1 Minwiinzannu 1 - Kazambale lé Sebe Sauunu 1979

David kɛlɛ kwa

¹ Minwiinzan David kɛlɛ é kwa, yé a lɛɛ a kiɛre; wo sɔnu zén a ta, naa, mi lé ’bɛ é kyɛ pa a ma, ’bɛ ’ka lo.

² A wuomunu lé a lɛ léé: Blɛn lé é ’ka tan gɔné dɔɔ lɛ lo, ’wa gini anzan minwiinzan zé nya ma; ’é dɔ minwiinzan ’lɛ ma, ’é a pa ma, yé ’é yia i blinii ma, yé ’é kyɛ pa i ma.

³ Wo blɛn nɔnɔmi gini Izraɛl tɛrɛ faa la, yé wo Sunɛm le Abisag ye, yé wo da a nya minwiinzan va.

⁴ Blɛn ’ko a é nɔnɔmi é baba. É minwiinzan pa yé é nyanama pa a lɛ, naa, minwiinzan ’ka a dɔɔ lɛ le nya lo.

Adonija ébo kɛlɛ minwiinzan nya

⁵ Agit be Adonija blii boblɛn nya fɔɔ yé é léé: Maa ɛ dan kɛlɛ lɛ minwiinzan nya. Yé é goro valé wisootazannu ye, é valé mi yɔ fié wɔlɛ vu lé woo vlan buruwo a ’lɛ, wo nya.

⁶ A ti ’ka we pla lɛ a lɛ alé tɛrɛla faa gi, léé, mɛmalé i ’bɛ kɛlaa? lo. Yé é ziin, Adonija a é nɔnɔmi é baba yé wa yaa Abusalɔm zuo.

⁷ Séruja be Joab valé Balebanzan Abiataa, wo ’wuo tɛn ékema wo nya; yé wo dɔ Adonija zuo.

⁸ Naa, Balebanzan Sadɔk koo, Jéojada be Bénaja koo, balelayezan Natan koo, Siméi koo, Réi koo, David lé nyanazannu koo, wo ’ka Adonija va lo.

⁹ ’Blanu koo, dirigɔnénu koo, diriné bualenu koo, Adonija wo gyɛ Zoélɛt gɔlɛ lé ke An‐Rogɛl bɛ do la, a sɔnɔ; a bwenu minwiinzan benu valé Juda munu faa lé woo minwiinzan lé nyanama paan, é wo laa.

¹⁰ Balelayezan Natan koo, Bénaja koo, nyanazannu koo, a zuané Salomɔn koo, é ’ka wo laa lɛ lo.

David Salomɔn kɛlɛ minwiinzan nya

¹¹ Yé Natan lé Salomɔn bu Bat‐Sééba lɛ léé: I ’ka a ’ma lɛ léé, Agit be Adonija kinin minwiinzan nya kozan David ma trɔnné va loo?

¹² Amalé ’i da sin, yé maa dan we do pla lɛ i lɛ, yé bii valé i be Salomɔn é vo é yuɛma.

¹³ ’I go, ’i wɔra minwiinzan David va, yé bé fe a lɛ léé: Oo anzan minwiinzan, i ’ka bale ’nyɔɔn lɛ i wuo le lɛ léé, i be Salomɔn ɛ dan pla lɛ munu nwiin é pa gi yé é dan nyana lɛ ’élé webleblin ta, loo? Mɛmalé Adonija a é plale munu nwiin?

¹⁴ Yé bé ye, dé i a we fena minwiinzan lɛ ’bɛna bléyian va, maabozen é dan wɔra lɛ i zuo, yé maa dan i dére dɔ lɛ gligli.

¹⁵ Bat‐Sééba go minwiinzan va alé kɔn gi. É kwa gyɛ yé Sunɛm le Abisag nyanama pa a lɛ.

¹⁶ Bat‐Sééba tua yé é yia é bli la minwiinzan ’lɛ. Yé minwiinzan léé: Mɛ léé?

¹⁷ É a zi pa a lɛ léé: Anzan, i Gakelebale ilé Bale ’nyɔɔn i wuo le lɛ léé: I be Salomɔn ɛ dan pla lɛ munu nwiin ’é pa gi, yé é dan nyana lɛ ’élé webleblin ta.

¹⁸ Yé bé ye, sin, Adonija a é plale munu nwiin. Anzan minwiinzan, yé bii ’ka a gi dɔɔa lo.

