1 Korent munu 5 - Kazambale lé Sebe Sauunu 1979

Pɛnpɛnnégyɛzan lé we blele lé

¹ Maa a ’ma gɔnɔ kiɛre nya léé, pɛnpɛnnégyɛle a ka méléna. Pɛnpɛnnégyɛle ’ko a lɛrɛlɛrɛ é mini yolémunu zé ta; yee lé ke léé, ka va mi do é yaati na si.

² ’Té ka blii boblɛn nyaa? We ’ko a wuvɔwe nya. Mian é ’bɛ zoɛ we kɛlɛ, é a kɔɔn léé, ’ka ’bɛzan si ka méléna.

³ Dé é a maa nya, an léli a ka va mi, dɔlé ’té an ’ka ana mi lo. Mian ’bɛ zo we kɛlɛ, maa ’bɛzan lé we ble é kwakwa, bélé fɛan zo lé maa ana mi, a zo.

⁴ Ka valé an léli zén ékeva Mizan Jézu tɔ nya, ’té Kaazan Jézu lé plɛplɛ a kaa ta;

⁵ mian é ’bɛ zo we kɛlɛ, é a lé ’wo ’bɛzan nɔ Satan lɛ, a kɔlɛ sɛrɛle we gi, a léli sile we gi we ma Mizan Jézu dayi nya.

⁶ Kabo tɔ bɔle ’ka é zima lo. Ka ’ka a gi dɔɔa léé, lévɛn kiéné éé buruyɔɔ faa nwaan loo?

⁷ ’Ka lévɛn kwa bɔra ka bli gi, ka kɛlɛle buruyɔɔ dɛrɛ pla nya we gi. Naa, wo kaa taboblané gyɛ é kyɛn, yee lé ke Krist nya, amalé webozen nya, lévɛn ’ka ka gi lo.

⁸ Bɛwemalé kaa fɛti kɛlɛ ma. Té kaa a kɛlɛ lévɛn kwa nya lo, té kaa a kɛlɛ miblifliwe valé we lɛrɛlɛrɛ lé wo ke bélé lévɛn zo, wo nya lo, naa, kaa a kɛlɛ burunu lé, lévɛn ’ka wo va lo, wo nya, yee lé ke we tegele valé webozen nya.

⁹ Maa a fe ka lɛ anlé sɛbɛ vininzan gi léé, té ka mane pɛnpɛnnégyɛzannu ma lo.

¹⁰ Maa ’ka a fe lɛ ka lɛ léé, té ka mane tɛrɛ la ’ko pɛnpɛnnégyɛzannu koo, blibɔgɔɔlimazannu koo, mi tablezannu koo, miyilibɔzannu koo, wo ma lo lo. Dé é a kɔɔn ’bɛ zo, ’té é a lé ka si tɛrɛ la.

¹¹ Sin, wean maa a gyɛ ka lɛ sɛbɛ gi, yee lé ke ’ko: dé mi do léé, ’é a Krétiɛn nya, dé é ébo kɛlɛ pɛnpɛnnégyɛzan nyaoo, dé é ébo kɛlɛ blibɔgɔɔlimazan nyaoo, dé é ébo kɛlɛ miyilibɔzan nyaoo, dé é ébo kɛlɛ mi sɔnɔzan nyaoo, dé é ébo kɛlɛ nwɛgyɛzan nyaoo, dé é ébo kɛlɛ mi tablezan nyaoo, té ka mane ’bɛzan ma lo; té ka fɛ ble a va lo.

^12-13 Munu lé wo ’ka léglizi gi lo, anlé we lé ke wolé we blele nyaa? Kazambale ɛ ke ’bɛnu lé weblezan nya. Ka a léglizigimunu lé weblezannu nya. ’Ka mi lɛrɛlɛrɛ ’ko si ka méléna.