1 Minwiinzannu 15 - Kazambale lé Sebe Sauunu 1979

Juda nwiinzan blɛn Abijam

¹ Nébat be Jéroboam plale munu nwiin lɛɛ vu ta sɔraazan nya, Abijam pla Juda munu nwiin.

² É pla munu nwiin lɛɛ yaa Jérusalɛm. Wa bu laama Abusalɔm lu Maaka.

³ Wenyané faa lé a ti a kɛlɛ é vinin, ébo nɔ ’bɛ faa kɛlɛle lɛ; a bli faa ’ka Gakelebale, alé Bale lɛ, a tra David bli a fɛan zo, a zo lo.

⁴ Naa, David lé we ma lé, Gakelebale alé Bale kyɛbɔ nɔ a lɛ Jérusalɛm, a be dɔle nya a pa gi valé Jérusalɛm vole ana nya.

⁵ Naa, we lé ke tegele Gakelebale yuɛ gi, David a kɛlɛ, yé é ’ka é yara si lɛ alé bélidɔwe do kpen kɛlɛle ta lo alé tɛrɛla faa gi, ’té dé é ’ka Éti mi Uri lé we nya lo.

⁶ Guli kɛlɛ Roboam valé Jéroboam méléna Roboam lé tɛrɛla faa gi.

⁷ Abijam kɛlɛwe pɔnénu valé we faa lé é a kɛlɛ, wa é gyɛle Juda nwiinzan blɛnnu lé we zuo fe sɛbɛ gi. Guli kɛlɛ Abijam valé Jéroboam méléna.

⁸ Abijam yi gyɛ é tranu va, yé wa pa David lé fla. A be Aza pla munu nwiin a pa gi.

Juda nwiinzan blɛn Aza

⁹ Izraɛl nwiinzan Jéroboam lé lɛɛ yɔ dozan nya, Aza pla Juda munu nwiin.

¹⁰ É pla munu nwiin Jérusalɛm lɛɛ yɔ fié wɔlɛ do. Wa bu segele laama Abusalɔm lu Maaka.

¹¹ We lé ke tegele Gakelebale yuɛ gi, Aza a kɛlɛ bélé é tra David zo.

¹² É bɔrɔdɛ lomu si élé tɛrɛ la, yé miyilinu faa lé a tinu a kɛlɛ, é wo faa si ana.

¹³ A bu segele Maaka miyili kɛlɛ Asataté zé nya amalé dé é a a bu segele nyaoo, é kɛlɛle minwiinle nya se si a lee. Aza alé miyili sɛrɛ yé é a kyɛ ble Sédrɔn yuu ma.

¹⁴ Naa, gɔ nwiin yobannannu ’ka si lɛ ana lo, dɔlé ’té Aza bli faa kɛlɛ Gakelebale lɛ élé tɛrɛla faa gi.

¹⁵ Fɛnu lé a ti valé yeebozen a pa é yɛrama, gɔɔlifu koo, kyan koo, kananu koo, wo nya, é wo pla Gakelebale lé kɔn gi.

¹⁶ Guli kɛlɛ Aza valé Izraɛl nwiinzan Baésa méléna wolé tɛrɛla faa gi.

¹⁷ Izraɛl nwiinzan Baésa nwa Juda ma; é Rama pa, Judanu nwiinzan Aza lé munu wɔrale valé bɔrale yi gale we gi.

¹⁸ Gɔɔlifu valé kyan pɔné lé é vo Gakelebale lé kɔn gi fɛwezan valé minwiinzan lé kɔn gi fɛwezan nya, é a faa si yé é a pa é wuomunu lee, yé é wo nwunvɔ Sirinu nwiinzan Ézɔn be Tabrimɔn be Bɛn‐Adad va, ’té ’bɛ a é nyanale Damas. Minwiinzan Aza we pa a lɛ zia léé:

¹⁹ Bii valé maa, ko gi pa do ma, bélé fɛan zo lé an ti valé i ti wo gi pa do, a zo. Bé ye, maa i blan pa zia, gɔɔlifu valé kyan nya. ’I go, ’i péli si Izraɛl nwiinzan Baésa va yé é si an ma baa.

