1 Minwiinzannu 10 - Kazambale lé Sebe Sauunu 1979Séba nwiin le da we lɛ Salomɔn va ( 2 MNzfs 9:1–12 ; Lk 11:31 ) 1 Tɔ lé Salomɔn a ye Gakelebale tɔ kɛlɛle blɛn we gi, Séba munu nwiin le a tawe ’ma aan wo, é da Salomɔn gi dan lɛ tɔraléé gyɛle nya. 2 É bɔ Jérusalɛm é zuomunu kiɛre koo, nyɔgɔménu lé zianbla ginzannu valé kyan kiɛre valé gɔlɛwezannu kɔné ke wo punu koo, wo nya. É go Salomɔn va, yé we faa lé ke a bli gi, é a fe ’bɛ lɛ. 3 Salomɔn alé we laale faa zi pa, yé we lé Salomɔn ’ka bɔ lɛ a gi fele lɛ a lɛ lo, ’bɛ we ’ka lo. 4 Salomɔn lé wedɔɔle faa koo, kɔn lé é a dɔ koo, 5 alé tablé tafɛ koo, a wuozannu lé kɔnnu koo, a wuozannu lé nyanama valé wolé sɔ koo, alé nwɛminikana sizannu koo, balebanwi lé éé a kyɛ blé Gakelebale lɛ koo, Séba munu nwiin le a faa ye. A fuu si a ta yé é lé minwiinzan lɛ léé: 6 We lé maa ’ma anlé tɛrɛ la, i dɔna valé ilé wedɔɔle tawe nya, webozen lé turu. 7 Dé maa ’ka da lɛ yé maa a ye anbo yuɛ nya lo, maa ’kanɔ an bli paan a lɛ lo. Yé bé ye, wa yuɛla saa ɛ fe an lɛ é pla. Ilé wedɔɔle valé ilé fuablele a kiɛre é mini wo tawe lé maa a ’ma, a ta. 8 Ilé munu zé a néné, i wuomunu lé wo ke i ’lɛ yifaama, ’té woo ilé wedɔɔdére maan, wozé a néné! 9 Gakelebale ilé Bale lé é we zin kɛlɛ i lɛ i nyanale Izraɛl lé webleblin ta nya, a drɔɔ ’é vo ma! Izraɛl sɔ Gakelebale lɛ lɛɛfaama, bɛwemalé é i dɔ minwiinzan nya we drɔle valé we tegele kɛlɛle we gi. 10 Kyan talan yɔ suiɛdo koo, zianbla ginzannu kiɛre koo, gɔlɛwezannu koo, é a nɔ minwiinzan lɛ. Zianbla ginzannu lé Séba munu nwiin le a nɔ minwiinzan Salomɔn lɛ, mi bɛ ’ka da lɛ ’bɛ zo fɛ kiɛre nya lo. 11 Iiram lé ’yitagoronu lé wo kyan si Ofii, wo sandalayili valé gɔlɛwezannu kiɛre si ana é ziin. 12 Gakelebale lé kɔn pa koo, minwiinzan lé kɔn pa koo, lɛrɛvɔmunu lé kɔnɔnu valé kpélénu koo, Salomɔn wo kɛlɛ sandalayili ’ko nya. Sandalayili bɛ ’ka da lɛ lo yé wo ’ka a ye lɛ é ziin lo fɔɔ kyɔ. 13 Fɛ faa lé é sɔ Séba munu nwiin le lɛ, fɛ faa lé é a ma laa, minwiinzan Salomɔn wo nɔ a lɛ, yé Salomɔn blɛ kɛlɛ a lɛ é ziin ’é tɔ blɛn yɛrama. ’Bɛ zuo é nɔla é ziin yé é go ’élé tɛrɛ la, yee valé é wuomunu nya. Salomɔn lé fua ( 2 MNzfs 1:14–17 ; 9:13–28 ; Mt 6:29 ) 14 Kyan lé Salomɔn a yé lɛɛ do do gi é a kyan talan wuru yaa yɔ yaa wɔlɛ suiɛdo, 15 ’té ’bɛ lé é ’bɛ yé fɛdanzannu koo, yaawomunu koo, Arabi minwiinzannu faa koo, tɛrɛ la gbɔrɔnamanu koo, wo lee, ’bɛ a é yɛrama. 