1 Korent munu 15 - Kazambale lé Sebe Sauunu 1979

Krist nwale

¹ Bwenu, Wenéné ’ko lé maa a fe ka lɛ bɛ, yee lé ka a nyi si, ’té ka a é dɔle a gi gligli,

² ’té ka si we gi a nya bɛ, maa a sele dɔa ka gi. Wenéné lé maa a fe ka lɛ bɛ, ka a kɛlɛna a yɛramaa? Dé ’bɛ kaan lo, ’té kalé blipale a we pla nya.

³ We bɛnu faa ’lɛ, wean wa paa an gi, yee lé maa a paa ka gi, yee lé ke léé: Krist ga kaalé we ma Bale lé sɛbɛ yɛrama;

⁴ wa pa, yé é nwa gale va a yi yaazan nya, Bale lé sɛbɛ yɛrama;

⁵ yé é bɔra Séfa yuɛ va, ’bɛ zuo yé é bɔra mi vu ta fié yuɛ va.

⁶ ’Bɛ zuo yé é bɔra bwenu lé wo ’léé gié mi wuru fié yɔ soru ta, wo yuɛ va bléyi do nya. Wo va mi kiɛre a tan é yuɛma, yé wo va mi kenu ga.

⁷ ’Bɛ zuo yé é bɔra Jak yuɛ va; a zuo yé é bɔra nwunvɔzannu faa yuɛ va.

⁸ É voéla é bɔra an yuɛ va dɔlé ’té maa a bélé né lé wo ’ka a yaa lɛ né yaabɛ tegele nya lo, a zo.

⁹ Naa, maa a nwunvɔzannu va mi kiéné nya; an nyané pa Kazambale lé léglizigimunu ta, amalé a yara ’ka an yara léé, wo an laa nwunvɔzan lo.

¹⁰ Maa ke fɛan nya ’ko, Kazambale lé zin ɛ an kɛlɛ a nya. Yé Kazambale ’ka élé zin sɛrɛ lɛ an ma lo, naa, an nyanama pa é baba, é mini wo faa ta. ’Té é ’ka maabozen nya lo, naa zin lé Kazambale a kɛlɛ an lɛ, yee lé.

¹¹ Naa, dé é a maa nyaoo, dé é a wo nyaoo, we lé ko faa a fe, yee lé é ke bɛ; yé ka bli a yee ɛ lɛ.

¹² Yé dé ko fe léé, Krist nwa gale va, é kɛlɛ kaa yé ka va mi kenu léé, mi ’ka nwaan gale va loo?

¹³ Dé mi ’ka nwaan gale va lo, ’té Krist é ziin, é ’ka nwa lɛ gale va lo.

¹⁴ Yé dé Krist ’ka nwa lɛ gale va lo, ’té kolé alé we fele kɛlɛ we pla nya; ’té ka bli vole a lɛ kɛlɛ we pla nya é ziin,

¹⁵ ’té ko viéwo Kazambale ma é ziin. Naa, ko we fe léé, Kazambale Krist nwa gale va. Dé gamunu ’ka nwaan lo, ’bɛ gi léé, Krist é ziin, é ’ka nwa lɛ gale va lo. Amalé dé ko fe léé, Kazambale a nwa gale va, ’té vié lé ko a wo Kazambale ma.

¹⁶ Dé gamunu ’ka nwaan lo, ’té Krist é ziin é ’ka nwa lɛ gale va lo.

¹⁷ Yé dé Krist ’ka nwa lɛ gale va lo, ’té ka bli vole a lɛ kɛlɛ we pla nya, ’té kalé wenyané a tan ana,

¹⁸ ’té munu lé wo ga Krist gi, ’té wa é sanle é ziin.

¹⁹ Dé tɛrɛ la ’ko saa lé ko bli ke Krist lɛ, ’té ko a nyanai zénlazannu nya é mini munu faa ta.

Gamunu nwale

²⁰ Naa, webozen lé, Krist nwa gale va; é a mi vinin lé é nwa gamunu va, a nya.

²¹ Fɛan zo lé mi do lé we ma lé munu éé gaan, a zo duo lé mi do lé we ma lé munu éé nwaan gale va.

