1 Minwiinzannu 14 - Kazambale lé Sebe Sauunu 1979

Jéroboam be gale

¹ ’Bɛ bléyi ’ko va Jéroboam be Abija gyɛ si. Jéroboam lé é na lɛ léé:

² Ilé zanté, ’i nwa, ’i ma nɔla, té wo i dɔɔ Jéroboam na nya lo, yé ’i go Silo. Bé ye, balelayezan Akija ana bɛ; yee ɛ fe an lɛ léé, maa dan kɛlɛ lɛ munu ’ko nwiinzan blɛn nya.

³ Buru vu koo, gatonu koo, zɔrɔnyɔnɔ kuo do koo, ’i goan i lee yé ’i go a va; we lé é dan kɛlɛ lɛ né lɛ, é dan a fe lɛ i lɛ.

⁴ Jéroboam na a kɛlɛ a zo; é nwa yé é go Silo, yé é wɔra Akija lé kɔn gi. Akija yuɛ gi gunu dɔra élé kwa gyɛle we ma, amalé é ’ka fɛna yé tegele lo.

⁵ ’Té Gakelebale a fe kɔɔn Akija lɛ léé: Jéroboam na é dan da lɛ é be lé we laa lɛ i lee, é a gyɛ kɛlɛna, azama. I dan we fe lɛ a lɛ ’ko valé ’ko zo. Dé é da é dan ébo kɛlɛ lɛ mi bɛ zo.

⁶ Bléyian va lé é gane zun kɔn pa zi, Akija a gane vun wele ’ma aan wo, é léé: Jéroboam na, ’i wɔra. Mɛmalé é sɔ i lɛ léé, ibo kɛlɛ bélé mi bɛ zoo? We lé wa pa an ’léé léé, maa fe i lɛ, é a we plɛplɛ nya.

⁷ ’I go, bé fe Jéroboam lɛ léma: Gakelebale, Izraɛl lé Bale léma: Maa i nwa munu méléna, yé maa i dɔ anlé munu Izraɛl nwiinzan nya,

⁸ maa plale mi nwiin se si David gɔnɔ gi yé maa a nɔ bii lɛ. An wuozan David lé, é anlé bélidɔwenu faa kɛlɛ yé é tawo an zuo é bli faa nya, ’té we lé ke é drɔle an yuɛ gi é ’bɛ saa kɛla, bii ’ka bélé yee zo lo.

⁹ I wenyané kɛlɛ é mini mi faa lé wo ke i ’lɛ é vinin, wo ta; i go izé bale bɛnu valé miyili serelenu kɛlɛ lɛ, an bli flile we gi, yé i nwun zi dɔ an ta.

¹⁰ We ’ko ma lé, maa dan we tɔntɔn bɔ lɛ Jéroboam lé munu ma; dé mian é ke Jéroboam zé nya, maa dan a si lɛ tɛrɛ la tata, dé é a luu nyaoo, dé é a miné nyaoo, yé maa dan Jéroboam lé kɔn sia lɛ, bélé mi éé bli sian fɛan zo, a zo, fɔɔ yé a ta é saan.

¹¹ Dé Jéroboam lé mian é ga fla, blénnu é dan a ble lɛ, dé alé mian é ga féi, lagi mianénu é dan a ble lɛ. Naa, Gakelebale ɛ fe.

¹² Yé bii, ’i nwa, ’i go ilé fla. Dé i gane zun fla tɔɔn, né é dan ga lɛ.

¹³ Izraɛl munu faa é dan a wuvɔ lɛ yé wo dan a pa lɛ; Jéroboam lé munu va mi do kpen lé wo dan a pa lɛ mi pana, yee ɛ ke né ’ko nya, naa, Jéroboam lé munu faa va, yee do kpen gi lé Gakelebale Izraɛl lé Bale wezin ye, azama.

¹⁴ Gakelebale é dan mi do dɔ lɛ Izraɛl minwiinzan nya yé ’bɛ é dan Jéroboam lé kɔn gi puo lɛ tata ’bɛ yi la. A pélian sia tɛkɛ bɛ loo?