16 Minwiinzan Salomɔn mibotakuunfɛ blɛnblɛn wuru do kɛlɛ kyan lé wa gyɛ, a nya; wo do do lé kyan a kyan sikla wuru yaa. 17 Yé é mibotakuunfɛ bɛnu kɛlɛ é ziin, kyan lé wa gyɛ, a nya; wo do do kyan a miné yaa; minwiinzan wo pla Liban pɔrɔ kɔn gi. 18 Minwiinzan webleblin blɛn kɛlɛ vwii suiɛ nya yé é a ma sɔɔla kyan tegele nya. 19 Webleblin ’ko lé sikalié a suiɛdo, yé a kolitɛngifɛ a é dirile a zuozia yé a gɔyili a a bɛ fié la; golizra fié a a gɔyili sɔnɔ, 20 yé golizra vu ta fié a sikalié suiɛdo ta, bɛ fié la. Wo ’ka ’bɛ zo fɛ do kpen kɛlɛ lɛ tɛrɛ bɛ do kpen zé nya lo. 21 Salomɔn lé fɛminikana faa a kyan nya, yé Liban pɔrɔ kɔn gi kananu faa a kyan tegele nya. A do kpen ’ka gɔɔlifu nya lo; ’bɛ ’ka we do kpen nya Salomɔn bléyi va lo. 22 Naa, minwiinzan lé Taasis ’yitagoro a wɛyi ta Iiram zé va; ’yitagoronu éé sié Taasis lɛɛ yaa gɔnɔ do, ’té kyan koo, gɔɔlifu koo, vwii suiɛ koo, palenu koo, pan‐ɔnnu koo, é a wo gi. 23 Minwiinzan Salomɔn mini tɛrɛ la minwiinzannu faa ta élé fuablele valé élé wedɔɔle nya. 24 Munu faa a kwa kulina léé, ’wo Salomɔn ye, wedɔɔle lé Bale a pa a bli gi, a ’male we gi. 25 Yé wo faa do do éé dan a blan nya, gɔɔlifu valé kyanfɛnu koo, sɔnu koo, gulidanfɛnu koo, zianbla ginzannu koo, wisoonu valé sokofalenu koo, wo nya; é a ’bɛ zo lɛɛ faa do do ma. 26 Salomɔn goronu valé wisoonu zén ékeva kiɛre; alé goronu a wuru sɔrafié, yé alé vɔwisootazannu a mi baa suiɛdo yé é wo nyana flanu lé goronu ke wona, wo ta, ’bɛ valé Jérusalɛm, ’é sɔnɔ. 27 Minwiinzan gɔɔlifu kɛlɛ fɛ pla nya Jérusalɛm bélé gɔlɛnu zo, yé é sɛdrɛyili kɛlɛ kiɛre bélé sikomɔyili lé éé tin‐é fɛna dégéléna, a zo. 28 Woo sié Salomɔn lé wisoonu nya Éjipiti tɛrɛ la; minwiinzan lé yaawomunu palu do éé goo wo si lɛ wo palu nya, a vlɛ lé wa fe é kyɛn, a nya; 29 dé goro do lé é si Éjipiti tɛrɛ la, a vlɛ a gɔɔlifu sikla wuru yaa; wisoo do, sikla yɔ sɔrafié wɔlɛ vu. Woo dan wo nya é ziin Étimunu nwiinzan valé Sirimunu nwiinzan zé nya. |
Alliance Biblique de Cote d'Ivoire 1979
British & Foreign Bible Society