¹⁹ Dirigɔnénu koo, diriné bualenu koo, ’blanu koo, é wo gyɛ kiɛre; minwiinzan benu faa koo, Balebanzan Abiataa koo, sunyanu nwiinzan Joab koo, é wo laa, naa, é ’ka i wuozan Salomɔn laa lɛ lo.

²⁰ Anzan minwiinzan, Izraɛl faa yuɛ a i lɛ, dé mi kyɛn ɛ dan nyana lɛ anzan minwiinzan lé webleblin ta a pa gii? yé wa dɔɔ.

²¹ Yé dé anzan minwiinzan yi gyɛ é tinu va, wo dan we kɛlɛ lɛ maa valé an be Salomɔn lɛ bélé weanwiinzannu zo.

²² É a tan we fena minwiinzan lɛ, tɔɔn, bé ye, balelayezan Natan da.

²³ Wa fe minwiinzan lɛ léé: Balelayezan Natan lo. É wɔra minwiinzan va yé é yia é bli la minwiinzan ’lɛ, ’té a yara a é buale tɛrɛ va.

²⁴ Yé Natan léé: Anzan minwiinzan, bii ɛ fe léé, Adonija é dan pla lɛ munu nwiin i pa gi, yé é dan nyana lɛ ilé webleblin taa?

²⁵ Naa, é go kyɔ yé dirigɔnénu koo, diriné bualenu koo, ’blanu koo, é wo gyɛ kiɛre; minwiinzan benu koo, sunyanu nwiinzannu koo, Balebanzan Abiataa koo, é wo laa. Yé bé ye, wa fɛblena ’té woo fɛ minian a ’lɛ yé wo léé: Minwiinzan Adonija ’é vo é yuɛma ma!

²⁶ Maa lé an ke i wuozan nya koo, Balebanzan Sadɔk koo, Jéojada be Bénaja koo, i wuozan Salomɔn koo, é ’ka ko do kpen laa lɛ lo.

²⁷ Anzan minwiinzan ɛ fe ’bɛ zo weboen nya, yé dé mian é dan nyana lɛ anzan minwiinzan lé webleblin ta a pa gi, yé i ’ka a gavɔ lɛ an la loo?

²⁸ Minwiinzan David a zi pa léé: ’Ka Bat‐Sééba laa, ’é da. É wɔra yé é yia é bli la minwiinzan ’lɛ.

²⁹ Yé minwiinzan Bale ’nyɔɔn a lɛ, yé é léé: Gakelebale lé é an si nyané blele faa gi, é a é yuɛma.

³⁰ We lé maa a fe i lɛ Gakelebale Izraɛl lé Bale ’nyɔɔnle nya léé, i be Salomɔn é dan pla lɛ munu nwiin an pa gi yé é dan nyana lɛ an pa gi anlé webleblin ta, maa dan a kɛlɛ lɛ kyɔ.

³¹ Bat‐Sééba é yara tua tɛrɛ va yé é yia é bli la minwiinzan ’lɛ. Yé é léé: Anzan minwiinzan David, ’é vo é yuɛma lɛɛfaama ma.

³² Minwiinzan David léé: Balebanzan Sadɔk koo, balelayezan Natan koo, Jéojada be Bénaja koo, ’ka wo laa, ’wo da. Wo wɔra minwiinzan va.

³³ Yé minwiinzan lé wo lɛ léé: ’Ka go kazan wuomunu nya ka va ma, ’ka an be Salomɔn nyana anlé sokofale punu yé ’ka go a nya Giɔn.

³⁴ ’Bɛna lé Balebanzan Sadɔk valé balelayezan Natan é dan nyɔnɔ zén lɛ a nwiin a kɛlɛle Izraɛlnu nwiinzan nya we gi. Ka dan béli fɛn lɛ, yé ka dan a fe lɛ léé: Minwiinzan Salomɔn ’é vo é yuɛma ma!

³⁵ Ka dan da lɛ é ziin a zuo; é dan nyana lɛ anlé webleblin ta yé é dan pla lɛ munu nwiin an pa gi. An dére ta lé é dan kɛlɛ lɛ Izraɛl valé Juda nwiinzan nya.

³⁶ Jéojada be Bénaja a zi pa minwiinzan lɛ léé: ’É kɛlɛ a zo. Gakelebale, anzan minwiinzan lé Bale, ɛ fe a zo.

