1 Korent munu 6 - Kazambale lé Sebe Sauunu 1979

Krétiɛnnu lé weblebɛ

¹ Dé we a ka va mi do valé é bɔluzan méléna ’naan, é kɛlɛ kaa yé ka go ’bɛ nya yolémunu vaa? Mɛmalé ka ’ka goo kalé we nya Bale lé munu va loo?

² Ka ’ka a gi dɔɔa léé, Bale lé munu é dan tɛrɛlamunu lé we ble lɛ loo? Yé dé ka ɛ dan munu lé we ble lɛ, ’té kalé we kiénénu blele yara kaan loo?

³ Ka ’ka a gi dɔɔa léé, kaa ɛ dan lanjenu lé we ble lɛ loo? Dé é a ’bɛ zo, mɛwemalé kaa ’ka tɛrɛ ’ko la wenu blé loo?

⁴ Yé dé tɛrɛ ’ko la wenu a ka méléna, munu lé wolé we ’ka blɛn léglizigimunu yuɛ gi lo, mɛmalé ka ’bɛnu dɔ weblezannu nyaa?

⁵ Maa we ’ko fe ka lɛ ka gyɛle yara nya we gi. Wedɔɔzan do kpen ’ka ka méléna, ’té ’bɛ éé bɔa é bwenu méléna we blele lɛ loo?

⁶ É kɛlɛ kaa yé bwe do éé bwe do tɔ fé, munu lé wo bli ka é pale lo, wo vaa?

⁷ Weblele ka ke va ’ko zo, ’bɛ a nagɔɔn‐an léé, gun a ka ma. Ka tablele fila ’ka vɔ lɛ loo? Ka ’wuo dɔle weple wuo fila ’ka vɔ lɛ loo?

⁸ Naa, kanu ɛ ke weple kɛlɛna, kanu ɛ ke mi tablena, yé ka bwenu lɛ lé ka ke a kɛlɛna.

⁹ Ka ’ka a gi dɔɔa léé, mi plenu ’ka dan tɔnɔ ble lɛ Kazambale lé fuatɛrɛ la lo loo? Té ka saan we ’ko gi lo. Pɛnpɛnnégyɛzannu koo, miyilibɔzannu koo, le bɛ valé gɔné bɛ ginizannu koo, wizowe kɛlɛmunu koo, wevɔnle kɛlɛmunu koo,

¹⁰ kyeenwozannu koo, blibɔgɔɔlimazannu koo, nwɛgyɛzannu koo, mi sɔnɔzannu koo, mi tablezannu koo, wo ’ka dan tɔnɔ ble lɛ Kazambale lé fuatɛrɛ la lo.

¹¹ A nya lé ka va mi kenu ke é vinin. Naa, sin ka a é zurule; ka a sauun, ka kɛlɛ tegele Mizan Jézu Krist tɔ gi, é valé kaalé Bale Léli nya.

É a lé Krétiɛnnu é Kazambale tɔ bɔ wo kɔlɛ nya

¹² Mi kenu léé: A se a an lɛ léé, an we faa kɛlɛ. ’Bɛ a webozen nya, naa, we faa ma tɔnɔ ’ka lo. An bɔa a fele lɛ léé: A se a an lɛ léé, an we faa kɛlɛ. ’Bɛ a webozen nya, naa, maa ’ka a nyi sié léé, maa kɛlɛ fɛ do kpen lé luu nya lo.

¹³ Fɛblelenu a mi bɔn zé nya, yé mi bɔn a fɛblelenu zé nya. Webozen lé; naa, Kazambale é dan wo fiénu lé we nyaa lɛ. Naa, wo ’ka mi kɔlɛ kɛlɛ lɛ pɛnpɛnnégyɛle we gi lo. Naa, wa kɛlɛ Mizan zé nya, yé Mizan a kɔlɛ zé nya.

¹⁴ Yé Kazambale lé é Mizan nwa gale va, é dan kaa nwa lɛ é ziin élé plɛplɛ nya.

¹⁵ Ka ’ka a gi dɔɔa léé, ka kɔlɛnu a Krist kɔlɛvafɛnu nya loo? Maa Krist kɔlɛvafɛnu sié ’té maa wo kɛla bɔrɔdɛ le kɔlɛvafɛnu nyaa? Pelo!

¹⁶ Ka ’ka a gi dɔɔa léé, dé mian go bɔrɔdɛ le va wo fiénu a kɔlɛ do nya loo? É a é gyɛle Kazambale lé sɛbɛ gi léé: Wo fiénu é dan kinin lɛ mi do nya.

¹⁷ Naa, dé mian wo kɛlɛ do Mizan nya, wo fiénu a léli do nya.

¹⁸ ’Ka so pɛnpɛnnégyɛle lee vlan nya. Wenyané bɛnu lé mi éé ’bɛnu kɛla, ’bɛ ’ka mi kɔlɛ gi lo, naa, mian é ébo no pɛnpɛnnégyɛle lɛ, ’té ’bɛzan ɛ wenyané kɛla ébozen kɔlɛ ma.

¹⁹ Ka ’ka a gi dɔɔa léé, Léli Sauun lé ke ka gi, ’té Bale a nɔ ka lɛ bɛ, ka kɔlɛ a alé kɔn nya loo? Yé ka ’ka a gi dɔɔa léé, ka ’ka kabozen zé nya lo loo?

²⁰ Wo ka lɔ fɛwezan blɛn nya. Bɛwemalé ’ka Kazambale tɔ bɔ ka kɔlɛ valé ka léli nya.