léé, ’an go an fe anzan lɛ léé, Éli a mun. É dan an gyɛ lɛ.

¹⁵ Naa, Éli léé: Lai sunyanu lé Gakelebale lé an ke a wuozan nya, é a é yuɛma. Maa dan anbo nagɔɔn lɛ Akab lɛ kyɔ.

¹⁶ Abudias go Akab va yé é a fe a lɛ. Yé Akab go Éli va.

¹⁷ É a ye tɔɔn é léé: Bii lé i we tɔntɔn bɔ Izraɛl ma, bii léé?

¹⁸ Éli a zi pa léé: Maa‐an maa we tɔntɔn bɔ Izraɛl ma lo, bii valé i ti lé munu lé; ka Gakelebale lé bélidɔwe vo yé i go Baalnu zuo, ’bɛzama.

¹⁹ Sin, ’i Izraɛl faa zén ékeva an va, Kaamɛl gɔ nwiin, Baal lé balelayezannu wuru fié yɔ fié wɔlɛ vu valé Asataté lé balelayezannu wuru fié lé woo fɛ blé Jézabɛl lé tablé ta, woo koo é ziin.

²⁰ Akab mi nwunvɔ Izraɛl munu faa va, yé é balelayezannu zén ékeva Kaamɛl gɔ nwiin.

²¹ Yé Éli bié munu va yé é léé: Ka dan daan lɛ kalé yuɛ gi blanle ma mɛ yi laa? Dé Gakelebale a Bale nya, ’ka go a zuo; dé Baal lé, ’ka go ’bɛ zuo. Munu ’ka we do kpen zi pa lɛ a lɛ lo.

²² Yé Éli lé munu lɛ léé: Maa do kpen ɛ vo Gakelebale lé balelayezannu pa gi, yé Baal lé balelayezannu a wuru fié yɔ fié wɔlɛ vu.

²³ ’Wo dirigɔné fié nɔ ko lɛ ma; ’wo dirigɔné do si wozé nya ma, ’wa wi bɔi yé wa pla kyɛ ta yé té wo kyɛ vɔ a ’léé lo ma; maa é ziin, maa dan dirigɔné koɛ ma’lɛrɛ lɛ, yé maa a pla kyɛ ta, yé maa ’ka dan kyɛ vɔ lɛ a ’léé lo.

²⁴ ’Bɛ zuo, ’ka kazé bale tɔ laa; yé maa dan Gakelebale tɔ laa lɛ. Balean é a zi pa kyɛ nya, yee ɛ dan kɛlɛ lɛ Bale nya. Yé munu faa léé: ’Bɛ a é zima.

²⁵ Éli lé Baal lé balelayezannu lɛ léé: ’Ka dirigɔné do si kazé nya; ka a kiɛre amalé kazé kɛlɛ é vinin, yé ka kazé bale tɔ laa; naa, té ka kyɛ vɔ kyɛ ’léé lo.

²⁶ Dirigɔné lé wa nɔ wo lɛ, wa si, yé wa ma’lɛrɛ; yé wo Baal tɔ laa, é sia bladi fɔɔ yé yiéyi pa, ’té wa fé léé: Baal, ’i we ko lɛ! Naa, dére valé we zi pale ’ka lo. ’Té woo fɔrɔan Baal banna lé wa kɛlɛ, a ’lɛ.

²⁷ Yiéyi pa aan wo, Éli kun we nanale ma wo ma yé é léé: ’Ka dére wuo vɔ, naa, bale lé; dé é a é gi bɔrɔna é wo, taa, dé ’bɛ kaan lo, dé a yuɛi kyɛ ke é wo taa, dé é go tawo lɛ, ɛɛ, dé é a yi ɛ gyɛnaa? É dan vuo lɛ.

²⁸ Wo sia dére plɛplɛ nya yé wo ’wobozen tuo gwɔunnu valé dinnu nya wozé kɛlɛbɛ yɛrama fɔɔ yé wo nyɛ yoro wo ma.

²⁹ Yiéyi gié aan wo, wo vo balelawe fena fɔɔ yé Bale lé saraka bobléyi bɔ. Naa, dére koo, we zi pale koo, tɔné dɔle tɔmase koo, a do kpen ’ka kɛlɛ lɛ lo.

