1 Minwiinzannu 12 - Kazambale lé Sebe Sauunu 1979

Izraɛl bɛnnu gi bɔi fié Roboam kɛlɛ Judanu nwiinzan nya Jéroboam kɛlɛ Izraɛlnu nwiinzan nya

¹ Roboam go Sisɛm, naa, Izraɛlnu faa go Sisɛm a dɔle minwiinzan blɛn nya we gi.

² Nébat be Jéroboam we ’ko ’ma aan wo, ’té é a Éjipiti tɛrɛ la, fɛana lé é vɔ fli gi Salomɔn lee, ana, ’té éé nyanaan ana.

³ Wo munu nwunvɔ a laana Éjipiti tɛrɛ la, yé é da é pa gi. Yé Jéroboam valé Izraɛlnu faa da Roboam va yé wo lé a lɛ léé:

⁴ I ti nyanama plɛplɛ nɔ ko lɛ; sin, nyanama plɛplɛ valé luubale lé i ti a vɔ ko bɔrɔ ma, bé ke si a ta, yé ko dan ilé nyanama pa lɛ.

⁵ É lé wo lɛ léma: ’Ka go, ’ka da an va yi yaa zuo. Yé munu go.

⁶ Gɔné segelenu lé wo ke minwiinzan blɛn Roboam ti Salomɔn va a yuɛma bléyi va, é we laa wo lee léé: Mɛ we lé ka dan a fe lɛ an lɛ yé maa a fe munu ’konu lɛɛ?

⁷ Yé wo lé a lɛ léma: Kyɔ, dé i we zin kɛlɛ munu ’konu lɛ, yé i pla wo wuo, dé i we zi pa wo lɛ dére zinnu nya, wo dan kɛlɛ lɛ i wuozannu nya lɛɛ faa ma.

⁸ Naa, we lé gɔné segelenu a fe Roboam lɛ, é ’bɛ vo yé é we laa é yɛrama pɛniɛnu lé wo tin wo nya ékeva, ’té wo ke a sɔnɔ bɛ, wo lee.

⁹ É lé wo lɛ léé: Munu ’ko lé wa fe an lɛ léé, luubale lé i ti a vɔ ’wo bɔrɔ ma, bé va dɔ, ’naan, mɛ we lé ka dan a fe lɛ an lɛ yé maa a fe wo lɛɛ?

¹⁰ Pɛniɛnu lé wo tin wo nya ékeva, wo lé a lɛ léma: Munu ’ko lé wa fe i lɛ léé, i ti luubale fɔnɔ ’wo bɔrɔ ma bɛ, bii, bé va dɔ ’wo lɛ, i dan we fe lɛ wo lɛ léma: An bɛnwɔlɛ dané a blɛn é mini an ti gyɛn ta.

¹¹ Sin, an ti luubale fɔnɔ ka bɔrɔ ma, yé maa dan a taa fɔnɔ lɛ é ziin. An ti we lɛdɔ ka gi plén nya, yé maa dan we lɛdɔ lɛ ka gi wɛsɛnénu nya.

¹² Jéroboam valé munu faa da Roboam va a yi yaazan nya; minwiinzan blɛn a fe yi la wo lɛ léé, ’ka da ’é va é ziin yi yaa giéle zuo, azama.

¹³ Minwiinzan blɛn we fe wo lɛ dére plɛplɛ nya. We lé gɔné segelenu a pla a lɛ, minwiinzan blɛn Roboam ’bɛ vo,

¹⁴ yé é we fe wo lɛ, we lé pɛniɛnu a fe a lɛ, a yɛrama. É léé: An ti luubale fɔnɔ ka bɔrɔ ma, yé maa dan a taa fɔnɔ lɛ; an ti we lɛdɔ ka gi plén nya, yé maa dan we lɛdɔ lɛ ka gi wɛsɛnénu nya.

¹⁵ ’Bɛ zo lé minwiinzan blɛn ’ka é tɔné dɔ lɛ munu lɛ lo; naa, a we si Gakelebale va, dére lé Gakelebale a fe Silozan Akija lɔlu nya Nébat be Jéroboam lɛ, a lɛ sɔɔle we gi.

¹⁶ Izraɛlnu faa a ye aan wo léé, minwiinzan blɛn ’ka ’wo dére ’ma lɛ lo, wa fe minwiinzan blɛn lɛ léé: Kolé mɛ fɛ ɛ ke David vaa? Kolé tɔnɔ do kpen ’ka Izai be va lo. Izraɛl munu, kaa go kaalé sɔkɔnnu ’léé. David, ’i ibo lé kɔn mawe kɛlɛ sin, yé Izraɛlnu go ’wolé sɔkɔnnu ’léé.

