1 Korent munu 9 - Kazambale lé Sebe Sauunu 1979

Kazambale Izraɛl munu si a va

¹ Maa ’ka anboma loo? Maa ’ka nwunvɔzan nya loo? Maa ’ka Mizan Jézu ye lɛ loo? Ka ’ka anlé nyanama tɔnɔ nya Mizan gi loo?

² Dé maa ’ka nwunvɔzan nya mi bɛnu yuɛ gi lo, maa a a nya ka yuɛ gi duowo; kalé we ma lé munu a gi dɔɔ léé, maa a Mizan lé nwunvɔzan nya.

³ Dé mi we dɔ an nwiin, we sié an nwiin we lé ke bɛ.

⁴ A se ’ka ko lɛ léé, ko fɛ ble yé ko fɛ mini loo?

⁵ A se ’ka ko lɛ léé, ko Krétiɛn le si ko na nya, yé ko go wo nya bélé fɛan zo lé nwunvɔzan pɔnénu koo, Mizan zuanénu koo, Séfa koo, wo ke a kɛlɛna, a zo loo?

⁶ Yé é ziin, maa valé Banabas, a se ’ka ko lɛ léé, ko é ziin ko nyanama bɛnu vo loo?

⁷ Mi kyɛn ɛ sunya kɛla ’té é ébozen banwoo? Yé mi kyɛn ɛ yili suruan, ’té é ’ka a poro blé loo? Mi kyɛn ɛ trubɛ tabin‐é, ’té é ’ka a nyɔyi minian loo?

⁸ Maa we ’konu fé blami lé wedɔɔle yɛramaa? Bélidɔwe é ziin, ’bɛ ’ka yee we duo fena loo?

⁹ Naa, é a é gyɛle Moizi lé bélidɔwe gi léé: Diri lé é ke nyanama pana ilé féi, té bé ’léé lɛ tan lo. Dirinu lé gibɔrɔle ɛ ke Kazambale ma laa,

¹⁰ taa, é a kaa ɛ lé we fenaa? Iin. Kaalé we ma lé wa gyɛ sɛbɛ gi léé, dé mi a féi pana é a lé a bli é vo a lɛ léé, é dan tɔnɔ ye lɛ. Dé mi a ’sa sunwona, é a lé a bli é vo a lɛ léé, é dan ézé ye lɛ.

¹¹ Dé ko lélifɛ zinnu vɔa ka méléna ’sa zo, yé dé ko tɛrɛlafɛnu gya ka va, ’bɛ a we blɛn nyaa?

¹² Dé fɛ ’konu yele ka nwiin se a mi bɛnu lɛ, wo yele ka nwiin se ’ka ko lɛ yé é mini ’bɛnu zé ta loo? Naa, ko ’ka ’bɛ nyi si lɛ lo. We lé ko kɛla, yee lé ke léé, ko ko ’wuo dɔa we faa wuo, té ko Krist lé Wenéné gi sɛrɛ lo we ma.

¹³ Ka ’ka a gi dɔɔa léé, munu lé woo balebannyanama paan, woo fɛ blé Balebangikɔn ma loo? Yé wo lé woo nyanama paan balebanna, wo ’wozé yé balebanna ma loo?

¹⁴ A zo duo lé é ziin, Mizambale a béli dɔ léé, munu lé woo Wenéné ’ko fé, ’wo fɛ ble a ma.

¹⁵ Naa, maa ’ka tɔnɔ do kpen sina we ’ko gi lo; yé maa ’ka sɛbɛ ’ko gyɛna a yele we ma lo. Dé é a ’bɛ zo, a fila vɔ léé, ’an ga. Mi do ’ka an zevɔwe ’ko sié an lee lo.

¹⁶ Dé maa Wenéné ’ko fe, ’bɛ ’ka an zevɔwe nya lo; é a lé maa kɛlɛ. Dé maa ’ka Wenéné ’ko fé lo, ’té an diri kini anbo lɛ.

¹⁷ Dé é kɛlɛ léé, maa a kɛla anbozen lé blibɔmawe yɛrama, ’té maa a ma gooli sié; naa, dé maa ’ka a kɛla anbozen lé blibɔmawe yɛrama lo, ’té nyanama lé Bale a bɛ pa an lee, ’té yee lé.

¹⁸ ’Té an gooli lé é ke mɛ fɛ nyaa? Maa Wenéné fé munu lɛ é pla, ’bɛ ɛ ke an gooli nya. Tɔnɔ lé é a lé maa a si wefele we ma, maa ’ka ’bɛ sié lo.

¹⁹ Maa a anboma; maa ’ka mi wuo lo. Naa, maa kɛlɛ munu faa wuozan nya mi kiɛre boen yele we ma.

²⁰ Dé maa a Juifinu va, maa anbo kɛlɛ Juifi mi zo, Juifinu yele we gi. Maabozen ’ka é dɔle bélidɔwe ta lo, naa, duowo, munu lé wo ke é dɔle bélidɔwe ta, dé maa a wo va, maa anbo kɛla bélé wo zo, wo yele we ma.

²¹ Maa ’ka sɔnvɔ?-?zan nya Kazambale lé bélidɔwe ma lo; maa a Krist lé bélidɔwe ta, naa, duowo, munu lé wo ’ka bélidɔwe kɛla lo, dé maa a wo va, maa anbo kɛla bélé wo zo, wo yele we ma.

²² Maa kɛla mi tɔɔtɔɔ nya mi tɔɔtɔɔnu va, wo yele we ma. Maa anbo nɔla bɛ faa ma munu faa va, léé, dé maa mi kenu sié we gii?

²³ Maa we ’konu faa kɛla Wenéné lé we ma, anzé kɛlɛle a va we ma.

²⁴ Ka a gi dɔɔ léé, munu lé woo za kɛla vlan buruna, wo faa éé vlan buruwo, naa, wo va mi do kpen ɛ a ma gooli yé. Yee kaan loo? ’Ka vlan buru a yebɛ yɛrama.

²⁵ Naa, zakɛlɛzannu faa éé sɔn vɔa fɛ kenu ma. Wa kɛla a ma ban lé éé nyaan, a yele we gi. Naa, kaa a kɛla ban lé é ’ka nyaan lo, a yele we gi.

²⁶ Bɛwemalé, maa ’ka vlan buruwo nɔɔle nya lo. Maa ’ka fɔlɛ vulian é boa lo.

²⁷ Naa, maa fɛ duun‐an an kɔlɛ lɛ, yé maa a kɛla anlé luu nya, dé wo da sɔn vɔ an ma, anlé wefele mi bɛnu lɛ zuo.