1 Minwiinzannu 13 - Kazambale lé Sebe Sauunu 1979

Bétɛl balebanna

¹ Bé ye, Bale lé mi do si Juda tɛrɛ la Gakelebale dére ta, yé é bɔ Bétɛl bléyian va lé Jéroboam a é dɔle balebanna sɔnɔ lasikɔrɔ kyɛblele we gi, a bléyi va.

² É siaa balebanna ta Gakelebale dére nya, yé é léé: Balebanna! Balebanna! Gakelebale léma: Bé ye, wo dan né do yaa lɛ David gɔnɔ gi; wo dan a tɔ laa lɛ Jozias; gɔ nwiin yobannanu lé balebanzannu lé woo lasikɔrɔ kyɛ blé i ta bɛ, é dan saraka bo lɛ wo nya i ta, yé wo dan mi wɔlɛnu kyɛ ble lɛ i ta.

³ Yé é tɔmase fe wo lɛ a yi duo nya; é léé: Tɔmase lé Gakelebale a gɔɔn, yee lé ke ’ko: bé ye, balebanna fɛn é dan gyɛ lɛ, yé a ta kyɛyee é dan nwɛɛn lɛ.

⁴ Dére lé Bale lé mi siaa a nya Bétɛl lé balebanna ta, minwiinzan blɛn a ’ma aan wo, é bɛ soi balebanna ta yé é léé: ’Ka a kun! Yé Jéroboam bɛ lé é a soi balelayezan ma, é kua yé é ’ka bɔa a plinle lɛ ’é va lo.

⁵ Balebanna fɛn gyɛ, yé a ta kyɛyee nwɛɛn, tɔmase lé Bale lé mi a fe Gakelebale dére nya, a yɛrama.

⁶ Minwiinzan blɛn lé Bale lé mi lɛ léé: ’I zanté vɔ Gakelebale, ilé Bale lɛ, yé ’i bazoro anlé we ma, léé, an bɛ ’é bɔ plinle lɛ. Bale lé mi zanté vɔ Gakelebale lɛ yé minwiinzan bɔ é bɛ plinle lɛ, yé é kɛlɛ bélé é vinin zo.

⁷ Minwiinzan lé Bale lé mi lɛ léé: ’Ko go kɔn ’léé, ’i fɛ ble, yé maa dan blɛ kɛlɛ lɛ i lɛ.

⁸ Bale lé mi lé minwiinzan blɛn lɛ léé: Dé i ilé kɔngifɛnu lɛ do nɔ an lɛoo, an ’ka wɔraan i va lo. Maa ’ka dan buru ble lɛ fɛkona lo, yé maa ’ka dan ’yi mini lɛ fɛkona lo;

⁹ naa, Gakelebale an béli dɔ léé, té an buru ble lo, té an ’yi mini lo, zi lé an da a ta, té an go an pa gi a ta lo.

¹⁰ Yé é go zi bɛ ta, zi lé é da a ta Bétɛl, é ’ka gié lɛ ’bɛ ta é ziin lo.

Bétɛl balelayezan kwa

¹¹ Balelayezan kwa do a é nyanale Bétɛl. We faa lé Bale lé mi a kɛlɛ Bétɛl yi ’ko la, é valé dére faa lé é a fe minwiinzan blɛn lɛ, a benu da a zuo fe lɛ a lɛ. Wo nyaa aan wo a zuo fele nya ’wo ti lɛ,

¹² é lé wo lɛ léé: É go zi kyɛn taa? Bale lé mi lé é si Juda tɛrɛ la, é go zian ta, balelayezan benu a ye.

¹³ Yé é lé é benu lɛ léé: ’Ka nyanalafɛ pla sokofale punu. Wo nyanalafɛ pla sokofale punu yé é vɔ a ta.

¹⁴ É go Bale lé mi zuo, yé é bɔ a ma é nyanale térébɛnt yili do wuo. É lé a lɛ léé: Bale lé mi lé é si Juda tɛrɛ la, yee lé ke i nyaa? Yé é a zi pa léé: Maa lé.

¹⁵ Yé é lé a lɛ léé: ’I da, ko go kɔn ’léé yé ’i fɛ ble.

¹⁶ Naa, é léé: Maa ’ka gona i va lo, yé an ’ka bɔa wɔrale lɛ ilé kɔn gi lo. Maa ’ka dan buru ble lɛ fɛkona lo yé maa ’ka dan ’yi mini lɛ i va fɛkona lo;

¹⁷ naa, Gakelebale lé an lɛ léé, té an buru ble ana lo, té an ’yi mini ana lo, zi lé an da a ta, té an go a ta an pa gi lo.

