1 Minwiinzannu 16 - Kazambale lé Sebe Sauunu 1979

¹ Gakelebale we fe Aanani be Jéu lɛ Baésa ma ’ko zo: é léé:

² Maa i nwa vun va, yé maa i dɔ anlé munu Izraɛl nwiinzan nya; naa, i tawo Jéroboam lé tawobɛ zo, yé i anlé munu Izraɛl kɛlɛ wenyané kɛlɛzannu nya, yé wolé wenyané an bli fli, bɛwemalé

³ bé ye, maa dan Baésa valé élé munu si lɛ ana bélé bli siale zo, yé maa dan ilé kɔn kɛlɛ lɛ bélé Nébat be Jéroboam zé zo.

⁴ Dé Baésa lé mian é ga fla, blénnu é dan a ble lɛ, yé dé alé mian é ga féi, lagi mianénu é dan a ble lɛ.

⁵ Baésa kɛlɛwe pɔnénu koo, wenu lé é a kɛlɛ, é valé alé we blɛnblɛnnu kɛlɛle koo, é a é gyɛle Izraɛl nwiinzannu lé we zuo fe sɛbɛ gi.

⁶ Baésa yi gyɛ é tranu va, yé wa pa Tiisa. A be Éla pla munu nwiin a pa gi.

⁷ Gakelebale dére da balelayezan Aanani be Jéu va Baésa valé élé kɔngimunu lé we ma; é wenyané kɛlɛ Gakelebale yuɛ gi yé é ’bɛ blifliwe kɛlɛ é bɛ panyanama nya, yé é kɛlɛ bélé Jéroboam lé kɔngimunu zo, azama; naa, ’bɛ saa kaan lo, é Jéroboam lé munu gyɛ é ziin, azama.

Izraɛl nwiinzannu Éla valé Zimri

⁸ Juda nwiinzan Aza lé lɛɛ yɔ do wɔlɛ suiɛdozan nya Baésa be Éla pla Izraɛl nwiin Tiisa. É pla munu nwiin lɛɛ fié.

⁹ A wuozan Zimri lé ke goronu lɛ do nwiinzan nya, ’bɛ a ma we ble. Éla a Tiisa, ’té é a nwɛ minina valé nwɛ tanna Tiisa nwiinzan lé kɔn nwiinzan Aatisa lé kɔn gi.

¹⁰ Zimri wɔra yé é a gyɛ yé é ga, yé é pla munu nwiin a pa gi. Juda nwiinzan Aza plale mi nwiin lɛɛ yɔ do wɔlɛ sɔrafiézan gi lé we ’ko bɔ.

¹¹ Zimri kɛlɛ minwiinzan nya yé é nyana élé webleblin ta aan wo, é Baésa lé munu faa gyɛ, é ’ka alé mi do kpen vo lɛ lo, dé a lele léoo, dé a béé léoo.

¹² Zimri Baésa kulu ga Gakelebale dére lé é a fe Baésa ma balelayezan Jéu lɔlu nya, a yɛrama,

¹³ wenyané faa lé Baésa valé é be Éla a kɛlɛ, ’té woo Izraɛl kɛla wo kɛlɛzannu nya yé wo Gakelebale, Izraɛl lé Bale bli fli wolé miyilinu nya bɛ, wolé we ma.

¹⁴ Éla kɛlɛwe pɔnénu valé we faa lé é a kɛlɛ, é a é gyɛle Izraɛl nwiinzannu lé we zuo fe sɛbɛ gi.

¹⁵ Juda nwiinzan Aza lé lɛɛ yɔ do wɔlɛ sɔrafiézan nya, Zimri pla munu nwiin yi sɔrafié Tiisa. Munu Filisitinu lé fla Gibétɔn mabɛn.

¹⁶ Munu lé wo ke fla mabɛnna, wo we ’ko ’ma léé, Zimri minwiinzan ma we ble yé é a gyɛ é ziin. Yé ’bɛ yi la Izraɛl faa sunyanu nwiinzan Omri dɔ Izraɛl nwiinzan blɛn nya.

¹⁷ Omri valé Izraɛl faa si Gibétɔn yé wo Tiisa mabɛn.

