1 Korent munu 4 - Kazambale lé Sebe Sauunu 1979

Nwunvɔzannu lé nyanama

¹ Munu ’é ko ye Krist wuozannu valé a bɛgizannu lé wo ke Kazambale lé weyɔɔlenu gi bɔrazannu nya, wo nya ma.

² We lé é sɔ mi lɛ léé, é bɛgizan a kɛlɛ, yee lé ke léé, ’é yara pa we la.

³ Maa ’ko, dé é a ka nyaoo, dé é a weblezannu nyaoo, dé ka anlé we ble, ’bɛ ’ka we do nya lo. Maa ’ka anbo lé weblezan nya lo;

⁴ naa, maa ’ka we do yé an saanwe nya an bli gi lo. Bɛwemalé maa a tegelee? Gba! Mizan ɛ anlé we blé.

⁵ Amalé maa léé, té ka we do kpen ble a blebléyi ’lɛ lo, fɔɔ yé Mizan ’é da. Wenu lé é ke é yɔɔle gunutinu va, yee ɛ dan wo bɔra lɛ san va. Yee ɛ dan mi bɔngiwenu bɔra lɛ munu yuɛ va. Yé munu lé wo tɔ zin fe yara lé, Kazambale é dan wo tɔ zin fe lɛ.

⁶ Bwenu, kalé we ma lé maa we ’konu dan maa valé Apolɔs ma, we paale ka gi we ma léé, té ka gié we lé wa gyɛ sɛbɛ gi, a ta lo; té ka kabo kɛlɛ blɛn mi do tɔ gi lo, ’té ka sɔn vɔa mi do ma lo.

⁷ De ɛ i kɛlɛ é yɛrama mi pɔnénu vaa? Mɛ fɛ lé bé ye iboaan? Yé dé mi bɛ a nɔ i lɛ, mɛmalé ibo ze vɔa, bélé fɛan zo lé bé ye iboan, a zoo?

⁸ Ka kan tɛkɛɛ? Ka fua ble tɛkɛɛ? Ko ’ka ka va lo yé ka plale sia munu nwiin? Eɛ, ’ka pla munu nwiin webozen nya ma, ko é ziin, ko plale munu nwiin ka va we gi.

⁹ É dɔ an gi léé, ko lé ko ke nwunvɔzannu nya, Kazambale ko kɛlɛ mi voélazannu nya bélé munu lé wo dan wo gyɛ lɛ, wo zo. Ko kɛlɛ zanagyɛmafɛ nya fɛyuɛmalenu faa yuɛ va, ’bɛ gi léé, lanjenu valé munu yuɛ va.

¹⁰ Krist lé we ma lé ko a ’tugyɛzannu nya, naa, ka a wedɔɔzannu nya Krist gi. Ko a tɔɔtɔɔ, yé ka a plɛplɛ. Ka a lɛamazannu nya, yé ko a mi boanu nya.

¹¹ Fɔɔ bléyi ’ko va, ko vo nyané blena lɔrɔ koo, ’yiminilɔrɔ koo, porole koo, wolé we ma, ’té wo ko blaan, ’té ko nyanana tegele ’ka lo;

¹² ’té ko wɔlɛgi éé nyaan ko ma nyanama pale nya ko bɛ nya. Woo ko sɔnɔan, ’té ko wo drɔɔ voo; woo nyané paan ko ta, ’té ko ’wuo dɔa ’bɛ wuo;

¹³ woo ko tɔ sɛra, ’té ko wo tɔrɔ paan. Ko kɛla bélé tɛrɛ la fɛtiridɔlenu zo, bélé bli zo mi faa yuɛ va fɔɔ kyɔ.

¹⁴ Maa ’ka we ’konu gyɛna ka lɛ yara nwɛnnwɛnné nya lo; ka a anlé blibɔmanénu nya, amalé maa we plaan ka lɛ.

¹⁵ Munu lé woo we paan ka gi, dé wo kɛlɛ mi baa soru nyaoo, ka ti a do kpen duowo. Maa ɛ ka yaa Krist gi Wenéné fele nya.

¹⁶ Bɛwemalé, an zanté vɔ ka lɛ léé, ’ka kɛlɛ an zuosonazannu nya ma.

¹⁷ Bɛwemalé maa Timoté nwunvɔ ka lɛ, yee ɛ ke anlé blibɔmané nya; é a yarapawelazan nya Mizan gi; anlé Krist gi tawobɛ lé maa paan munu gi léglizinu faa gi, é dan a sele dɔ lɛ ka gi.

¹⁸ Mi kenu wobo kɛlɛ blɛn, bélé fɛan zo lé maa ’ka dan go lɛ ka va lo, a zo.

¹⁹ Naa, dé é sɔ Mizan lɛ, an dan go lɛ ka va lao bɛ, yé maa ’ka dan boblɛnzannu dérenu ’ma lɛ lo; wolé plɛplɛ lé maa dan a nagini lɛ.

²⁰ Naa, Kazambale plale mi nwiin ’ka mi ’léé dére nya lo; é a plɛplɛ nya.

²¹ Mɛ fɛ ɛ sɔ ka lɛɛ? ’An go ka va plén nya laa, taa, ’an go ka va lɔrɔpale valé bli drɔɔ nyaa?