1 Korent munu 14 - Kazambale lé Sebe Sauunu 1979

Dére bɛnu vɔle valé balelawefele

¹ ’Ka kwa kuli yé sɔlɛle ’é kɛlɛ ka gi. ’Bɛ zuo ka bli ’é bɔ Kazambale Léli lé blɛnu ma, naa, blɛ bɛnu faa ta loru, ka bli ’é bɔ balelawefe blɛ ma.

² Mian éé we fé dére bɛ gi, é ’ka we fé munu lɛ lo, naa, éé a fé Kazambale ɛ lɛ, yé mi do kpen ’ka a maan lo. Éé weyɔɔlenu fé Léli nya ɛ wo.

³ Naa, mian éé balelawe fé, éé we fé munu lɛ; éé munu dɔa gligli; éé we plaan wo lɛ; éé wo tɔrɔ paan.

⁴ Mian éé we fé dére bɛ gi, abo lé éé a dɔa gligli; naa, mian éé balelawe fé, léglizigimunu lé éé wo dɔa gligli.

⁵ É sɔ an lɛ léé, ka faa é we fe dére bɛnu gi; naa, dé ka balelawe fe, ’bɛ sɔ an lɛ é minini. Balelawefezan lé we a blɛn é mini dére bɛ vɔzan lɛ, ’té dé ’bɛ ’ka danamla kɛla léglizigimunu dɔle gligli we ma lo.

⁶ Bwenu, ka ye, dé an da ka va, yé an we fe ka lɛ dére bɛnu gi, dé ka ’ka a gi maan lo, mɛ tɔnɔ lé ka dan ye lɛ ’bɛ maa? Amalé dé an we fe ka lɛ, é a lé an dére é ka bɔn‐in kini, dé ’bɛ kaan lo, é wedɔɔle nɔ ka lɛ, dé ’bɛ kaan lo, é kɛlɛ balelawefele nya, dé ’bɛ kaan lo, é we paa ka gi, yé ka tɔnɔ ye.

⁷ Fɛnu lé wo ’ka flin‐é lo, dé wo dére é wé, dé é a séén nyaoo, dé é a kɔnɔ nyaoo, dé wo dére ’ka é sile ékema lo, lɛrɛ lé wa vɔna a gi, wo dan a gi ’ma lɛ kaa?

⁸ Yé dé béli vun éé wé é vɔɔle, de ɛ dan ’é ma’lɛrɛ lɛ gulidanle we maa?

⁹ A zo duo lé, dé ka a we fena, dé ka ’ka ka nɛnɛ dɔraan lo, wo dan a gi ’ma lɛ kaa? ’Té ka a we zénna kuo bɔn ma ɛ wo.

¹⁰ Dére gɔnɔ a tɛrɛ la di, naa, dére?-?an mi ’ka ’bɛ maan lo, ’bɛ dére do kpen ’ka lo.

¹¹ Bɛwemalé, dé maa ’ka mi do dére gi maan lo, ’té maa a ’bɛzan yuɛ gi bélé bwiizan zo, yé ’bɛzan a an yuɛ gi bélé bwiizan zo é ziin.

¹² Ka‐an ka bli bɔ Kazambale Léli lé blɛnu ma, ’kabo nɔ wo naginile lɛ, yé ’wo kɛlɛ kiɛre ka méléna léglizigimunu dɔle gligli we ma.

¹³ Bɛwemalé, mian éé we fé dére bɛnu gi, ’é bazoro léé, ’é danamla kɛlɛ.

¹⁴ Dé an bazoro dére bɛ gi, ’té an léli ɛ ke bazorona, naa, anlé wedɔɔle éé voo bélé féi gɔla zo.

¹⁵ Maa dan a kɛlɛ lɛ kaa? Maa dan bazoro lɛ an léli nya; é ziin, maa dan a zoro lɛ anlé wedɔɔle nya. Maa dan lɛrɛ vɔ lɛ an léli nya; é ziin, maa dan a vɔ lɛ anlé wedɔɔle nya.

¹⁶ Dé ’bɛ kaan lo, dé i Kazambale bɔ vɔa i léli nya, mi lé é ’ka tan ézé ye lɛ lo, wean bé fe bɛ, dé é ’ka a gi maan lo, é dan we lɛ amɛɛn, kaa?

¹⁷ Weboen lé, i Kazambale bɔ vɔa é zima, naa, é ’ka i bɔluzan dɔa gligli lo.

¹⁸ Maa Kazambale bɔ vɔa léé, an we fé dére bɛnu gi é mini ka faa ta.

¹⁹ Naa, dé maa a léglizigimunu va, dé an dére soru fe anlé wedɔɔle nya, we paale mi bɛnu gi we ma, ’bɛ sɔ an lɛ é mini dére baa soru fele dére bɛnu gi ta.

²⁰ Bwenu, té ka we va si bélé né kiéné zo lo. Dé é a wenyané kɛlɛna zia nya, ’ka kɛlɛ é tidian bélé né kiéné zo, naa, ’ka we va si bélé yarakinizan zo.

