1 Korent munu 8 - Kazambale lé Sebe Sauunu 1979

Yobanwi lé we

¹ Dé é a yobanwinu lé we nya, ko faa ’bɛ gi dɔɔ wéiin. Wedɔɔle éé mi bliian boblɛn nya; naa, sɔlɛle éé mi dɔa gligli.

² Dé é a mian gi léé, é we dɔɔ, ’té é ’ka tan a dɔɔ lɛ bélé fɛan zo lé é a lé é a dɔɔ, a zo lo.

³ Naa, dé Kazambale sɔ mian lɛ, Kazambale ’bɛzan dɔɔ.

⁴ Yobanwi blele lé we a ’ko zo: ko a gi dɔɔ léé, miyili ’ka we do nya tɛrɛ la lo, yé Bale a do kpen.

⁵ Naa, fɛnu lé munu éé wo laama balenu valé mizannu, wa di; wa la gi yé wa é ziin tɛrɛ la.

⁶ Naa, duowo, dé é a kozé nya, Bale a do kpen, yee lé ke Tibale nya. A va lé fɛnu faa éé sié; yé kaa a azé nya. Mizan a do kpen, Jézu Krist lé. Alé we ma lé fɛnu faa ke; alé we ma lé kaa ke.

⁷ Naa, wedɔɔle ’ko ’ka mi faa gi lo. Munu lé wo yo ban é vinin, dé wo yobanwi ble tɔɔn, ’té yobanle sele a dɔna wo gi, ’té wolé wevasibli lé é ’ka plɛplɛ lo, ’té a tiri a dɔna.

⁸ Fɛblele ’ka goo kaa nya Kazambale va lo. Dé kaa fɛ blé, ’bɛ ’ka kaa biéan a sɔnɔ lo. Dé kaa ’ka fɛ blé lo, ’bɛ ’ka kaa sié a ma baa lo.

⁹ Naa, ’ka yuɛ pa kabozen va duowo, dé ka vole kaboma é da kɛlɛ mi tɔɔtɔɔnu saanwe nya.

¹⁰ Yé biian i we dɔɔ, dé mi tɔɔtɔɔ do i ye fɛblena yobangikɔn gi, alé wevasibli ’ka dan a nyunu lɛ yobanfɛnu blele we gi loo?

¹¹ Yé ’ko zo lé ilé wedɔɔle we ma lé i bwe tɔɔtɔɔ lé Krist ga alé we ma bɛ, yé é zamaga woo?

¹² Dé ka wenyané ’ko zonu kɛlɛ ka bwenu ma, yé wolé wevasibli lé é ’ka plɛplɛ lo, yé ka ’bɛ sɛrɛ, ’té ka wenyané kɛlɛ Krist ma.

¹³ Bɛwemalé, dé anlé fɛblele an bwe saan, maa ’ka dan wi ble lɛ é dɛrɛ monomono lo; té maa an bwe saan lo we ma.