1 Korent munu 2 - Kazambale lé Sebe Sauunu 1979

Krist gyɛle yiliblan ta wefele

¹ An bwenu, dé é a maa nya, dé an go ka va Kazambale lé weyɔɔle fe lɛ ka lɛ, maa ’ka a fe lɛ dére zinnu valé wedɔɔdérenu nya lo.

² Naa, é a an gi é zima léé, bléyian va lé maa ke ka va, Jézu Krist lé wa gyɛ yiliblan ta, maa yee do kpen ɛ dɔɔ, maa ’ka we bɛ dɔɔa lo.

³ Maabozen, dé maa a ka va, maa a tɔɔtɔɔ, ’té an kanaan, ’té gligli éé zén‐é an gi é baba.

⁴ Maa ’ka we paa lɛ ka gi yé an Bale dére fe ka lɛ blami lé wedɔɔdére nya lo, naa, maa ka bɔn‐in kini Léli Sauun lé plɛplɛ nagɔɔnle nya,

⁵ léé, té ka bli é vo munu lé wedɔɔle lɛ lo, naa, ka bli é vo Kazambale lé plɛplɛ ɛ lɛ.

Kazambale Léli lé we nagɔɔnle

⁶ Naa, duowo, ko wedɔɔdére fé munu lé wo bɔ baa Bale lé we gi, wo lɛ. É ’ka bléyi ’ko va wedɔɔle nya lo, yé bléyi ’ko va minwiinzannu lé, wolé we é dan nyaa lɛ lao bɛ, é ’ka wolé wedɔɔle nya lo.

⁷ Kazambale lé wedɔɔle lé ke givuruwe yɔɔle nya, ’té Kazambale a ma’lɛrɛ tɛrɛ bɔrale ’lɛ, ko tɔbɔle we ma, yee lé ko fé.

⁸ Tɛrɛ la ’ko minwiinzannu ’ka wedɔɔle ’ko gi ’ma lɛ lo. Dé é vo léé, wa gi ’ma kɔɔn, ’té wo ’ka Fuasanzan gya yiliblan ta lo.

⁹ ’Ko zo lé é a é gyɛle Bale lé sɛbɛ gi: Fɛnu lé mi ’ka tan a ye lɛ é yuɛ nya lo, Wenu lé mi ’ka tan a ’ma lɛ é tɔné gi lo, É valé wenu lé mi ’ka tan boenwo é bɔn‐in bɔrɔ lɛ a ma lo, Woo lé Kazambale wo ma’lɛrɛ, munu lé Kazambale sɔ wo lɛ, wozé nya.

¹⁰ Naa, Kazambale kaa bɔn‐in kini é Léli nya, yé kaa a dɔɔ. Kazambale Léli éé we faa gi maan. Dé é a Kazambale lé wewɔlɛ ma nyaoo, éé a gi maan.

¹¹ Dé é ’ka mibozen léli lé é ke ’é gi, a nya lo, munu va mi kyɛn ɛ mi giwe dɔɔ? A zo duo lé mi do kpen ’ka Kazambale giwe gi maan lo, ’té dé é ’ka Kazambale bozen Léli nya lo.

¹² Dé é a kaa nya, léli lé kaa a ye, é ’ka tɛrɛlamunu léli nya lo, naa, léli lé éé sié Kazambale va, yee lé kaa a ye, wenu lé Kazambale a nɔ kaa lɛ élé zin lé we ma, wo dɔɔle we ma.

¹³ Ko ’ka a fé tɛrɛlamunu lé wedɔɔdérenu nya lo; naa, dérenu lé Kazambale Léli a paan ko gi, wo nya lé ko fé, ’té ko léliwenu gi fé lélimunu lɛ.

¹⁴ Naa, blami pla ’ka Kazambale Léli lé wenu gi maan lo, wa a yuɛ gi tavowe nya. Mi éé wo gi maan Bale Léli nya, amalé blami pla ’ka wo gi maan lo.

¹⁵ Naa, lélimi zé a é yɛrama; éé we faa gi bɔié é bɔina, dɔlé té mi do kpen ’ka léli mi lé we gi bɔina dɔɔa lo.

¹⁶ Weboen lé Kazambale lé sɛbɛ a fe léé: De ɛ Mizan lé gibɔrɔle dɔɔ We paale a gi we maa? Naa, Krist valé kaanu lé ’wuogibɔrɔ?-?bɛ a do.