¹⁵ Gakelebale é dan Izraɛl bla lɛ, yé é dan kɛlɛ lɛ bélé gyan lé ’yinu a nyɔɔn‐an, a zo; tɛrɛ zima lé é a nɔ Izraɛl tranu lɛ, é dan a si lɛ Izraɛl lee, yé é dan wo nwɛɛn lɛ yuu zi, wo miyilinu kɛlɛ yé wo Gakelebale bli fli, azama.

¹⁶ Wenyanénu lé Jéroboam a kɛlɛ, é valé wenyané lé é a vɔ Izraɛlnu lee, alé we ma lé Bale é dan daan lɛ Izraɛl ma.

¹⁷ Jéroboam na nwa yé é go. É bɔ Tiisa; a bɔle kɔn ’léé pa la tɔɔn, né ga.

¹⁸ Wa pa yé Izraɛlnu faa a wuvɔ, dére lé Gakelebale a fe é wuozan balelayezan Akija nya, a yɛrama.

Jéroboam gale

¹⁹ Jéroboam kɛlɛwe pɔnénu, é guli dan fɛan zo yé é pla munu nwiin fɛan zo, ’bɛ a é gyɛle Izraɛl minwiinzan blɛnnu lé we zuo fe sɛbɛ gi.

²⁰ Jéroboam pla munu nwiin lɛɛ yɔ do wɔlɛ fié, a zuo é yi gyɛ é tranu va. A be Nadab pla munu nwiin a pa gi.

Juda nwilnzan blɛn Roboam

²¹ Salomɔn be Roboam pla Juda nwiin. Bléyian va lé é kinin minwiinzan nya, ’té a lɛɛ a yɔ fié wɔlɛ do, yé é pla munu nwiin lɛɛ vu ta sɔrafié Jérusalɛm, fla lé Gakelebale a si Izraɛl bɛnnu faa va é tɔ pale a ma we gi, a ta. Wa bu tɔ laama Naama, Amɔn le lé.

²² We lé ke é naané Gakelebale yuɛ gi, yee lé Juda a kɛlɛ; wolé wenyané kɛlɛle nya lé wo Gakelebale lé maabole nwa é mini wo tranu la.

²³ Wo é ziin, wo gɔ nwiin yobannanu kɛlɛ, ’té yofoto valé miyilinu a gɔ faa nwiin valé yili drɔɔdrɔɔ faa wuo.

²⁴ Wo bɔrɔdɛlomu lɛ do pa é yɛrama, munu faa lé wo go yo ’ko ban lɛ, wozé nya. Bɛnnu lé Gakelebale wo bin Izraɛl lé nénu ’lɛ, wo wolé naanaawe faa zuo sona.

²⁵ Roboam plale munu nwiin lɛɛ soruzan nya, Éjipiti nwiinzan Sisak nwa Jérusalɛm ma.

²⁶ Gakelebale lé kɔn gi fɛwezannu koo, minwiinzan blɛn lé kɔn gi fɛwezannu koo, é a faa si. Mibotakuunfɛnu lé Salomɔn a kɛlɛ kyan nya, é a faa si.

²⁷ Roboam mibotakuunfɛnu kɛlɛ zéné nya wo pa gi, yé é wo bɛ pa vlanburuzannu nwiinzannu lé woo yuɛ paan minwiinzan lé kɔn ’léé ta, wo lee.

²⁸ Dé minwiinzan go Gakelebale lé kɔn gi vu, vlanburuzannu éé mibotakuunfɛnu sié, yé wo dɔ wo nya. ’Bɛ zuo yé wo wo pa wo pa gi vlanburuzannu lé kɔn gi.

²⁹ Roboam kɛlɛwe pɔnénu valé we faa lé é a kɛlɛ, é a é gyɛle Juda munu nwiinzannu lé we zuo fe sɛbɛ gi.

³⁰ Yifaama guli a Roboam valé Jéroboam méléna.

³¹ Roboam yi gyɛ é tranu va, yé wa pa é tranu va David lé fla. Wa bu laama Naama, Amɔn le lé. A be Abijam pla munu nwiin a pa gi.