1 Minwiinzannu 17 - Kazambale lé Sebe Sauunu 1979

Éli yiri bi bléyi lé we lɛ kini

¹ Galaad tɛrɛ la mi do, Tisibi mi Éli lé Akab lɛ léé: Gakelebale, Izraɛl lé Bale lé maa ke a wuozan nya, é a é yuɛma. Lɛɛ ’konu wuo, lɛɛ ’ka dan da lɛ lo yé fli ’ka dan vɔ lɛ lo, ’té dé maa ’ka a fe lɛ lo.

² Yé Gakelebale lé Éli lɛ léé:

³ ’I si ’ko, ’i go yirinwanazia yé ’i yɔɔ Kérit yuubɛ lé ke Juudɛn yara, ana.

⁴ ’I yuubɛ lé ’yi mini, yé maa dan kanwéinu béli dɔ lɛ léé, ’wo fɛ nɔ i lɛ ’bɛna.

⁵ É si ana yé é tawo Gakelebale dére ta yé é go nyana lɛ Kérit yuubɛ lé ke Juudɛn yara, a sɔnɔ.

⁶ Kanwéinu woo dan buru valé wi nya a lɛ bladi yé woo dan buru valé wi nya a lɛ é nyanadi, ’té éé yuubɛ minian.

⁷ Naa, yi ke giéle zuo yuubɛ béli, lɛɛ ’ka da lɛ tɛrɛ ’ko la lo, azama.

Éli valé Sarɛpita zanagala le

⁸ Yé Gakelebale lé Éli lɛ léé:

⁹ ’I nwa, ’i go Sarɛpita lé ke Sidɔn lé fla nya, ana, yé ’i nyana ana. Bé ye, maa fla ’ko la zanagala le do béli dɔ léé, ’é fɛ nɔ i lɛ.

¹⁰ É nwa yé é go Sarɛpita. É bɔ flagɔrɔ ’léé bléyian va, bé ye, zanagala le do ana bɛ, ’té éé kyɛ sian. É a laa, yé é lé a lɛ léé: Ilé zanté, ’i da ’yi sɛné nya an lɛ kana gi, yé maa a mini. Yé é go a si lɛ.

¹¹ É a laa é ziin yé é léé: Ilé zanté, ’i da i lee buru kuru do nya an lɛ.

¹² É a zi pa léé: Gakelebale, ilé Bale a é yuɛma. Buru ’ka an lee lo, bɛ nya do burupun a bɔ gi yé nyɔnɔ kiéné a kuo gi. Yé bé ye, maa a kyɛ bɛné fié siana, yé maa go ’bɛ dɔne maa valé an be zé nya; ko dan a ble lɛ, a zuo ko dan ga lɛ.

¹³ Éli lé a lɛ léé: Té i kana lo, ’i go, bé fe fɛan zo bɛ, bé kɛlɛ. Naa, ’i anzé buru sɛné kɛlɛ é vinin yé ’i da a nya an lɛ, ’bɛ zuo i dan bii valé i be zé kɛlɛ lɛ.

¹⁴ Naa, Gakelebale, Izraɛl lé Bale léma: Burupun lé ke bɔ gi é ’ka dan nyaa lɛ lo, yé nyɔnɔ lé ke kuo gi, é ’ka dan nyaa lɛ lo, fɔɔ yé Gakelebale é lɛɛ da.

¹⁵ Lezan go, yé é Éli dére tawe kɛlɛ. ’Té alé munu valé Éli éé fɛ blé yifaama.

¹⁶ Burupun ’ka nyaa lɛ bɔ gi lo, yé nyɔnɔ lé ke kuo gi, é ’ka nyaa lɛ lo, dére lé Gakelebale a fe Éli lɔlu nya, a yɛrama.

¹⁷ We ’konu bɔle zuo, kɔnzan, lezan be gyɛ si, yé alé gyɛ kɛlɛ plɛplɛ yé é ’ka flinna é dɛrɛ lo.

¹⁸ Yé le ’ko lé Éli lɛ léé: Bale lé mi, mɛ we ɛ ke ko mélénaa? I da anlé kɔn gi anlé weple sele dɔle an gi, é valé an be gyɛle we gii?

¹⁹ Éli lé a lɛ léé: ’I be nɔ an lɛ. É a si lezan lee, yé é go a nya kɔn nwiin kɔnné lé éé yiaan a gi, ana, yé é a yia élé yialafɛ ta.

²⁰ A zuo é Gakelebale laa yé é léé: Gakelebale anlé Bale, zanagala le lé é ke an yaabazan nya, i nyané paan a be ta fɔɔ yé é gaa?

²¹ Ébo soi né ta pɔrɔlɔ gɔnɔ yaa, yé é Gakelebale laa yé é léé: Gakelebale, anlé Bale, ilé zanté, né ’ko bozen ’é da é gi é ziin ma.

²² Gakelebale é tɔné dɔ Éli dére lɛ, yé né bozen da é gi é ziin yé é kɛlɛ é yuɛma.

²³ Éli né si yé é si kɔn nwiin kɔnné gi, yé é zun kɔn gi yé é a nɔ é bu lɛ. Yé Éli léé: Bé gini, i be a é yuɛma.

²⁴ Yé lezan lé Éli lɛ léé: Maa gi dɔɔ sin léé, i a Bale lé mi nya, Yé Gakelebale dére lé ke i ’léé, é a webozen nya.