¹⁷ Roboam pla Izraɛlnu lé woo nyanaan Juda lé flanu ta, wo saa ɛ nwiin.

¹⁸ Adoram lé ke gɔɔlibansimunu nwiinzan nya, minwiinzan blɛn Roboam a nwunvɔ. Naa, Izraɛl munu faa gɔlɛ vuli Adoram va, yé é ga. Yé minwiinzan blɛn Roboam vɔ goro do gi fiéfié yé é go vlan Jérusalɛm.

¹⁹ ’Bɛ zo lé Izraɛlnu kan kini David gɔnɔlamunu ma fɔɔ kyɔ yi nya.

²⁰ Izraɛl munu faa a ’ma aan wo léé, Jéroboam da, wa laa léé, ’é da wo zénna ékeva na, yé wa dɔ Izraɛl faa nwiinzan nya. Juda bɛn do kpen ɛ go David gɔnɔlamunu va.

²¹ Roboam bɔ aan wo Jérusalɛm, é Juda gɔnɔlamunu valé Bɛnjamɛn bɛn?-?gimunu zén ékeva léé, ’wo guli dan Izraɛlnu va, wo plale é ziin Salomɔn be Réboam wuo we gi; wa mi kprakpranu baa vu ta fié lé woo guli daan ’wo zua, wo nya.

²² Naa, Gakelebale we fe Bale lé mi Sémaéja lɛ léé:

²³ ’I we fe Judanu nwiinzan Salomɔn be Roboam koo, Juda munu faa valé Bɛnjamɛn munu faa koo, mi pɔnénu koo, wo lɛ.

²⁴ Bé fe wo lɛ léma: Gakelebale léma: Té ka go lo; té ka guli dan ka bwenu Izraɛl lé nénu va lo. Ka faa do do ’é go kalé kɔn ’léé, naa, we ’ko si maa ɛ va. Wo Gakelebale dére lɛdɔma, yé wo faa nɔla Gakelebale dére yɛrama.

Jéroboam é yara si Bale ta

²⁵ Jéroboam Sisɛm pa Éfraim gɔ nwiin yé é nyana ’bɛna; a zuo é nwa yé é Pénuɛl pa.

²⁶ Jéroboam lé é bli gi léé: Sin, plale mi nwiin se é bɔaléé, é nɔla David gɔnɔlamunu lee.

²⁷ Dé munu ’ko go Jérusalɛm saraka bo lɛ Gakelebale lé kɔn gi, munu ’ko bli é dan nɔla lɛ ’wozan, Juda munu nwiinzan Roboam va, yé wo dan maa gyɛ lɛ yé wo dan nɔla lɛ Juda munu nwiinzan Roboam va.

²⁸ Dé é ’é gi bɔrɔ faa minwiinzan kyandiriné kɛlɛ fié yé é lé munu lɛ léé: Izraɛl munu, ka gole Jérusalɛm bɔ é yi; kalé Bale lé é ka si Éjipiti tɛrɛ la, yee lo.

²⁹ Yé é diriné do dɔ Bétɛl, yé é a koɛ dɔ Dan.

³⁰ We ’ko ɛ munu kɛlɛ wenyanékɛlɛzannu nya. Munu go fɔɔ Dan diriné ’ko bɔle we gi.

³¹ Jéroboam yobankɔn dɔ gɔ nwiin, yé é munu si munu faa méléna yé é wo dɔ balebanzannu nya, ’té wo ’ka Lévi kululazannu nya lo.

³² É fɛti kɛlɛle pélisia moné sɔraazan yi vu ta soruzan nya, bélé fɛti lé wa kɛla Juda tɛrɛ la, a zo, yé wo diriné ban é banna ta. ’Bɛ zo lé é a kɛlɛ Bétɛl, wolé saraka bole diriné lé é a kɛlɛ, a lɛ we ma. Gɔ nwiin yobannanu lé é a kɛlɛ Bétɛl, é balebanzannu dɔ ’bɛna é ziin.

³³ Yi lé é a si a va ébozen lé blibɔmale yɛrama, moné sɔraa lé yi vu ta soruzan nya bɛ, é go ’bɛ yi nya diriné banna lé é a kɛlɛ Bétɛl, ana. É fɛti kɛlɛ Izraɛl lé nénu lɛ yé é lasikɔrɔnu kyɛ ble diriné banna ta.