1 Minwiinzannu 11 - Kazambale lé Sebe Sauunu 1979

Salomɔn é yara si Bale lé we ta

¹ Bɛn lomu kiɛre sɔ Salomɔn lɛ, wo ’ka Faraɔn lu zé fena lo. Moab lomu koo, Amɔn lomu koo, Édom lomu koo, Sidɔn lomu koo, Éti lomu koo, woo lé.

² Bɛnnu lé Gakelebale wo ma we fe Izraɛl lé nénu lɛ léé, té ka go wo va lo, té wo da ka va lo; wo dan ka bli nɔla lɛ wozé balenu va webozen nya bɛ, woo lomu ’konu si ’bɛ bɛnnu gi. Wo va sɔlɛle Salomɔn sia ana, amalé é yere bɛn ’konu ma.

³ Minwiinzannu lunu wuru yaa yɔ soru a Salomɔn nanu nya; a bwɛnu a wuru do yɔ soru; yé a nanu a bli nɔla.

⁴ Salomɔn lé kwagyɛbléyi va, a nanu a bli nɔla bale bɛnu va; yé a bli faa ’ka Gakelebale, alé Bale lɛ, a ti David bli a fɛan zo, a zo lo.

⁵ Salomɔn go Sidɔn munu lé baleda Asataté valé Amɔn munu lé bozo bale Milkɔm zuo.

⁶ Yé we lé ke é naané Gakelebale yuɛ gi, Salomɔn a kɛlɛ yé é ’ka tawo lɛ Gakelebale zuo tegele, a ti David a kɛlɛ fɛan zo, a zo lo.

⁷ Moab lé bozobale Kémos valé Amɔnnu lé bozobale Mɔlɔk, Salomɔn wo banna kɛlɛ loru, gɔ lé ke Jérusalɛm yara, a nwiin.

⁸ Yé é kɛlɛ ’bɛ zo bɛnlomu lé ke a nanu nya, ’té woo lasikɔrɔ valé sarakanu boo wolé balenu lɛ bɛ, wozé nya.

⁹ Gakelebale bli fli Salomɔn ma; é bli si Gakelebale Izraɛl lé Bale lé, é bɔra a va gɔnɔ fié bɛ, a lɛ, azama.

¹⁰ Gakelebale gole bale bɛnu va yi ga Salomɔn lee; naa, é ’ka a lɛdɔ lɛ a ma lo.

¹¹ Gakelebale lé Salomɔn lɛ léé: Bé kɛlɛ aan wo ’bɛ zo, yé i ’ka dɔ lɛ anlé gipawe ta lo, yé bélidɔwe lé maa a fe i lɛ, i ’ka a ta tawo lɛ lo, amalé maa dan plale mi nwiin si lɛ i lee yé maa a nɔ i wuozan do lɛ.

¹² Naa, maa ’ka dan a kɛlɛ lɛ i yuɛma bléyi va lo, i ti David lé we ma. I be lee lé maa dan a si lɛ.

¹³ Maa ’ka dan kalé tɛrɛ faa si lɛ a lee lo; maa dan bɛn do vo lɛ i be lee, an wuozan David valé Jérusalɛm lé maa a si a va, wolé we ma.

Salomɔn nyanézannu

¹⁴ Édom mi Adad lé ke Édom munu gɔnɔlami do nya, Gakelebale a nwa Salomɔn nyanézan nya.

¹⁵ Bléyian va lé David guli dan Édom munu va, sunya nwiinzan Joab go migalenu pa lɛ yé gɔnénu faa lé ke Édom, é wo gyɛ;

¹⁶ é vo ana moné suiɛdo, wo valé Izraɛl lé sunyanu nya, fɔɔ yé é gɔnénu faa gyɛ tata.

¹⁷ Naa, Adad vɔ fli gi Édom mi kenu lé ke a ti wuomunu nya, wo va, yé wo go Éjipiti tɛrɛ la. Adad a tan né nya.

¹⁸ Wo si Madian tɛrɛ la yé wo go Paran tɛrɛ la, yé wo Paran mi kenu si yé wo go wo nya Éjipiti tɛrɛ la, Éjipiti minwiinzan Faraɔn va. Faraɔn kɔn nɔ Adad lɛ, yé é fɛblele valé tɛrɛnu nɔ a lɛ é ziin.

¹⁹ Adad kɛlɛ mi zin nya Faraɔn yuɛ gi, fɔɔ yé Faraɔn é na Takpénɛs zuané nɔ a lɛ a na nya.

²⁰ Takpénɛs zuané négɔné Génubat yaa a lɛ. Takpénɛs a si nyɔ ma Faraɔn lé kɔn gi, yé Génubat vo Faraɔn lé kɔn gi, Faraɔn lé nénu méléna.

²¹ Adad a ’ma aan wo Éjipiti tɛrɛ la léé, David yi gyɛ é tranu va yé sunyanu nwiinzan Joab ga, é lé Faraɔn lɛ léé: ’I zi nɔ an lɛ, ’an go anlé tɛrɛ la.

²² Faraɔn lé a lɛ léé: Mɛ fɛ ɛ vuru i ma an va ’ko, yé é sɔ i lɛ léé, ’é go ’élé tɛrɛ laa? É a zi pa léé: We do kpen kaan lo, naa, ’i zi nɔ an lɛ.

