1 Korent munu 10 - Kazambale lé Sebe Sauunu 1979

Yobanfɛ blele lé we

¹ Bwenu, maa ’ka a va léé, ka vo ka tanyila we ’konu ma lo; ko tranu faa vo lati wuo; wo faa gié wɛyi méléna.

² Wo lé wo faa batizéwole lati valé wɛyi va lé we ma lé wo kɛlɛ Moizi zuozannu nya.

³ Balenɔfɛ lé wo faa a ble,

⁴ yé Balenɔyi lé wo faa a mini. Balenɔgɔlɛ lé é tawo wo zuo, a gi ’yi lé wo faa a mini. Yé gɔlɛ ’ko a Krist nya. Bwenu, we ’ko sele ’é dɔ ka gi ma.

⁵ Naa, wo va mi kiɛre lé we ’ka sɔ lɛ Kazambale lɛ lo, amalé wo zamaga wo bwi gi.

⁶ Naa, we ’konu bɔ tɔmasenu nya, a gɔɔnle ko lɛ we gi léé, té ko bli é bɔ weplenu ma bélé wozé zo lo.

⁷ Té ka kinin miyili bɔzannu nya bélé wo va mi kenu zo lo. É a é gyɛle léé: Munu nyana fɛ blele valé fɛ minile we gi, ’bɛ zuo yé wo nwa zanagyɛle we ma.

⁸ Té ko kobo nɔ pɛnpɛnnégyɛle lɛ, bélé fɛan zo lé wo va mi kenu a kɛlɛ, a zo lo. Bɛwemalé wo va mi baa vu ta do wuru soru ga yi do nya.

⁹ Té ko Mizan gi dan lo, bélé fɛan zo lé wo va mi kenu a kɛlɛ, yé wo zamaga wo ménénu lee, wo zo lo.

¹⁰ Té ka gun gyɛ lo, bélé fɛan zo lé wo va mi kenu gun gyɛ yé migyɛzan wo gyɛ, a zo lo.

¹¹ We ’konu bɔ wo ma tɔmasenu nya, yé wo wo gyɛ sɛbɛ gi, a gɔɔnle ko lɛ we gi léé, ko lé ko ke bléyi voélanu gi ’ko, té kozé é kɛlɛ wozé zo lo.

¹² Amalé, mian é dɔ a gi léé, ’é a plɛplɛ, ’é yuɛ pa ébozen va, dé é da saan.

¹³ Wenu lé wo bɔ ka ma ka gidanwenu nya bɛ, woo bɔa munu faa ma. Kazambale a yarapawelazan nya, yé é ’ka dan a nyi si lɛ léé, ka gidanwe é ka kele lo, naa, dé gidanwe bɔ ka ma, é dan bɔ lɛ ka va, yé ka a kele.

¹⁴ Bɛwemalé, an blibɔmazannu, ’ka sɔn vɔ miyili bɔle ma.

¹⁵ Maa we fé ka lɛ bélé fɛan zo lé maa we fé wedɔɔmunu lɛ, a zo. We lé maa ke a fena, kabozen a va si ma.

¹⁶ Jézu nyɛ tɔmase miniégikana lé éé kaa drɔɔ voo bɛ, ’té kaa Bale bɔ vɔa alé we ma bɛ, dé kaa fɛ mini a gi, ’té kaazé ’ka Krist nyɛ va loo? Buru lé kaa a bɔié bɛ, dé kaa blé, ’té kaazé ’ka Krist kɔlɛ va loo?

¹⁷ Buru a do kpen, yé kaa a kɔlɛ do kpen nya, dɔlé ’té kaa a kiɛre. Naa, buru do kpen lé kaa faa a blé.

¹⁸ ’Ka gi bɔrɔ Izraɛl munu lé we ma do. Wo vamunu lé woo baleban?-?winu blé, wozé ’ka balebanle va loo?

¹⁹ Maa wean fe bɛ, a gi lé nɔɔ? Yobanwi a fɛ do nyaa? Miyili a fɛ do nyaa? Gba.

²⁰ Naa, fɛan woo saraka boo a nya, yobanfɛ lé. Kazambale banfɛ kaan lo. Yé maa ’ka a va léé, ka nana yonu nya lo.

²¹ Ka ’ka bɔa ’yi minile lɛ Mizan lé kana gi yé ka a mini yo zé gi lo; ka ’ka bɔa Mizan lé fɛ blele lɛ yé ka yonu zé ble lo.

²² Kaa a a va léé, kaa Mizan lé maawole nwaa? Kaa plɛplɛ mini a lɛɛ?

Ka we faa kɛlɛ Bale tɔbɔle we ma

²³ Mi kenu léé: A se a ko lɛ léé, ko we faa kɛlɛ. Iin, weboen lé. Naa, we faa tɔnɔ aa? A se a ko lɛ léé, ko we faa kɛlɛ. Iin, weboen lé. Naa, we faa éé mi dɔa gliglii?

²⁴ Té mi do kpen ébozen zé tɔnɔ gini lo ma; ’é mi bɛnu zé ɛ gini ma.

²⁵ Fɛ faa lé wa daan flɛ gi, ’ka ble; té ka we do kpen gi laa kalé wevasibli lé we ma lo;

²⁶ naa, tɛrɛ valé é tafɛnu a Mizan zé nya.

²⁷ Mian é ’ka Krétiɛn nya lo, dé é ka laa fɛblele ma yé é sɔ ka lɛ léé, ka go, dé é fɛan dɔra ka ’lɛ, ’ka a ble. Té ka we do kpen gi laa kalé wevasibli lé we ma lo.

²⁸ Naa, dé mi do lé ka lɛ léé: Yobanfɛ lé; mi lé é a fe ka lɛ, alé we valé alé wevasibli lé we ma, té ka a ble lo.

²⁹ Maa ’ka a fe lɛ ilé wevasibli lé we ma lo, mi bɛ zé ma lé maa fe. Maa a anboma. Mɛmalé mi bɛ lé wevasibli éé we dɔa an nwiin?

³⁰ Dé an Bale bɔ vɔa anzé fɛ ma, mɛmalé woo an tɔ sɛra ’bɛ fɛ blele maa?

³¹ We ’ko ma lé, dé ka a fɛ blenaoo, dé ka a fɛ mininaoo, dé ka a fɛofɛan kɛlɛnaoo, ’ka wo faa kɛlɛ Kazambale tɔbɔle we ma.

³² Dé é a Grɛkinu nyaoo, dé é a Juifinu nyaoo, dé é a Kazambale lé léglizigimunu nyaoo, té ka kɛlɛ wo saanzannu nya lo.

³³ Dé é a anzé nya, maa a kwa kulina we faa gi léé, anlé we ’é sɔ mi faa lɛ. Maa ’ka anbo lé tɔnɔ naginina lo, naa, maa a mi kiɛre lé tɔnɔ ɛ naginina, wo sile we gi we ma.