1 Korent munu 3 - Kazambale lé Sebe Sauunu 1979

Kaanu valé Kazambale éé nyanama paan ékeva

¹ Bwenu, maa ’ka bɔa wefele lɛ ka lɛ bélé fɛan zo lé ka a lélimunu nya, a zo lo. Maa we fé ka lɛ bélé fɛan zo lé ka a tan ka dɔbɛ kyɛn gi, a zo, bélé fɛan zo lé ka a né kiénénu nya Krist gi, a zo.

² Maa dirinyɔyi nɔ ka lɛ. Maa ’ka fɛblele plɛplɛ nɔ lɛ ka lɛ lo. Ka ’ka bɔ lɛ fɛ plɛplɛ blele lɛ lo, amalé maa ’ka a nɔ lɛ ka lɛ lo. Yé bléyi ’ko va é ziin, ka ’ka bɔa a blele lɛ lo; ka a tan ka dɔbɛ kyɛn gi, azama.

³ Dé maawole valé zavɔlenu a tan ka méléna, ’té ka ’ka ka dɔbɛ kyɛn gi loo? Yé té ka ’ka tawona munu lé tawobɛ yɛrama loo?

⁴ Dé mi do a fé léé, ’é a Pɔl va, yé a do léé, ’é a Apolɔs va, ’té ka ’ka ka dɔbɛ kyɛn gi loo?

⁵ Maa a laa ka lee. Apolɔs a mɛ fɛ nyaa? Yé Pɔl a mɛ fɛ nyaa? Ko a Kazambale wuomunu nya; kolé we ma lé ka bli vo Jézu lɛ. Nyanama lé Mizan a nɔ ko lɛ do do, ko pa.

⁶ Maa fɛ vɔ, Apolɔs ’yi zén a ta, naa, Kazambale a tin.

⁷ Amalé mi lé é a vɔ, é valé mi lé é ’yi zén a ta, wolé we ’ka blɛn lo, naa, Kazambale lé éé fɛ tin‐é, yee ɛ lé we ke blɛn.

⁸ Mian éé fɛ vɔa koo, mian éé ’yi zén‐é a ta koo, wolé we a do, yé wo dan wo fiénu banwo lɛ wo panyanama yɛrama.

⁹ Naa, konu valé Kazambale éé nyanama paan ékeva. Ka a Kazambale lé féi nya; ka a Kazambale lé kɔn nya.

¹⁰ Kazambale lé zin lé é a kɛlɛ an lɛ, a nya lé maa kɔngane vɔ bélé kɔn ninikinizan lé é we dɔɔ, a zo; ’té mi bɛ éé kɔn dɔa a ta. Ka faa do do, ’ka yuɛ pa kabozen va a dɔle a ta lé we ma.

¹¹ Naa, kɔngane lé wa vɔ, é a Jézu Krist nya. Mi do ’ka bɔa a bɛ vɔle lɛ lo.

¹² Dé mian é kɔn dɔ kɔngane ’ko ta, kyan koo, gɔɔlifu koo, gɔlɛwezannu koo, yili koo, lugale koo, lɔɔ koo, wo nya, Bale é dan munu faa do do lé nyanama gɔɔn lɛ munu yuɛ va.

¹³ Wo dan nyanamanu nagini lɛ kyɛ nya; munu faa do do lé nyanama a fɛan zo, kyɛ é dan a gi dan lɛ. Bɛwemalé webleyi nya munu lé nyanama gi é dan bɔra lɛ.

¹⁴ Mian é kɔn dɔ kɔngane ’ko ta, yé é vo ana, a dɔzan é dan é gooli ye lɛ.

¹⁵ Dé mian lé nyanama kyɛ ble, ’té a ban san a lee, naa, ’bɛzan é dan si lɛ we gi bélé sole kyɛ lee zo.

¹⁶ Ka ’ka a gi dɔɔa léé, ka a Kazambale kɔn nya loo? Yé Kazambale Léli éé nyanaan ka gi loo?

¹⁷ Dé mian é Kazambale kɔn guru zana a gi, Kazambale é dan ’bɛzan guru zana lɛ a gi. Kazambale kɔn a sauun, a nya lé ka ke.

¹⁸ Té mi do kpen é dabli kɛlɛ ébozen lɛ lo ma. Dé é dɔ ka va mi do gi léé, ’é kɛla tɛrɛ ’ko la wedɔɔzan nya, ’é kɛlɛ ’tugyɛzan nya ma, a kɛlɛle wedɔɔzan nya we gi.

¹⁹ Naa, tɛrɛ ’ko la wedɔɔle a Kazambale yuɛ gi ’tugyɛwe nya. É ziin, é a é gyɛle Kazambale lé sɛbɛ gi léé: É wedɔɔzannu kunwo wolé gikinile gi,

²⁰ Yé é ziin: Mizambale wedɔɔmunu lé ’wuogibɔrɔlenu dɔɔ, É a gi dɔɔ léé, wo tɔnɔ ’ka lo.

²¹ Bɛwemalé, té mi do kpen ébo ze vɔ mi gi lo. Naa, fɛ faa a kazé nya;

²² dé é a Pɔl nyaoo, dé é a Apolɔs nyaoo, dé é a Séfa nyaoo, dé é a tɛrɛ nyaoo, dé é a vole é yuɛma nyaoo, dé é a gale nyaoo, dé é a laofɛnu nyaoo, dé é a fɛnu lé wo dan bɔra lɛ bɛ, wo nyaoo,

²³ wo faa a kazé nya, naa, ka a Krist zé nya yé Krist a Kazambale zé nya.