1 Korent munu 1 - Kazambale lé Sebe Sauunu 1979

¹ Maa Pɔl lé Kazambale an laa léé, an kɛlɛ Jézu Krist lé nwunvɔzan nya alé blibɔmale nya, maa valé bwe Sositɛne, ko ɛ ke sɛbɛ ’ko gyɛna ’kaa Korɛnt munu lɛ.

² ’Kaa Kazambale lé léglizigimunu lé ka ke Korɛnt, ’té Kazambale ka pa é yɛrama Jézu Krist gi, yé é ka laa ka kɛlɛle alé munu nya we gi bɛ, ko we ka va. ’Kaa faa lé ka Kaazan Jézu Krist tɔ laan, dé ka a fɛofɛana, ko we ka va. Sɛbɛ ’ko a kazé nya é ziin.

³ Kaa Ti Bale valé Mizan Jézu Krist ’wo zin kɛlɛ ka lɛ yé ’wo ka vo drɔɔ ma.

Pɔl Bale bɔ vɔ léglizi blɛnu lé we ma

⁴ Maa anlé Bale bɔ vɔa bléyi faa ma kalé we ma; zin lé é a kɛlɛ ka lɛ Jézu Krist gi bɛ, alé we ma.

^5-6 Maa Bale bɔ vɔa léé, é fuafɛnu faa fan ka lee Jézu Krist gi. Krist lé we a é dɔle gligli ka worona, amale ka we faa dɔɔ, yé a fedére a ka ’léé.

⁷ Amalé ka ’ka vuruan blɛ do kpen ma lo, ’té bléyian va lé Jézu Krist é dan ébozen nagɔɔn lɛ munu yuɛ va, ka a ’bɛ bléyi lɛbɛnna.

⁸ Yé é dan ka dɔ lɛ gligli fɔɔ yé ka bɔ a ’wuoplana, té gun é kɛlɛ ka ma Kaazan Jézu Krist dayi nya lo we ma.

⁹ Kazambale ɛ ka laa léé, ’ka nana é Be Kaazan Jézu Krist va, yé Kazambale a yarapawelazan nya.

Gɔnɔ bɔile a léglizi gi

¹⁰ Bwenu, maa we plaan ka lɛ Kaazan Jézu Krist tɔ gi, ka dére ’é kɛlɛ do. Té ka gɔnɔ kini monomono lo, naa, ka faa ’é vo ékeva tegele bli do valé gibɔrɔle do nya.

¹¹ Naa, an bwenu, Kloé lé munu a fe an lɛ léé, zavɔlenu a ka worona.

¹² Maa a ’ma léé, ka a kazé mi sina a va do do. Mi do léé, ’é a Pɔl va, yé a do léé, ’é a Apolɔs va, yé a do léé, ’é a Séfa zuo, yé a do léé, ’é a Krist zé nya.

¹³ Krist gɔnɔ a é kinile a gii? Pɔl lé wa gyɛ yiliblan ta kalé we maa? Pɔl tɔ gi lé wo ka batizéwoo?

¹⁴ Maa Kazambale bɔ vɔa léé, dé é ’ka Krisipus valé Gaius nya lo, maa ’ka ka va mi do kpen batizéwo lɛ lo.

¹⁵ ’Té mi do kpen ’ka bɔa a fele lɛ léé, maa ɛ ’é batizéwo an tɔ gi lo.

¹⁶ Iin. Webozen lé, an Sééfanas lé kɔngimunu batizéwo, naa, dé maa mi bɛ batizéwo, a sele ’ka an gi lo.

Krist a Kazambale lé plɛplɛ valé alé wedɔɔle nya

¹⁷ Krist ’ka an pa lɛ zia munu batizéwole we ma lo; é an pa zia Wenéné fele we ma. É ’ka lé maa Wenéné fe wedɔɔdére kiɛre nya lo, té Krist gyɛ la yiliblan é kɛlɛ boawe nya lo we gi.

¹⁸ Naa, munu lé wo ke zi saanle ta, yiliblan lé we fele a wo yuɛ gi ’tugyɛwe nya, naa, kaa lé kaa si we gi, kaa a yé Kazambale lé plɛplɛ do nya.

¹⁹ Naa, é a é gyɛle Kazambale lé sɛbɛ gi léé: Maa dan wedɔɔmunu lé wedɔɔle sɛrɛ lɛ tata, Yé maa dan gikinimunu lé gikinile kɛlɛ lɛ we pla nya.

²⁰ Wedɔɔzan a kyɛɛn? Sɛbɛdɔɔzan a kyɛɛn? Bléyi ’ko va zavɔzan a kyɛɛn? Kazambale ’ka tɛrɛ ’ko la munu lé wedɔɔle kɛlɛ lɛ tavowe nya loo?

²¹ Kazambale lé wedɔɔle gi, é a kɛlɛ léé, té tɛrɛlamunu ’é dɔɔ ’wolé wedɔɔle nya lo; é sɔ Kazambale lɛ léé, munu lé wo bli vo ’é lɛ, ’é wo si we gi wenéné lé ke ’tugyɛwe nya, alé we fele nya.

²² Juifinu éé gyɛzorowe kɛlɛle ma laan; Grɛkinu éé wedɔɔle naginian;

²³ naa, Krist lé wa dun yiliblan ta, ko yee ɛ lé we fé. Juifinu éé we ’ko yé ’wolé we gi sɛrɛwe nya; bɛnnu a yé ’tugyɛwe nya,

²⁴ naa, munu lé Kazambale wo laa, dé é a Juifi mi nyaoo, dé é a Grɛki mi nyaoo, wa yé Kazambale lé plɛplɛ valé alé wedɔɔle nya.

²⁵ Naa, Kazambale lé we lé mi a yé ’tugyɛwe nya, é a wedɔɔle nya é mini munu lé wedɔɔle ta, yé Kazambale lé we lé mi a yé we tɔɔtɔɔ nya bɛ, é a plɛplɛ é mini munu lé plɛplɛ ta.

²⁶ Bwenu, ’kaa lé Kazambale ka laa, ka dɔbɛ a fɛan zo bɛ, ’ka gibɔrɔ a ma do. Munu lé wo ke tɛrɛ la wedɔɔmunu nya, wo ’ka ka va di lo; guniwuonu koo, tɔzannu koo, wo ’ka ka va kiɛre lo.

²⁷ Naa, Kazambale wenu vabo yé wenu lé wo ke ’tugyɛwe nya tɛrɛlamunu yuɛ gi, é wo si a va wedɔɔmunu lɔlu gale we ma, yé é fɛ tɔɔtɔɔnu si a va fɛ plɛplɛnu kelele we ma.

²⁸ Fɛnu lé wo ke tadanmafɛnu nya tɛrɛlamunu yuɛ gi, ’té woo selele boo wo ma bɛ, ’té wo ’ka wo yé fɛ nya boenwo lo, Kazambale wo si a va, fɛnu lé wo ke ana, wo sile ana tata we gi,

²⁹ té mi do kpen ébo ze vɔ Kazambale yuɛ gi lo we ma.

³⁰ Naa, Kazambale lé we ma lé ka a Jézu Krist gi, yé Kazambale lé blibɔmawe yɛrama lé Krist kinin kolé wedɔɔle valé kolé we tegele koo, ko kɛlɛle sauun koo, ko tabozan koo, wo nya.

³¹ Yee lé Kazambale lé sɛbɛ a fe léé: Mian é ébo ze vɔa, ’é ébo ze vɔ Mizan gi ma.