²⁰ Bɛn‐Adad é tɔné dɔ minwiinzan Aza lɛ; é élé sunyanu nwiinzannu nwunvɔ Izraɛl lé flanu ma, yé Ijɔn koo, Dan koo, Abɛl‐Bɛt‐Maaka koo, Kinérɛt faa koo, Néfitali lé tɛrɛ faa koo, é guli dan wo va yé é wo kele.

²¹ Baésa a ’ma aan wo, é daan Rama pale ma yé é vo Tiisa.

²² Mi nwiinzan Aza Juda faa laa, é ’ka mi do kpen vo lɛ lo, yé gɔlɛnu valé yilinu lé Baésa Rama pa a nya, wo wo sia; yé minwiinzan a si yé é Bɛnjamɛn lé Géba valé Misipa pa a nya.

²³ Aza kɛlɛwe pɔnénu, alé we blɛnblɛnnu valé we faa lé é a kɛlɛ koo, flanu lé é a pa koo, é a é gyɛle Juda nwiinzan blɛnnu lé we zuo fe sɛbɛ gi. Naa, é kwa gyɛ aan wo, gyɛ vɔ a gane ma.

²⁴ Aza yi gyɛ é tranu va, yé wa pa é tranu va a tra David lé fla. Yé a be Jozafat pla munu nwiin a pa gi.

Izraɛl nwiinzan blɛn Nadab

²⁵ Juda minwiinzan Aza lɛɛ fiézan nya Jéroboam be Nadab pla Izraɛl nwiin. É pla Izraɛl nwiin lɛɛ fié.

²⁶ We lé ke é naané Gakelebale yuɛ gi, yee lé é a kɛlɛ; é tawo é ti lé tawobɛ gi yé wenyané faa lé a ti Izraɛl kɛlɛ a kɛlɛzannu nya, ébo nɔ a kɛlɛle lɛ.

²⁷ Isakaa gɔnɔlazan do Akija be Baésa a ma we ble, yé bléyian va lé Nadab valé Izraɛl faa a Gibétɔn mabɛnna, Baésa a gyɛ Gibétɔn lé ke Filisitinu lé fla nya, a ta.

²⁸ Baésa a gyɛ Juda nwiinzan Aza lɛɛ yaazan nya yé é pla munu nwiin a pa gi.

²⁹ É kɛlɛ minwiinzan nya aan wo, é Jéroboam lé kɔn ’léé munu faa gyɛ, é ’ka mi do kpen vo lɛ lo, yé fɛ faa lé éé flin‐é é wo gyɛ, dére lé Gakelebale a fe é wuozan Silozan Akija lɔlu nya, a yɛrama.

³⁰ Wenyanénu lé Jéroboam a kɛlɛ, é valé wenyané lé é Izraɛl kɛlɛ a kɛlɛzannu nya, yé ’bɛ zo lé é Gakelebale élé Bale bli fli, wolé we ma lé Bale a kɛlɛ.

³¹ Nadab kɛlɛwe pɔnénu valé we faa lé é a kɛlɛ, é a é gyɛle Izraɛl nwiinzannu lé we zuo fe sɛbɛ gi.

³² Guli kɛlɛ Aza valé Baésa méléna wolé tɛrɛla faa gi.

Izraɛl nwiinzan blɛn Baésa

³³ Judanu nwiinzan Aza lɛɛ yaazan nya Akija be Baésa pla Izraɛl faa nwiin Tiisa. É pla wo nwiin lɛɛ yɔ do wɔlɛ ziɛn.

³⁴ We lé ke é naané Gakelebale yuɛ gi, yee lé é a kɛlɛ, yé é tawo Jéroboam lé tawobɛ zo, yé wenyanénu lé Jéroboam Izraɛl kɛlɛ wo kɛlɛzannu nya, ébo nɔ wo kɛlɛle lɛ.