²² Yé fɛan zo lé Adam da ga nya yé mi faa éé gaan, a zo duo lé Krist da bélile nya yé munu faa é dan béli lɛ,

²³ naa, wo faa do do é dan nwa lɛ ’wo nwabléyi va. Krist ɛ ke wo vininzan nya; ’bɛ zuo, Krist dabléyi va, munu lé wo ke azé nya, wo dan nwa lɛ.

²⁴ Plale mi nwiin faa koo, lɛdɔmale faa koo, plɛplɛ faa koo, dé Krist wo sɛrɛ faa, ’té we faa ’wuo pla sin, yé é dan plale mi nwiin faa bɛ vo lɛ é Ti Bale lee.

²⁵ Naa, é a lé é pla mi faa nwiin fɔɔ yé é nyanézannu faa pla é wuo.

²⁶ Mi nyanézan voélazan lé é dan si lɛ ana, ga lé.

²⁷ Kazambale fɛnu faa pla Krist wuo webozen nya, naa, dé wa fe léé, fɛnu faa a é plale Krist wuo, é a wéiin léé, Kazambale lé é fɛnu faa pla Krist wuo, yeebozen ’ka Krist wuo lo.

²⁸ Yé dé fɛ faa a é plale Krist wuo, ’bɛ zuo Kazambale Be bozen é dan pla lɛ Kazambale lé é fɛnu faa pla a wuo, ’bɛ é wuo, Kazambale do kpen kpen vole ana we gi.

²⁹ É ziin, wo mi kenu batizéwo mi galenu tɔ gi. Mɛmalé wa kɛlɛɛ? Dé mi galenu ’ka nwaan monomono lo, mɛmalé wa munu batizéwona wo tɔ gii?

³⁰ Yé ko, mɛmalé ko bli sié kobo lɛ bléyi faa maa?

³¹ Yi faa do do ma, maa a é bɔrale ga lɛ. Bwenu, maa we ’ko fe ka lɛ webozen nya, ka zevɔmawe lé ke an bli gi Kaazan Jézu Krist gi, a we ma.

³² Guli lé maa a dan winu va Éfɛz, dé maa a dan fɛyebli nya an gi bélé munu zé zo, ’té mɛ tɔnɔ lé maa a ye ’bɛ maa? Dé mi galenu ’ka nwaan lo, ’té weboen lé sɛbɛ a fe. É léé: Kaa gaan tɛlɛ, bɛwemalé kaa fɛ ble ma, yé kaa fɛ mini ma.

³³ Té ka gi kɛlɛ kabo lɛ lo. Dé mi vɔ misɛrɛzan zuo, éé a kɛlɛwe sɛra.

³⁴ Té ka vo ka tanyila lo. ’Ka kɛlɛ tegele; té ka wenyané kɛlɛ lo. Mi kenu ’ka Kazambale dɔɔa lo. Maa fe ka lɛ, yaragyɛwe lé.

Mi kɔlɛ tavɔɔle

³⁵ Naa, mi do é dan a fe lɛ léé: Mi galenu éé nwaan kaa? Yé kɔlɛ kaa nya lé woo daan?

³⁶ ’Tugyɛzan, fɛwɔlɛ lé bé vɔa, dé é ’ka zii lɛ yé a gɔn é bɔ yé aboen é sɛrɛ lo, a dɛrɛ ’ka kɛla lo.

³⁷ Yé fɛwɔlɛ lé bé vɔa, é valé a vɔnɔ lé éé bɔraan bɛ, wo ’ka do lo. É a fɛwɔlɛ pla nya, dé ’sawɔlɛ léé, dé fɛ bɛ wɔlɛ léé, a nya;

³⁸ yé kɔlɛ lé é sɔ Kazambale lɛ, yee lé éé a no fɛwɔlɛ faa do do lɛ, wo dɔbɛ yɛrama.

³⁹ Kɔlɛ faa dɔbɛ ’ka do lo, naa, mi zé a é yɛrama, yé wi zé a é yɛrama; miané zé a é yɛrama, yé pɔ zé a é yɛrama.

⁴⁰ Yé lagikɔlɛ a é ziin; yé tɛrɛlakɔlɛ a. Naa, lagikɔlɛ nɔnɔmi a é yɛrama, yé tɛrɛlakɔlɛ zé nɔnɔmi a é yɛrama.

