1 Korent munu 7 - Kazambale lé Sebe Sauunu 1979

Gɔné valé é na lé we

¹ Wenu lé ka wo laa an lee sɛbɛ gi, wo gi lé ke ’ko: dé mi ’ka le sié lo, ’bɛ a é zima.

² Naa, pɛnpɛnnégyɛzannu a kiɛre; amalé gɔné faa do do ’é le do si ébozen zé na nya ma, yé le faa do do ’é gɔné do si ézé zana nya ma.

³ We lé wa kɛla le lɛ, le zana a kɛlɛ le lɛ ma; yé gɔné na ’é zana zé kɛlɛ ma.

⁴ Lezan kɔlɛ ’ka ébo zé nya lo; a zana zé lé. Yé gɔnézan kɔlɛ ’ka ébo zé nya lo; a na zé lé.

⁵ Dé ka dére kɛlɛ do yé ka kini ékema bléyi ke nya bazorole nya, ’bɛ do; dé ’bɛ kaan lo, té gɔné valé é na é kini ékema lo ma. ’Bɛ zuo, ’ka zén ékeva, dé ’bɛ kaan lo, dé ka ’ka bɔa kabo kunle lɛ lo, dé Satan é da ka sɛrɛ ka ke gi.

⁶ Maa we ’ko fé zi nɔle ka lɛ we ma; maa ’ka ka béli dɔna lo.

⁷ É sɔ an lɛ léé, mi faa lé we é kɛlɛ bélé anzé zo. Naa, Kazambale éé blɛ do do kɛla mi faa do do lɛ.

⁸ Gɔnénu lé wo ’ka tan le si lɛ lo koo, blɛnnu lé wo ’ka tan bo si lɛ lo koo, gyɛzaralomu koo, maa lé wo lɛ léé, dé wo vo bélé maa zo, ’bɛ a é zima.

⁹ Naa, dé wo ’ka bɔa wobo kunle lɛ lo, ’wo le si ma; ’wo bo si ma. Lesile valé bosile fila vɔ é mini gale le lɔrɔ nya valé gɔné lɔrɔ nya ta.

¹⁰ Wo lé wo ’wo ke si, maa ’bɛnu béli dɔ, naa, maa kaan lo, Mizan lé, té le é si é zana va lo.

¹¹ Dé é kɛlɛ léé, lezan si é zana va, ’é da a va é ziin ma. Dé ’bɛ kaan lo, té é bo bɛ si lo. Yé té gɔné é na bɔra monomono lo.

¹² Anzé dére lé ke ’ko, Mizan zé kaan lo. Maa lé mi pɔnénu lɛ léé, dé Krétiɛn do na a, dé é ’ka Krétiɛn nya lo, dé é a nyi si léé, é vo é zana va, té a zana é sɔn vɔ a ma lo.

¹³ Yé dé Krétiɛn le do zana a, dé é ’ka Krétiɛn nya lo, dé é a nyi si léé, é na é vo é va, té lezan é sɔn vɔ é zana ma lo.

¹⁴ Naa, le zana lé é ’ka Krétiɛn nya lo, Bale éé yuɛ paan a va a na lé we ma, yé gɔnézan na lé é ’ka Krétiɛn nya lo, Bale éé yuɛ paan a va a zana lé we ma. Dé ’bɛ kaan lo, ’té kalé nénu a bélé yolémunu lé nénu zo; naa, sin Bale éé yuɛ paan kalé nénu va.

¹⁵ Naa, dé é a le zana nyaoo, dé é a gɔné na nyaoo, dé é ’ka Krétiɛn nya lo, dé é sɔ a lɛ léé, ’wo kini ékema, ’wo kini ékema ma. Dé wolé we a ’bɛ zo, wo vole ékeva ’ka glawe nya lo. Kazambale ko laa léé, ko vo ékeva drɔɔ.

¹⁶ Gɔnézan na, ’i bɔn‐in bɔrɔ do. Dé i dan i zana si lɛ we gii? Lezan zana, ’i bɔn‐in bɔrɔ do. Dé i dan i na si lɛ we gii?

Mizan mi bɔra bɛan zo, ’é vo ’bɛ zo

¹⁷ Naa, duowo, Mizan ka bɔra bɛan gi, é ka laa ’té ka dɔbɛ a fɛan zo bɛ, ka faa do do ’é vo yee bɛ duo gi ma. ’Ko zo lé maa léglizinu gimunu faa béli dɔ.

¹⁸ Dé Bale biian i laa, ’té i gane a é dɔle, ’i vo ’bɛ zo. Dé Bale biian i laa, ’té i gane ’ka é dɔle lo, té wo i gane dɔ lo.

¹⁹ Dé wo mi gane dɔoo, dé wo ’ka a gane dɔ lɛ looo, ’bɛ ’ka we do nya lo; Kazambale lé bélidɔwe kɛlɛle ɛ ke we blɛn nya.

²⁰ Wo ka laa ’té ka a bɛan gi, ka faa ’é vo ’bɛ bɛ gi.