¹⁸ Zimri a ye aan wo léé, wo fla si, é go minwiinzan blɛn lé kɔn gi guliyɔɔkɔn gi yé é minwiinzan lé kɔn kyɛ vɔ ébo la.

¹⁹ ’Bɛ zo lé é ga, wenyané lé é a kɛlɛ, a we ma. We lé ke é naané Gakelebale yuɛ gi, yee lé é a kɛlɛ, yé é tawo Jéroboam lé tawobɛ zo, yé ébo nɔ wenyanénu lé Jéroboam a kɛlɛ, ’té é Izraɛl kɛlɛ a kɛlɛzannu nya, wo kɛlɛle lɛ.

²⁰ Zimri kɛlɛwe pɔnénu valé alé mi ma weblele, é a é gyɛle Izraɛl nwiinzan blɛnnu lé we zuo fe sɛbɛ gi.

Izraɛl nwiinzan blɛn Omri

²¹ Yé Izraɛl lé munu gi bɔi fié; a lɛ do a a va léé, wo Ginat be Tibini kɛlɛ minwiinzan blɛn nya, yé a lɛ do dɔ Omri zuo.

²² Omri zuomunu mini Ginat be Tibini zé ta. Tibini ga yé Omri pla munu nwiin.

²³ Juda nwiinzan Aza lɛɛ yɔ do wɔlɛ vu ta dozan nya, Omri pla Izraɛl nwiin. É pla munu nwiin lɛɛ vu ta fié. A plale munu nwiin Tiisa lɛɛ suiɛdo zuo,

²⁴ é Samari gɔ lɔ Sémɛɛ lee, gɔɔlifu talan fié nya; é fla pa gɔ nwiin yé é yee fla tɔ pa Samari, gɔzan Sémɛɛ tɔ nya.

²⁵ We lé ke é naané Gakelebale yuɛ gi, yee lé Omri a kɛlɛ, yé é wenyané kɛlɛ é mini mi faa lé ke a ’lɛ é vinin, wozé ta.

²⁶ É tawo Nébat be Jéroboam lé tawobɛ faa zo, yé wenyanénu lé Jéroboam Izraɛl kɛlɛ wo kɛlɛzannu nya, ébo nɔ wo kɛlɛle lɛ, ’té woo Gakelebale Izraɛl lé Bale bli flian wolé miyilinu nya.

²⁷ Omri kɛlɛwe pɔnénu koo, we lé é a kɛlɛ, é valé we blɛnblɛnnu lé é a kɛlɛ koo, é a é gyɛle Izraɛl nwiinzan blɛnnu lé we zuo fe sɛbɛ gi.

²⁸ Omri yi gyɛ é tranu va, yé wa pa Samari. A be Akab pla munu nwiin a pa gi.

Akab Jézabɛl si é na nya

²⁹ Juda nwiinzan Aza lɛɛ yɔ do wɔlɛ vu ta sɔraazan nya, Omri be Akab pla Izraɛl nwiin. Omri be Akab pla munu nwiin Samari lɛɛ yɔ do wɔlɛ fié.

³⁰ We lé ke é naané Gakelebale yuɛ gi, yee lé Omri be Akab a kɛlɛ é mini munu faa lé ke a ’lɛ wozé ta.

³¹ Abo nɔle Nabat be Jéroboam lé wenyané kɛlɛle lɛ a a yuɛ gi we kiéné nya, yé é Sidɔn munu nwiinzan Étabaal lu Jézabɛl si é na nya yé é go Baal bɔ lɛ, ’té éé diaan é yara a ’lɛ.

³² É Baal banna kɛlɛ Baal lé kɔn lé é a dɔ Samari, a gi, yé é Asataté lé miyili kɛlɛ.

³³ Akab Gakelebale, Izraɛl lé Bale blifliwe kɛlɛ é mini Izraɛl nwiinzannu faa lé ke a ’lɛ, wozé ta.

³⁴ Azé bléyi va Bétɛl mi Iɛl Jériko pa; é a gane vɔ aan wo, alé né vininzan Abiram ga, yé é a gɔrɔ ’léé duoli vɔ aan wo a be voélazan Ségub ga, dére lé Gakelebale a fe Nɛn be Jozué lɔlu nya, a yɛrama.