³⁰ Yé Éli lé munu faa lɛ léé: ’Ka bié an ma. Munu faa bié a ma. Yé Gakelebale banna lé wa zana a gi turu, é a dɔ é pa gi.

³¹ É gɔlɛ sia vu ta fié, Jakɔb lé Gakelebale a fe é kyɛn a lɛ léé, i tɔ é dan kɛlɛ lɛ Izraɛl nya, a benu bɛn ’léé yɛrama.

³² Yé é balebanna kɛlɛ gɔlɛ ’konu nya Gakelebale tɔ nya. Guru lé ’sawɔlɛ suo yaa éé sɔa a gi, é a bo balebanna zi.

³³ É kyɛ pla a ta, yé é dirigɔné wi bɔi yé é a pla kyɛ ta.

³⁴ A zuo é léé: ’Ka ’yi fan bɔ ziɛn nya yé ’ka a zén balebanwi lé wo dan a kyɛ ble lɛ, é valé kyɛ ta. É léé: ’Ka kɛlɛ a gɔnɔ fiézan nya. Yé wa kɛlɛ a gɔnɔ fiézan nya. É léé: ’Ka kɛlɛ a gɔnɔ yaazan nya. Yé wa kɛlɛ a gɔnɔ yaazan nya.

³⁵ ’Yi yoro balebanna zi yé é guru fan é ziin.

³⁶ Saraka bo bléyi bɔ aan wo, balelayezan Éli bié yé é léé: Gakelebale, Abraam koo, Izak koo, Izraɛl koo, wozé Bale! É a lé wa gi dɔɔ kyɔ léé, bii ɛ ke Bale nya Izraɛl, yé maa a i wuozan nya, yé maa we ’konu faa kɛlɛ i dére ta ma.

³⁷ ’I we zi pa an lɛ, Gakelebale, ’i we zi pa an lɛ, munu ’ko lé a gi dɔɔle we gi léé, bii, Gakelebale ɛ ke Bale nya, yé bii ɛ wo bli nɔlaan.

³⁸ Yé Gakelebale lé kyɛ dia yé diriwi koo, kyɛ yilinu koo, gɔlɛnu koo, tɛrɛ koo, é wo ble, yé ’yi lé ke guru gi, é ’bɛ béli.

³⁹ Munu faa ’bɛ ye aan wo, wo dia ’wo bli la yé wo léé: Gakelebale ɛ ke Bale nya! Gakelebale ɛ ke Bale nya!

⁴⁰ Éli lé wo lɛ léé: ’Ka Baal lé balelayezannu kun. Té wo va mi do kpen é so a ta lo. Yé wo wo kun. Éli zun wo nya Kizɔn yuubɛ gɔɔn ma yé é wo bɔrɔ bo ’bɛna.

Lɛɛ dale

⁴¹ Yé Éli lé Akab lɛ léé: ’I nwa, ’i fɛ ble ’i fɛ mini; naa, lɛɛ a wena.

⁴² Yé Akab go fɛ ble lɛ, é valé fɛ mini lɛ. Naa, Éli Kaamɛl gɔ gié yé é tua tɛrɛ va yé é ’wuo wɔra é boro gi.

⁴³ Yé é lé é wuozan lɛ léé: ’I nwa, ’i yuɛ vɔ wɛyi vazia. A wuozan nwa yé é a nagini yé é léé: We do ’ka ana lo. Éli lé gɔnɔ sɔrafié léé: ’I go é ziin.

⁴⁴ A gɔnɔ sɔrafiézan nya é léé: Lati kiéné a sina wɛyi va, yé é a blɛn bélé mi bɛlaa zo. Éli léé: ’I go bé fe Akab lɛ léé, ’élé goro ma’lɛrɛ yé ’é go, té lɛɛ a dɔ lo we gi.

⁴⁵ ’Bɛ zuo sɛ tɔɔn, lɛɛ tié yé fu gié yé lɛɛ da é baba. Akab vɔ élé goro gi yé é go Jizréɛl.

⁴⁶ Gakelebale bɛ a Éli ta yé é sɔ dɔ é tɛrɛla yé é vlan buru Akab ’lɛ fɔɔ yé wo bɔ Jizréɛl flagɔrɔ ’léé.