1 Korent munu 16 - Kazambale lé Sebe Sauunu 1979

Gɔɔli nɔle Kazambale lé munu lɛ

¹ Gɔɔli lé wa nɔna Kazambale lé munu zé nya bɛ, ka é ziin, é a lé ka a kɛlɛ dére lé maa a fe Galasi tɛrɛ la léglizigimunu lɛ, a yɛrama.

² Dimansi nya ka faa do do kalé gɔɔli ke pa é yɛrama kalé kɔn gi kalé fɛyebɛ yɛrama. Té wo an dale lɛbɛn a nɔle we ma lo.

³ Yé dé an da ka va, munu lé é sɔ ka lɛ léé, wo go gɔɔli nya Jérusalɛm, maa dan wo pa lɛ zia sɛbɛnu nya wo lee.

⁴ Dé é a é zima léé, maabozen é go ana, ko dan go lɛ wo nya.

Pɔl gona fele

⁵ Maa dan gié lɛ Masédɔane tɛrɛ la. Dé maa a kini faa, maa dan go lɛ ka va.

⁶ Dé an dan mɔn lɛ ka vaa? Dé an dan dunubléyi kɛlɛ lɛ ka vaa? Yé fɛana lé an dan go lɛ ’bɛ zuo, yé ka bɔ an va gole ’bɛna we gi.

⁷ Go lé maa dan a wo lɛ bɛ, é ’ka sɔ lɛ an lɛ léé, maa ka ye saawo yé an gié lo; naa, an bli a a lɛ léé, an nyana ka va sɛ, ’té dé é sɔ Mizan lɛ.

^8-9 Naa, duowo, maa dan vo lɛ Éfɛz fɔɔ yé Pantekot yi é bɔ. Zi a an lɛ fɛfaana anlé nyanama pale we ma, naa, mi kiɛre zi dɔ an lee.

¹⁰ Timoté a Mizan lé nyanama pana bélé maa zo; bɛwemalé dé é da ka va, ’ka a kun é zima; té kana é zén a gi lo ma.

¹¹ Té mi do kpen é yuɛ vɔ a zi lo. ’Ka a dɔ zia drɔɔ, a dale an va we ma, naa, maa valé bwenu a a lɛbɛnna.

¹² Dé é a bwe Apolɔs lé we nya, maa we pla a lɛ gɔnɔ kiɛre nya léé, yee valé bwenu ’é go ka va, naa, a gole bléyi ’ko va ’ka sɔ lɛ a lɛ tan lo. Dé é zi ye é dan go lɛ ana.

We nyaana valé weale

¹³ Té ka vo yi bla lo. ’Ka dɔ gligli Kazambale lé we gi. ’Ka kɛlɛ gɔné nya. ’Ka dɔ plɛplɛ.

¹⁴ We faa lé ka a kɛla, ’ka kɛlɛ sɔlɛle nya ma.

¹⁵ Mi vininzannu lé wo wɔra Bale lé we gi Akai tɛrɛ la, Sééfanas valé é bɛmamunu lé; yé wo wobo nɔ Kazambale lé munu mawe kɛlɛle lɛ. Bwenu, maa we plaan ka lɛ é ziin,

¹⁶ ’ka ’bɛ zo munu lɛdɔma, é valé munu faa lé wo ke nyanama duo pana, wo nya.

¹⁷ Sééfanas koo, Fɔɔtunatus koo, Akaikus koo, wo dale an va an gi nanaan. Wo an mawenu kɛlɛ ka pa gi.

¹⁸ Wo an fuu dɔ an ta, yé wo ka fuu dɔ ka ta é ziin. ’Bɛ zoɛ munu we ’é kɛlɛ ka lee ma.

¹⁹ Léglizigimunu lé wo ke Azi tɛrɛ la, wo we ka va. Akila koo, Prisila koo, léglizigimunu lé woo zén‐é ékeva wolé kɔn gi koo, wo we ka va é baba Mizan gi.

²⁰ Bwenu faa we ka va. ’Ka we ka ke va ka bɔn gi fu nya.

²¹ Kalé weale lé maa Pɔl a gyɛ anbozen bɛ nya ’ko.

²² Dé Mizan ’ka sɔa mian lɛ lo, ’wo bale pa ’bɛzan ma ma. Mara?-?na‐ta, ’bɛ gi léé, Mizan, ’i da.

²³ Mizan Jézu ’é ka drɔɔ vo yifaama ma.

²⁴ Ka faa sɔ an lɛ Jézu Krist gi. Amɛɛn.