¹⁸ Yé balelayezan kwa lé a lɛ léé: Maa é ziin, maa a balelayezan nya bélé bii zo; yé lanje do we fe an lɛ Gakelebale dére nya, yé é lé an lɛ léé: ’I da a nya i va ilé kɔn ’léé, ’é buru ble yé ’é ’yi mini. É vié wo a lɛ.

¹⁹ Bale lé mi nɔla a va yé é buru ble yé é ’yi mini alé kɔn gi.

²⁰ Wa é nyanale tablé zi aan wo, Gakelebale we pa balelayezan lé é da a nya ’é va, a ’léé,

²¹ yé é siaa Bale lé mi lé é si Juda tɛrɛ la, a lɛ léé: Gakelebale léma: I ’ka Gakelebale dére lɛdɔ lɛ a ma lo, yé we lé Gakelebale ilé Bale i béli dɔ a nya, i ’ka a ta tawo lɛ lo,

²² i nɔla yé i buru ble yé i ’yi mini fɛana lé maa a ma we fe i lɛ léé, té i buru ble ’bɛna lo, té i ’yi mini ’bɛna lo, ana, bɛwemalé i gale ’ka dan wɔra lɛ i tranu pana lo.

²³ Bale lé mi nyaa buru blele valé ’yi minile nya aan wo, balelayezan kwa lé é da a nya élé kɔn ’léé, é nyanalafɛ pla sokofale punu a lɛ.

²⁴ Bale lé mi go; wo kee golizra do nya zia yé ’bɛ a gyɛ. A gale a é soile zia; sokofale vo a sɔnɔ yé golizra dɔ a gale bɛ do la.

²⁵ Yé bé ye, a gale lé ke é soile zia, ’té golizra ke é dɔle a bɛ do la bɛ, giémunu a ye; yé wo bɔ fla lé balelayezan kwa ke é nyanale ana, a ta aan wo, wa zuo fe ana.

²⁶ Balelayezan lé é Bale lé mi diéra bɛ, é a ’ma aan wo, é léé: Bale lé mi lé é ’ka Gakelebale dére lɛdɔ lɛ a ma lo, yee lé; Gakelebale a nɔ golizra lɛ, yé ’bɛ a wi kini ékima yé ’bɛ a gyɛ, dére lé Gakelebale a fe a lɛ, a yɛrama.

²⁷ ’Bɛ zuo é we fe é benu lɛ yé é léé: ’Ka nyanalafɛ pla sokofale punu. Wo nyanalafɛ pla a punu yé é go.

²⁸ É bɔ a gale ma é soile zia, ’té sokofale valé golizra a é dɔle a gale bɛ do la. ’Té golizra ’ka a gale ble lɛ lo yé é ’ka sokofale gyɛ lɛ lo.

²⁹ Balelayezan Bale lé mi gale sia, yé é a pla sokofale punu yé é da a nya; yé balelayezan kwa da fla a wuvɔle valé a pale we gi.

³⁰ É a gale pa mipana yé é a wuvɔ, a fele nya léé: Yiba! an bwe loo!

³¹ É nyaa a pale nya yé é lé é benu lɛ léé: Dé an ga, ’ka an pa guru lé maa Bale lé mi pa a gi, a gi, ’ka an wɔlɛnu pa a wɔlɛnu bɛ do la.

³² Naa, dére lé é siaa a nya Gakelebale dére nya, Bétɛl lé balebanna valé gɔ nwiin yobankɔnnu lé wo ke Samari lé flanu ta, wo ta, a lɛ é dan sɔɔ lɛ.

Jéroboam lé we ple

³³ We ’ko zuo, Jéroboam ’ka diéra lɛ élé zi naané ta lo. É munu si é ziin munu faa méléna yé é wo dɔ gɔ nwiin yobannanu lé balebanzannu nya; dé é sɔ miomian lɛ léé, ’é kɛlɛ balebanzan nya, éé ’bɛzan kɛla a nya gɔ nwiin yobannanu zé nya.

³⁴ É kɛlɛ Jéroboam lé kɔn gi munu dia wenyané gi we nya, yé we ’ko ma lé a kulu ga yé wo si tɛrɛ la tata.