²³ Bale Salomɔn nyanézan do nwa é ziin, Éliada be Rézɔn lé é vɔ fli gi ézan Soba munu Adadézɛɛ lee, a nya.

²⁴ Bléyian va lé David azan lé sunyanu gyɛ, ’bɛ bléyi va é mi kenu zén ékeva ’é va yé é kɛlɛ wo nwiinzan nya. É go Damas yé é nyana ’bɛna, yé é pla munu nwiin Damas.

²⁵ É kɛlɛ Izraɛl nyanézan nya Salomɔn lé tɛrɛ la faa gi, ’té Adad éé wenyané kɛla Salomɔn lɛ a bléyi duo nya. Izraɛl za a a gi, yé é pla Siri munu nwiin.

Bale blivolɛdére fe Jéroboam lɛ

²⁶ Salomɔn wuozan Jéroboam é ziin, ’bɛ nwa minwiinzan ma. A ti a Éfrat mi Nébat lé é si Séréda, a nya, yé a bu a zanagalale lé wa laama Sérua, a nya.

²⁷ É nwa minwiinzan ma bɛan zo, yee lé ke ’ko. Salomɔn a Milo pana yé é a é ti David lé flagɔrɔ sɛrɛle ma’lɛrɛna.

²⁸ Jéroboam a pɛniɛ lé a ta ke kelekele, ’té a ’wuo ke a ta, a nya; Salomɔn a ye nyanama pana yé é a dɔ Jozɛfu gɔnɔ la fɔrɔlɔnu faa nwiin.

²⁹ ’Bɛ bléyi va, Jéroboam si Jérusalɛm yé wo kee Silozan balelayezan Akija nya, ’té sɔ dɛrɛ a ’bɛ ta. Wa wo fié bwi gi.

³⁰ Akija kun ’élé sɔ dɛrɛ ma, yé é a bɔi vu ta fié,

³¹ yé é lé Jéroboam lɛ léé: ’Izé si vu. Naa, Gakelebale, Izraɛl lé Bale léma: Bé ye, maa dan bɛntɛrɛnu si lɛ Salomɔn lee, yé maa bɛn vu nɔ i lɛ.

³² Naa, bɛn do é dan vo lɛ a lee, an wuozan David valé fla lé maa a si a va anzé nya Izraɛl bɛnnu faa gi, Jérusalɛm lé we ma.

³³ Wo si an va yé wo yia ’wo bli la Sidɔn munu lé baleda Asataté koo, Moab lé bale Kémɔs koo, Amɔn munu lé bale Milkɔm koo, wo ’lɛ, yé wo ’ka tawo lɛ anlé zinu ta, we lé ke é drɔle an yuɛ gi, a kɛlɛle we gi lo, yé wo ’ka anlé bélidɔwenu valé an déretawenu kɛlɛ lɛ, Salomɔn ti David a kɛlɛ fɛan zo, a zo lo, amalé maa dan we ’ko kɛlɛ lɛ.

³⁴ Maa ’ka dan bɛntɛrɛ faa si lɛ a lee lo, é dan vo lɛ minwiinzan nya élé tɛrɛla faa gi, an wuozan David lé maa a si a va, ’té éé anlé bélidɔwe sɔnnénu paan, ’té éé tawoo anlé bélidɔwenu ta bɛ, alé we ma.

³⁵ Naa, maa dan bɛntɛrɛnu si lɛ a be lee, yé maa dan bɛn vu nɔ lɛ bii lɛ;

³⁶ maa dan bɛn do vo lɛ a be lee, léé, té an wuozan David lé kyɛbɔ é diri an yara, Jérusalɛm lé maa a si a va an tɔ pale a ma we gi, ana lo.

³⁷ Maa i si a va, yé i dan pla lɛ ilé blibɔmafɛnu faa nwiin, i dan kɛlɛ lɛ Izraɛl nwiinzan nya.

³⁸ Dé i an dére lɛdɔma, dé i anlé zinu ta tawo, we lé ke é drɔle an yuɛ gi, dé i ’bɛ kɛlɛ anlé bélidɔwe ta tawole valé an sɔnné pale nya, an wuozan David a kɛlɛ fɛan zo, a zo, maa dan kɛlɛ lɛ i va, yé maa dan ilé kɔn dɔ lɛ gligli, maa David zé dɔ fɛan zo, a zo, yé maa dan Izraɛl nɔ lɛ i lɛ.

³⁹ ’Bɛ nya lé maa dan David kulu tua lɛ, naa, yifaama kaan lo.

⁴⁰ Salomɔn kwa kuli léé, ’é Jéroboam gya. Jéroboam nwa yé é vɔ fli gi yé é go Éjipiti tɛrɛ la, ana mununwiinzan Sisak va; é nyana Éjipiti tɛrɛ la fɔɔ yé Salomɔn ga.

⁴¹ Salomɔn kɛlɛwe pɔnénu koo, we faa lé é a kɛlɛ koo, alé wedɔɔle koo, wa é gyɛle Salomɔn kɛlɛwenu zuofesɛbɛ gi.

⁴² Salomɔn pla Izraɛl faa nwiin lɛɛ yɔ fié Jérusalɛm.

⁴³ ’Bɛ zuo Salomɔn yi gyɛ é tranu va, yé wa pa é ti David lé fla. A be Roboam kɛlɛ minwiinzan blɛn nya a pa gi.