²¹ Bale i laa bléyian va, ’té i a luu nyaa? Té ’bɛ é ’na i ma lo ma. Naa, dé i bɔa lɛ yé i vo iboma, ’bɛ fila vɔ.

²² Naa, mian Mizan a laa, ’té é a luu nya, é a Mizan lé miné nya. A zo duo lé, miné lé Mizan a laa, é a Krist lé luu nya.

²³ Wo ka lɔ fɛwezan nya. Té ka kɛlɛ munu lé luu nya lo.

²⁴ Bwenu, Bale ka laa, ’té ka a bɛan gi, ka faa ’é vo Bale ’lɛ ’bɛ bɛ gi ma.

Blɛnzan — bian — séba — wolé we

²⁵ Mizan ’ka an béli dɔ lɛ blɛnnu lé we ma lo; naa, Mizan nyanai zén an ta an kɛlɛle yarapawelazan nya we gi; bɛwemalé an we ’ko plaan ka lɛ.

²⁶ Bléyi tɔntɔn bɔ, bɛwemalé é dɔ an gi léé, é a é zima léé, mi ’é vo é dɔbɛ gi.

²⁷ I le sii? Té i kwa kuli a bɔrale we ma lo. I ’ka tan le si lɛ loo? Té i kwa kuli léé, i le sié lo.

²⁸ Dé i le si, ’bɛ ’ka wenyané nya lo, yé dé blɛnzan bo si, ’bɛ ’ka wenyané nya lo. Naa, munu ’ko wo dan nyané ble lɛ ’wo kɔlɛ gi, yé maa ’ka a va léé, ’bɛ é kɛlɛ kazé nya lo.

²⁹ Bwenu, we lé maa a fé, yee lé é ke ’ko: bléyi ’ko ’ka vo lɛ grɔgrɔ lo. É sia bléyi ’ko va, munu lé wo na a, ’wo kɛlɛ bélé fɛan zo lé wo na ’ka lo, a zo ma,

³⁰ munu lé wo ke wuvɔna, ’wo kɛlɛ bélé fɛan zo lé wo ’ka wuvɔna lo, a zo ma; munu lé wo gi ke é nanale, ’wo kɛlɛ bélé fɛan zo lé wo gi ’ka é nanale lo, a zo ma; munu lé wo ke fɛ lɔna, ’wo kɛlɛ bélé fɛan zo lé fɛ ’ka wo lee lo, a zo ma.

³¹ Munu lé woo tɔnɔ yé tɛrɛ ’ko la, ’wo kɛlɛ bélé fɛan zo lé wo ’ka a yé lo, a zo ma. Tɛrɛ ’ko la we éé giéan, amalé maa we ’konu fe ka lɛ.

³² Naa, é sɔ an lɛ léé, té ka gi bɔrɔ pa lo. Mian é ’ka le si lɛ lo, éé Mizan lé wenu gi bɔrɔ paan, Mizan lé sɔlɛwe kɛlɛle we gi.

³³ Naa, mian é le si, éé tɛrɛlawenu gi bɔrɔ paan, é na lé sɔlɛwe kɛlɛle we ma. A bli a fié.

³⁴ A zo duo lé é ke blɛnnu valé lomu lé wo zana ’ka lo, wozé nya. Lean é ’ka bo si lɛ lo, éé Mizan lé wenu ɛ gi bɔrɔ paan, a kɛlɛle sauun é kɔlɛ valé é léli nya we gi. Lean é bo si, éé tɛrɛlawenu gi bɔrɔ paan, a zana lé sɔlɛwe kɛlɛle we ma.

³⁵ Maa we ’ko fé wezin kɛlɛle ka lɛ we gi. Maa ’ka a va léé, maa ka vɔ san ’léé lo, naa, maa a fé kalé a tɔnɔ yele we ma, kalé yara pale Mizan bɔle ta ka bli faa nya we gi.

³⁶ Dé blɛn‐an alé bo si bléyi bɔ, yé é dɔ a ti gi léé, lezan vole blɛn nya ’ka é zima lo, wean é sɔ a lɛ, ’é a kɛlɛ ma. É ’ka wenyané nya lo; ’é lu no bo lɛ ma.

³⁷ Naa, dé é dɔ mian bli gi léé, ’é lu vole blɛn nya fila vɔ, dé é ’ka glawe nya lo, dé é a yeebozen lé blibɔmawe nya, ’té ’bɛzan wezin kɛlɛ.

³⁸ ’Ko zo lé mian é lu nɔ bo lɛ é wezin kɛlɛ, yé mian é ’ka é lu nɔ lɛ bo lɛ lo, ’bɛzan zé fila vɔ.

³⁹ Lezan a é zana na nya é zana yuɛma bléyi faa va, naa, dé a zana ga, a se a a lɛ léé, dé boan é sɔ a lɛ, ’é a si; naa, ’é kɛlɛ Mizan lé mi nya ma.

⁴⁰ Naa, é dɔ an gi léé, dé é vo é dɔbɛ gi, ’bɛ é dan a gi nana lɛ é baba. Yé é dɔ an gi é ziin léé, Kazambale Léli a an gi.