²¹ É a é gyɛle bélidɔwe sɛbɛ gi léé: Mizambale léma: Maa dan we fe lɛ bɛn ’ko lɛ Munu lé wo dére ke é yɛrama, wo dére gi, É valé bɛn bɛnu lɔlu nya, Naa, wo ’ka dan ’wo tɔné dɔ lɛ an lɛ duowo lo.

²² Bɛwemalé wefele dére bɛnu gi ’ka tɔmase nya Krétiɛnnu lɛ lo; munu lé wo ’ka Krétiɛn nya lo, é a tɔmase nya wo ɛ lɛ. A bɛ do la, balelawefele a tɔmase nya Krétiɛnnu lɛ; munu lé wo ’ka Krétiɛn nya lo, é ’ka tɔmase nya ’bɛnu lɛ lo.

²³ Bɛwemalé, dé léglizigimunu faa zén ékeva, dé mi lé é ’ka tan ézé ye lɛ lo, dé ’bɛ léé, ɛɛ, dé mi lé é ’ka Krétiɛn nya lo, dé ’bɛ léé, dé wo wɔra ka va, ’té munu éé we fé dére bɛnu gi, wo ’ka dan a fe lɛ léé, gwe a ka ’wuo gi, loo?

²⁴ Naa, dé mi lé é ’ka tan ézé ye lɛ lo, dé ’bɛ léé, ɛɛ, dé mi lé é ’ka Krétiɛn nya lo, dé ’bɛ léé, dé wo wɔra ka va, ’té ka faa a balelawe fena, balelawefele é dan wo kun lɛ yé wo dan ’wobo ye lɛ wegyɛzannu nya,

²⁵ yé wo bɔngiwe é dan bɔra lɛ. Yé wo dan dia lɛ ’wo bli la yé wo dan Kazambale bɔ lɛ a fele nya léé: Kazambale a ka méléna webozen nya.

Léglizi kɛlɛbɛ

²⁶ Amalé, bwenu, ka dan a kɛlɛ lɛ kaa? Dé ka a léglizi kɛlɛna, é a lé mi faa ’é we kɛlɛ; mi ke ’é lɛrɛ vɔ; mi ke ’é we paa munu gi; we dɛrɛ lé Bale a gɔɔn mi ke lɛ, ’bɛnu ’é ’bɛ fe; mi ke ’é dére bɛnu vɔ; mi ke ’é danamla kɛlɛ; ’ka we faa kɛlɛ munu dɔle gligli we ma.

²⁷ Dé ka va mi kenu we fe dére bɛnu gi, dé mi fié léé, ɛɛ, dé mi yaa léé, ’bɛ a é zima. Té é gié mi yaa ta lo. É a lé wo we fe wo ke zuo ke zuo, yé mi do ’é danamla kɛlɛ ma.

²⁸ Dé danamla ’ka ana lo, ’wo tadɔ léglizi gi; ’wo we fe wobozen valé Kazambale ɛ lɛ ma.

²⁹ Dé é a balelayezannu nya, dé mi fié léé, ɛɛ, dé mi yaa léé, wo ɛ we fe ma, yé mi pɔnénu ’é wo fewe va si.

³⁰ Naa, dé mi bɛan ’bɛ ke é nyanale mi, dé Bale we dɛrɛ gɔɔn ’bɛ lɛ, ’bɛ ézé fe; mi vininzan ’é tadɔ ma.

³¹ Zi a ka faa lɛ léé, ka balelawe fe ka ke zuo ke zuo, we paale munu faa gi we ma; é valé we plale munu faa lɛ we gi.

³² Balelawefezannu a é plale balelawefele nwiin.

³³ Naa, Kazambale ’ka we vɔɔle kɛlɛ Bale nya lo, é a mi vo drɔɔ Bale nya.

³⁴ Dé ka a léglizi kɛlɛna, é a lé lomu é tadɔ, fɛan zo lé wa kɛla Kazambale lé munu lé léglizinu faa gi, a zo. Wo ’ka zi no wo lɛ léé, wo lɔlu ble ana lo; naa, ’wo pla gɔnénu wuo, bélidɔwe a fe fɛan zo bɛ, a zo.

³⁵ Lomu lé lɔlu blele léglizi gi a yaragyɛwe nya; bɛwemalé dé é sɔ lezan lɛ léé, é we do gi ’ma, ’é a laa é zana lee kɔn ’léé ma.

³⁶ Ka va lé Kazambale dére sii? Taa, ka saa va lé é bɔɔ?

³⁷ Dé é a mian gi léé, é a balelayezan nyaoo, dé é a a gi léé, léli ɛ ke we kɛlɛna é nyaoo, ’bɛzan ’é we ’ko ’ma ma: wean maa a gyɛ ka lɛ bɛ, é a Mizambale lé bélidɔwe nya.

³⁸ Naa, dé mian é ’ka a yé ’bɛ nya lo, ’bɛzan ’é nyana ma.

³⁹ Bɛwemalé, bwenu, ka bli ’é bɔ balelawe fele ma, yé té ka wefele dére bɛnu gi yi ga lo.

⁴⁰ Naa, ’ka we faa kɛlɛ é kɛlɛbɛ gi we drɔle nya ma.