1 Korent munu 12 - Kazambale lé Sebe Sauunu 1979

Kazambale Léli lé blɛnu lé we

¹ An bwenu, maa ’ka a va léé, ka vo ka tanyila Kazambale Léli lé blɛnu lé we gi lo.

² Ka a gi dɔɔ léé, dé ka a yobanmunu nya, ka nyi si léé, wo go ka nya bobogyɛ miyilinu zuo; dé wo go fɛofɛana wo go ka nya ’bɛna.

³ Bɛwemalé maa lé ka lɛ wéiin léé, dé mi a wefena Kazambale Léli nya, é ’ka bɔa a fele lɛ léé: Jézu a balepamazan nya, lo; yé dé mi ’ka wefena Léli Sauun nya lo, é ’ka bɔa a fele lɛ léé, Jézu a Mizan nya, lo.

⁴ Kazambale Léli lé blɛ gɔnɔ a di, naa, Kazambale Léli duo lé;

⁵ Bale va nyanama gɔnɔ a di, naa, Mizan duo lé;

⁶ Bale lé we kɛlɛle gɔnɔ a di, naa, Kazambale duo ɛ nyanama faa paan munu faa gi.

⁷ Kazambale éé blɛ gulian mi faa do do ma é Léli nya, munu faa lé a gi tɔnɔ yele we ma.

⁸ Kazambale Léli éé wedɔɔdére no mi do lɛ, yé éé gikinidére no mi do lɛ Kazambale Léli duo nya,

⁹ yé éé blipale no mi do lɛ Kazambale Léli duo nya, yé éé mi béli blɛnu kɛla mi do lɛ Kazambale Léli duo nya,

¹⁰ yé éé gyɛzorowenu kɛlɛle blɛ kɛla mi do lɛ, yé éé balelawe fele no mi do lɛ, yé éé léli gɔnɔ dɔɔle no mi do lɛ, yé éé dére gɔnɔ kiɛre vɔle no mi do lɛ, yé é danamla kɛlɛle no mi do lɛ.

¹¹ Naa, Kazambale Léli do kpen duo ɛ blɛ ’konu faa kɛla, yé éé wo gulian munu faa do do ma élé blibɔmawe yɛrama.

¹² Mi kɔlɛ a do, yé a vafɛnu a di. Mi kɔlɛvafɛnu a dioo, naa, wo faa a kɔlɛ do kpen nya. A zo duo lé Krist zé ke.

¹³ Kazambale Léli do kpen nya lé wo kaa faa batizéwo kɛlɛle kɔlɛ do kpen nya we ma; dé ko a Grɛkinu nyaoo, dé ko a luu nyaoo, dé ko a miné nyaoo, yee Léli do kpen lé kaa faa a mini bélé ’yi zo.

¹⁴ A zo lé mi kɔlɛ ’ka kɔlɛvafɛ do saa nya lo; a vafɛnu a di.

¹⁵ Dé gane a fe léé: Maa ’ka bɛ nya lo, amalé maa ’ka kɔlɛ va lo, bɛwemalé é ’ka kɔlɛ va loo?

¹⁶ Yé dé tɔné a fe léé: Maa ’ka yuɛ nya lo, amalé maa ’ka kɔlɛ va lo, bɛwemalé é ’ka kɔlɛ va loo?

¹⁷ Dé kɔlɛ faa kɛlɛ yuɛ saa nya, ’té mi é dan we ’ma lɛ kaa? Dé kɔlɛ faa kɛlɛ tɔné saa nya, ’té mi é dan fɛ gin si lɛ kaa?

¹⁸ Naa, webozen nya, Kazambale mi kɔlɛvafɛnu faa do do pa mi kɔlɛ ma bélé fɛan zo lé é sɔ a lɛ, a zo.

¹⁹ Dé wo faa kɛlɛ kɔlɛvafɛ do kpen nya, ’té kɔlɛ bozen éé kɛla kyɛɛn?

²⁰ Naa, sin, kɔlɛvafɛnu a di, yé kɔlɛ a do kpen.

²¹ Mi yuɛ ’ka bɔa a fele lɛ mi bɛ lɛ léé: An mawe ’ka i gi lo lo; yé mi ’wuo ’ka bɔa a fele lɛ mi ganenu lɛ léé: An mawe ’ka ka gi lo lo.

²² Naa, kɔlɛvafɛnu lé woo wo yé fɛ tɔɔtɔɔnu nya, kɔlɛ mawe a wo gi blɛn,

²³ yé kɔlɛvafɛnu lé é dɔ ko gi léé, wolé we ’ka blɛn kɔlɛ va lo, ko wolé we kɛla blɛn é minini. A zo lé kɔlɛvafɛnu lé wo ’ka é nɔnɔmi lo, ko wo tɔ bɔa,

²⁴ yé wo lé wo ke é nɔnɔmi, wo mawe ’ka wo tɔbɔle gi lo. Kazambale mi kɔlɛ bɛ pa do kɔlɛvafɛnu lé wolé we ’ka blɛn lo, wo tɔbɔle we gi,

²⁵ té kɔlɛvafɛnu é kini ékema lo we ma, naa, ’wo ’wo ke ma we kɛlɛ.

²⁶ Yé dé kɔlɛvafɛ do a nyané blena, ’té kɔlɛvafɛnu faa éé nyané blé a va. Yé dé wo kɔlɛvafɛ do tɔ bɔ, ’té kɔlɛvafɛnu faa gi éé nanaan a va.

²⁷ Ka a Krist kɔlɛ nya, yé ka a a kɔlɛvafɛ do donu nya.

²⁸ Yé Kazambale munu dɔ léglizi gi ’ko zo: a vininzannu a nwunvɔzannu nya; a fiézannu a balelayemunu nya; a yaazannu a wepaamigizannu nya; ’bɛ zuo, munu lé, gyɛzorowe kɛlɛle blɛ ke wo lee; ’bɛ zuo, munu lé, mi bélile koo, bɔle mi va koo, kɛlɛle mi ’lɛzannu nya koo, dére kiɛre vɔle koo, ’bɛ blɛnu ke wo lee, woo lé.

²⁹ Munu faa a nwunvɔzannu nyaa? Wo faa a balelayezannu nyaa? Wo faa a wepaamigizannu nyaa?

³⁰ Gyɛzorowe kɛlɛle blɛ a wo faa lee? Mi béli blɛ a wo faa lee? Wo faa éé we fé dére kiɛre gii? Wo faa a danamla kɛlɛzannu nyaa?

³¹ Ka bli ’é bɔ blɛnu va blɛ zima kaiinu ma ma. Yé zi lé é ke é zima é mini zi pɔnénu faa ta, maa dan a nagɔɔn lɛ ka lɛ.