³⁷ Gakelebale kɛlɛ anzan minwiinzan va fɛan zo, ’é kɛlɛ Salomɔn va a zo ma, yé ’é alé plale mi nwiin mini anzan minwiinzan David zé ta ma.

³⁸ Yé Balebanzan Sadɔk go balelayezan Natan koo, Jéojada be Bénaja koo, Kérétimunu koo, Pélétimunu koo, wo nya é va. Wo Salomɔn nyana minwiinzan David lé sokofale ta, yé wo go a nya Giɔn.

³⁹ Wibéli lé nyɔnɔ ke a gi, Balebanzan Sadɔk a si sɔkɔn gi yé é a zén Salomɔn nwiin. Wo béli fɛn, yé munu faa léé: Minwiinzan Salomɔn ’é vo é yuɛma ma!

⁴⁰ Munu faa go a zuo, yé munu séén fɛn yé wobo nɔ gi nanale blɛn lɛ; wo siaalenu tɛrɛ ma nyɔɔn.

⁴¹ Adonija valé alé milaalenu lé wo ke a va bɛ, wo nyaa fɛblele nya tɔɔn, wo vun wele ’ko ’ma. Joab béli vun wele ’ma yé é léé: Mɛmalé fla bɔ gyɛɛ?

⁴² É a tan we fena tɔɔn, Balebanzan Abiataa be Jonatan da. Adonija lé a lɛ léé: ’I bié, naa, i a nyanazan nya yé i da we néné fe lɛ.

⁴³ Jonatan a zi pa Adonija lɛ léé: Iin, kozan minwiinzan David Salomɔn kɛlɛ minwiinzan nya.

⁴⁴ Balebanzan Sadɔk koo, balelayezan Natan koo, Jéojada be Bénaja koo, Kérétimunu valé Pélétimunu koo, é wo nwunvɔ Salomɔn va yé wa nyana minwiinzan lé sokofale ta.

⁴⁵ Balebanzan Sadɔk valé balelayezan Natan nyɔnɔ zén a nwiin Giɔn, a kɛlɛle minwiinzan nya we ma. Wo si ’bɛna yé wo da é ziin wobo nɔle nya gi nanale lɛ, yé fla bɔ gyɛ; vun wele lé bé ’ma bɛ, a gi lé ke bɛ.

⁴⁶ Salomɔn a é nyanale minwiinzan lé webleblin ta.

⁴⁷ Yé minwiinzan wuozannu da kozan minwiinzan David drɔɔ vo lɛ, a fele nya léé: Ilé Bale ’é Salomɔn tɔ kɛlɛ blɛn é mini izé ta, yé ’é alé plale mi nwiin gi gyɛ é mini izé ta! Yé minwiinzan yia é bli la élé yialafɛ ta.

⁴⁸ We lé minwiinzan a fe, yee lé ke ’ko. É léé: Gakelebale, Izraɛl lé Bale lé é an paizan nɔ an lɛ kyɔ yé é nyana anlé webleblin ta, yé é a nyi si léé, maa ana ye, ’wa drɔɔ vo ma!

⁴⁹ Kana blɛn zén Adonija lé milaalenu gi; wo nwa yé wo faa do do ’wobo lé zi sia.

⁵⁰ Adonija kana Salomɔn lee; é nwa é ziin yé é go yé é kun balebanna bélinu ma.

⁵¹ Wo da a fe lɛ Salomɔn lɛ léé: Bé ye, Adonija kana minwiinzan Salomɔn lee, yé é kun balebanna bélinu ma a fele nya léé: Minwiinzan Salomɔn ’é bale ’nyɔɔn an lɛ kyɔ léé, é ’ka dan é wuozan gyɛ lɛ gwɔun nya lo ma.

⁵² Salomɔn léé: Dé ébo nagɔɔn mi tegele nya, a nwiin nwin gɔ do kpen ’ka dan dia lɛ tɛrɛ va lo; naa, dé wo we ple ye a gi, é dan ga lɛ.

⁵³ Yé minwiinzan Salomɔn munu nwunvɔ yé wo go a si lɛ balebanna ma. É da, é yia é bli la minwiinzan Salomɔn ’lɛ, yé Salomɔn lé a lɛ léé: ’I go ilé kɔn ’léé.