⁴¹ Yiri bile a é yɛrama, yé moné bile a é yɛrama; yé monéné bile a é yɛrama; yé é ziin monéné kenu bile a é yɛrama wo bɔlunu va.

⁴² A zo duo lé gamunu nwale ke. Vɔnfɛ lé wa paan, ’té éé nwaan fɛ lé é ’ka vɔn‐o lo, a nya.

⁴³ Serelebomafɛ lé wa paan, ’té éé nwaan fɛ nɔnɔmi nya. Fɛ tɔɔtɔɔ lé wa paan, ’té éé nwaan fɛ plɛplɛ nya;

⁴⁴ tɛrɛlakɔlɛ lé wa paan, ’té éé nwaan lélikɔlɛ nya. Dé tɛrɛlakɔlɛ a, ’té lagikɔlɛ a é ziin.

⁴⁵ Bɛwemalé é a é gyɛle sɛbɛ gi léé: Mi vininzan Adam a mibozen yuɛmale nya; Adam voélazan a mibéliléli nya.

⁴⁶ Lélimi ’ka bɔra lɛ é vinin lo; tɛrɛlami ɛ bɔra é vinin; lélimi da é voéla.

⁴⁷ Kazambale mi vininzan kɛlɛ tɛrɛ la vun nya. Mi fiézan si la gi.

⁴⁸ Tɛrɛlamunu faa a bélé mi lé wa kɛlɛ vun nya, a zo. Lélimunu a bélé mi lé é si la gi, a zo.

⁴⁹ Yé fɛan zo lé tɛrɛlakɔlɛ a kaa ta, a zo duo lé lagikɔlɛ é dan kɛlɛ lɛ kaa ta é ziin.

⁵⁰ Bwenu, we lé maa a fé, yee lé ke ’ko: mi ’ka bɔa lagi tɔnɔ blele lɛ tɛrɛlakɔlɛ ’ko nya é ta lo; yé vɔnfɛ ’ka bɔa vole lɛ é yuɛma lɛɛfaama lo.

⁵¹ ’Ka tɔné dɔ. An weyɔɔle do fe ka lɛ: kaa faa ’ka dan ga lɛ lo, naa, wo dan kaa faa kɔlɛ tavɔɔ lɛ,

⁵² bléyi do nya, bélé mi yuɛlakɔnɛ gyɛle zo, béli nyaanla fɛnle nya. Dé é we, mi galenu é dan nwa lɛ kɔlɛ lé é ’ka vɔn‐o é dɛrɛ lo, a nya wo ta, yé kaa é ziin, wo dan kaa kɔlɛ tavɔɔ lɛ.

⁵³ É a lé vɔnfɛ é kinin fɛan é ’ka vɔn‐o lo, a nya. Yé é a lé gakɔlɛ é kinin kɔlɛ lé é ’ka gaan é dɛrɛ lo, a nya.

⁵⁴ Dé vɔnkɔlɛ ’ko éé kinin‐é kɔlɛ lé é ’ka vɔn‐o lo, a nya, yé dé gakɔlɛ ’ko éé kinin‐é kɔlɛ lé é ’ka gaan lo, a nya, ’té dére lé wa gyɛ Kazambale lé sɛbɛ gi, a lɛ é dan sɔɔ lɛ. Wo léé: Wo gale kele yé guliwuo vo wo lɛ.

⁵⁵ Oo gale, izé guliwuo a kyɛɛn? Oo gale, i furu a kyɛɛn?

⁵⁶ Gale furu a wenyané nya, yé wenyané lé plɛplɛ éé sié bélidɔwe va.

⁵⁷ Naa, Kazambale lé éé guliwuo no kaa lɛ Kaazan Jézu Krist gi, ’wa bɔ vɔ ma.

⁵⁸ Bɛwemalé, an sɔlɛbwenu, ’ka dɔ plɛplɛ ma; ’ka dɔ gligli ma; ka a gi dɔɔ léé, kalé nyanama ’ka dan vo lɛ é pla Mizan gi lo, bɛwemalé ’ka yara pa Mizan lé nyanama pale ta é zima ma.